1 Ai: au: lapa Elisha wa lapa zoshao qe: gu: mae" dayaug re khai: yu mung: phyid' cui: cui: wa,. Ce: xau thaug' ci mung:2 Ramod-giled' khyo ye" lo" wa, . – Joe" ye: lao" Nimshi yao: myid: Yehoshaphaid' yao: zo: Yehu re qho wa, . Yao: jhao" vao lao" yao: mao: yao: nhaung: jham: khug mae" yao: re jhui" thug' yu mung: akhug; qe,3 khyo khai: vhao" yu yang: – ce: xau thaug' ci mung: yao" au: dao vhe' gyain: zo" Mo"so ceru: ga: mho: ra". Nao Israel jhaung zug: boe" nae" tau: Ngo nao re xau gyain: byid: va" ein: bin: ta" lao" magyaug mavae lo: kham: phung" yang: tao" ye: wa, ga: pin:4 ke' ra". – Ai mung: lapa yaug gai zo: wa5 Ramod-giled' khyo ye" lo" ra". – Joe" ye" au: zug: qe daga" zaung: bam ko" ra". Lapa wa zug: pho" we" ngo nao re ta" kyo: nae" daja: jo; ga: mho: re Yehu wa ngonhaung" mae" khoyaug re lam: ta" nug; ga: myid' re yao: wa nao zug: pho" re yao: ta" nug; ga:6 mho: ra". – Alao" Yehu to" mung: yham khug vao lo" re lapa wa yao" au: dao mae xau re gyain: zo" Israel Mo"so apyaid ato: Mo"so mho: ra" - nao Mo"so: amyu" ngaid: Israel amyu" adao mae jhaung zug: boe"7 nae" tau: nao re xau gyain: va". – Nga" jeim lapa qe re se' ra" qobo , Mo"so: daui mung mo, alhab' re se' ra" qobo: mathao loge, phaug' nae" tau: Yezabela re Ngo dae byid' ra" khyo" nao ni" asang Ahab' yham8 byu qe re se' pye' ca" nae". – Ahab' boe: alhab' re se' tam" pye' nae" tau: Israel vozo: vozang mae kyam: lhaung" to: qhug' ru ngaid ngaid , loe; lo" va" su ngaid ngaid Ahab' boe: yaug gai jham re se' pye' ca". –9 Ahab' yham re Nebaid yao: zo: Yehobom yham we' Ahiya yao: zo: Basha yham re10 kaid' ru: kaid' pye' nae". – Lakha: jham Yezarela vomang: khain mae Yezabela re zo" pye' genae" ra" ru mung: yao: re shaung nyhab' ke' nae" myid gaung majo, nae" ga: bin: zhao: kyo: lao" kham: phung" yang: tao" lo" ra".11 Ana" Yehu yao" asang: sin: zo: qe jhao" yejoe" re dayaug wa alhab' bam: gai: na ko" i". Ai: go lho yhe' su pe" ga: ce khyo li" lo: laug ga: myid' ke' re Yehu wa naonhaung" yao: ai: yaug re re: , yao: ta" ru re re: ba ko"12 ra" ga: ta" ra". – Yao: bam wa maba. Ta" kyo" re ga: dam: tug' myid: ko" re yao: wa ai: yaug wa mho ce ga: ta" mung: Mo"so ceru: ga: mho: ra". Nao Israel jhaung zug: boe" nae" tau: Ngo nao re xau gyain: byid: va" ga: ngo re li" zhao: kyo" ga: mho: ra". –13 Ai ru: mung: yao: bam wa khag' re: khag' yao" mai bau: khyaid' mung: zam thao au: Yehu agyid' tau myhung: yang: labo" maid zo" Yehu jhaung zug: ngaid: wo" ga: hug' ko" ra".14 Nimshi yao: myid: Yehoshaphaid' yao: zo: Yehu wa Yoram: re tau: lhain" ra". Yoram: wa Israel zo: myid: qe we' daga" Suri' jhaung zug: Hazaela gye se' lo: re ga:15 Ramod-giled' re lhaug' na: ako". – Ai qere: jhaung zug: Yoram: wa Suri jhaung zug: Hazaela re lham: se' re Suri' byu qe yao: re dae te' geyang: dae pho nae" tau: Yezarela khyo dam: lo" byaug va". Alao" Yehu wa naonhaung" qaid ko" ngaid: re Yezarela vo khyo lau dao: ye zhao: kyo: nae" byu ce vo mae" khag' re: mathug' su" qin" shao: ga:16 amyin" khyo" ra". – Ai re" khyo: Yehu wa lhin" jui: mung: Yezarela vo khyo ye" lo" ra". Pe" mung: ga" re Yoram: ai: tau mae no: na: ra". Yuda jhaung zug: Ahazi re: li" qu" ga: ai: mae li" lo: ra".17 Vomo" lhaug' yaug wa Yezarela gye byu gai" dao ye; na: ru mung: Yehu we' bocao mo, re myao lao" ngo byu mo" thaui: myao: ga: mho: ra". Alao" Yoram: wa myao: jui: su dayaug re khai: yu yang: yao: bam re ye tug; yu zo" ngaui bau" na ko" i" ein:18 myid' qu" wa, ga: nhao: ke' ra". – Myao: jui: sulhe: wa tug nae" tau: ye" lo" mung: ngaui bau: yaug yo: na: i" ga: jhaung zug: myid: nhao: ke' wo" ga: ta" re Yehu wa nao yaug yo: khyo we' pe" tin" i". Nga" thao kam" acao wa, ga: mho: ra". Vo lhaug' su wa myao: jui: sulhe: pho" yao: bam jhao" yejoe" mung: madam: tug' lo lo: ngaid: ra"19 