1 Yoshia kao she' zin: au: tao" zaung mung: Yerusalem vomo" mae sam xe: dazin zug: gam: ra". Yao: myhi" wa Boza- kad' vobyu Adaya zomyi: zo: Yedida ngaid:2 ra". – Yao: wa Mo"so: qhid' kheim: dang main: mau" zaui: so: mung: lo, yo lo, vai: manghung: lo: yao: pho" Davi cao" khyo- dang alhab' cao" ye" ra".3 Jhaung zug: Yoshia tao" zaung daxe: she' zin: au: Meshulam: yao: myid: Azalia yao: zo: tung" su Shaphain re nhao: ke' mung: Mo"so: pa" jhaung: yham mae na: ra" khin jaung agyi Hilikia jhao" do, ye:4 wa, . – Yao: wa pa" jhaung: yham kham: lhaug' ra" mo, mang: byu qe: lo, mae"5 zhag' yu: ra" ngaui nghe' qu" shao: . – Ai: ngaui re pa" jhaung: yham qu" caung kin mo; lo, mae qhaug' byid: shao: . Yao: bam wa pa" jhaung: yham qeim: lo" khyi" mae nyhang" kaid' na mo, re gae byid: shao: . –6 Lo, mau" sham" mo, we' zho:thaung: qae mo; tau: re: , yham nyhang" byao nae" sag' , laug baui vai nae" tau: re: ngaui ai ngaid7 shao: ga: pin: nhao: ke' ra". – Ai qere: yao: bam vin tang: za: ngaid ko" mathao yao: bam: lo, mae qhaug' ra" ngaui japhin: khye' getau mamho' qo.8 Khin jaung yin" Hilikia khyo" khang" dao: paug' pa" jhaung: yham mae" ngo myao va" ga: tung" su Shaphain re qhaug' byid: mung: Hilikia re Shaphain nghe' kyo"9 ra". – Tung" su pho" Shaphain re: jhaung zug: jhao" lo" mung: ni" daui mung zoshao qe ai: jhaung: yham kaid' mo, re ug; ra" mo; lo, mae qhaug' byid: va" ga: mho:10 ra". – Ai: tho' mae Shaphain wa jhaung zug: re khin jaung Hilikia wa tung" khye' dalam: ngo re lham: byid' ra" ga: mho11 mung: yao: re nghe' kyo" ra". – Jhaung zug: pho" wa ai: khang dao: jham: qo" the' gyo: lao" yao" ve, mai bau: lao" caid' pye'12 ra". – Ai mung: jhaung zug: wa khin jaung Hilikia , Shaphain yao: zo: Ahikam , Mikha yao: zo: Akhabo , tung" su Shaphain: we' jhaung zug' daui daui yaug Atahi bam re13 khai mung: – Ce the' myao: tung" khye' dao: akhyo nga" tau: re: , vobyu qe: tau: re: Yuda damang" geim" mae" byu qe: tau: re: Mo"so jhao" myid' qu" byid: gela, . Pe" mung: ga" re ce: tung" khye' mae nyhao: nhaung" akhyo tung" to" we' dakhyo: nyhao" phug' pho" qe macao" ko" mathao Mo"so nyhao: re gyai nhag' yo: kheim jhu" na: ra" ga: mho: ke' ra".14 Ai ru: mung: khin jaung Hilikia , Ahikam , Akhabo , Shaphain we' Atahi wa Shalum yao: myi: , Tikava yao: zo: jhaung zug' ve, mai bau: zam: Shalum yao: myi: myiqe: lapa Hulada jhao" vao ye: yang: yao: we' dao: jho" jhau ko" ra". Yao: wa Yerusalem shid' dau ein: ra" tam" mae na:15 na: ra". – Ai: lapa myiqe: wa Israel Mo"so ceru: ga: mho: ra". Naonhaung" re Ngo jhao" nhao: ke' yaug jhao" ceru: lo" ta"16 ge, . – Mo"so mho: ra" Yuda jhaung zug: nghe' qu" va" tung" khye' dao: we' dakhyo: ce: vomo" we' ai: mae na: ra" mo, alhab' bam: adao mae qug: khai: poe" thug' ke'17 nae". – Pe" mung: ga" re yao: bam Ngo re to: co' mung: yao: bam: lo; yang kaid' ra" lo, mau" zo" we' Nga" nhag' yo: kheim: qi" lo nae" khyo: mo, je: gyoe lho: qhid' kheim: mae nae pyo" ja: ngaui" byid: ko" ra". Ai: mathao ce: jo, qo tau Nga" nhag' yo: kheim: myi: masham lo: nae" ga: mho:18 ra". – Mo"so jhao" myid' qu" nae" ga: naonhaung" re nhao: ke' ra" Yuda jhaung zug: re ceru: lo" ta" ge, . Nao the' gyo" qu"19 mung dao: akhyo ceru: ngaid: ra". – Ce: jo, qo we' ai: mae na: ra" byu qe wa cae: jhug tag; jo, qo we' gyam ma zao" ra" amyu" boe" genaeva" ga: Ngo ta" ra" dao: nao the' gyo" au: ni" nhag' lam: nhae" mung: Mo"so: qhid' kheim: nhag' lam: nyham: khyo" ru we' ni" ve, mai bau: lao" caid' pye' yang: Nga" myo, le, ngug byid ngug nhe' gyo" na: mathao: yang Ngo ni" dao: tae" gyo: byid:20 va". – Ngo nao re ni" phug' pho" qe zang" qham jao: khyo dai" mung: nao ngaui pyo: za: ni" lab khug khyo qo" vao: li" nae". Ce: jo, qo tau Ngo poe" ke' nae" qug: khai: re ni" myo; yang mathe' myao nae" ga: mho: ra" ein: lo" ta" ge, ga: ta" ra". Yao: bam re: dam: tug' lo" mung: jhaung zug: jhao" ai: lau dao: zhao: kyo: ko" ra".