ga: jhaung zug: re zhao: kyo" ra". – Alao" yao: wa myao: jui: sin: zo: getau re dam: nhao: ke' mung: yao: ye joe" lao" ngaui bau: yaug yo: na: i" ga: jhaung zug: myid: nhao: ra" ga: ye ta" re Yehu wa nao yaug yo khyo we' pe" tin" ra". Nga" thao kam"20 acao wa, ga: mho: ra". – Vo lhaug' su wa myao: jui: sin: zo: yao: bam jhao" yejoe" mung: madam: tug' lo lo: . Lhin" jui" lo su re: Nimshi yao: zo: Yehu ru: jui" tao" ra". Ai: yaug wa myo, jid no: lam: jui" tao" ra" ga: zhao: kyo" ra".21 Alao" Yoram: wa myao: lhin" nyhang" to: ge, ga: mho yang: yao" gye lhin" nyhang" to: byid' ako". Israel jhaung zug: Yoram: we' Yuda jhaung zug: Ahazi wa yao: yaug yao" myao: lhin" jui: mung: Yehu re tug nae" ga: ye" lo" re Yezarela byu Nabug' sang: myid22 gaung dakhyi" mae qhug' ko" ra". – Yoram: wa Yehu re myao lao" yao: wa Yehu ngaui bau" na: i" ga: myid' ra". Yehu wa ni" myhi" Yezabela kaid' ra" makhyang" phavae mau" we' vha" ra" mau" ce nho" laug; ra" yo, re ngaui bau" khyo khoru: gai: jo, nae" ga:23 lham: tau" ra". – Yoram: wa yao" lo, tau mung: lhang: phao: lo" zo" Ahazi we" tau: lhain: mau" angaid nhaung ga: Ahazi re24 ta" ra". – Yehu re: yao" la: thaung: qang: ke' mung: bag; ke' ru Yoram" lo, sin mae zao" lo" mung myo: khe' ai yao" kheim kyao" kho' lo" ra" mathao yao: wa yao"25 myao: lhin" dao lang" kai" jo; ra". – Yehu re: yao" gye zug: Bidka re yao: re she: yu mung: Yezarela vobyu Nabug' myid gaung tau khyo" to: wa, . Ngo nhae yao: pho" Ahab' thao myao: jui: yang: bocao: na: re ce: akhyo Mo"so: yang myhao" va" ru26 mabeim: i". – Dang dang Nabug' sa: , yao: zo: qe: sa: re aye"nhe' Ngo the' myao va" ga: Mo"so mho: ra". Ce: myid gaung tau ni" qobo we' main" ra" dae Ngo byid: nae" ga: Mo"so mho: ra". Ai: mathao Mo"so: dao: kheim: we' dakhyo: gai: myid gaung datau mae yao: re lhang" khyo" pye' wa, ga: amyin" byid' ra".27 Ai: akhyo Yuda jhaung zug: Ahazi myao lao" khyae khug yham gau: khyo" phao: lo" ra". Yehu kam" cao" khe' zo" yao: re re: gye lhin" dao se' pye' ge, ga: mho: ke' re Ibalam nhae mae" Gura kha" to' tau yao: re dae te' ke' ko" ra". Yao: wa Megido khyo phao: lo" mung: ai: tau lo" shid: pye'28 va". – Yao" sin: zo: qe yao" nghin: dam: re myao: lhin" dao tho yang: Yerusalem: khyo yu: lo" mung: Davi vomo" phug' pho" qe we' daga" yao" lab mae nyhab' shaung: pye'29 ko" ra". – Ahab' yao: zo: Yoram: tao" zaung daxe: dazin re Ahazi Yuda mang: mae tao" zaung: ra".30 Yehu Yezarela khyo joe" va" ru Yeza- bela the' gyo: lao" myo, mug' cid' xug' pye' mung: xae re shaung: pye' yang: kham: zo:31 dung: khyo" jhug' qu" na: . – Yehu kham: dung: joe" vao lo: au: yao: wa yao" asang re se' pye' ra" Zimari we" ngaui pyo" na: i"32 ga: lham: myid' ra". – Alao" Yehu nghao" qu" ke' yang: nga" thao khoyaug bo:? Khag' ngaid: ga: tug' myid' ke' re yham lhaug' mo, shid' sam zo: yao: re li" jhug' qu"33 ke' ako". – Yehu wa yao: re deim" phyid' khyo" ke' ge, ga: ta" ke' re yao: re deim" khyo" ke' ko" ru mung: yao" sa: yham khin qae adao mae re: , myao: dao mae re: gyo" gyain" ra". Yehu re: yao: re zab; ke' ra". –34 Akhug khyo vao lo" mung: zo: zo: shaug' shaug' kaid' yang: ce: nhang: kheim: zao" ra" myiqe: yegaug: nyhab' pye' ge, . Yao: wa jhaung zug' myiqe: zo: ngaid: ra" ga: mho:35 ra". – Ai mung: yao: re nyhab' pye' nae" ga: yao: bam yequ" ko" re au: gye; , khyid we' lo, vo: mae" je yang: pe" re re: mathe'36 myao lo: ko". – Ai mung: yao: bam dam: tug' lo yang: yao: re lodam: zhao: kyo: ko" ra". Yao: wa Yezarela myid gaung datau mae lakha: jham Yezabela sho: re zo" pye' genaeva" ga: Mo"so: yang yao" daui mung su Tishabi' vobyu hau" ra" dao: kheim:37 boe" dang: lo: ra". – Ce wa Yezabela lab qo ngaid: ga: khag' re: maqo" ba: ta" sho' yao" mao gaung Yezarela myid gaung datau mae myid jin" ru: boe" nae" ga: ta" ra".