1 Ai: ayo, adau re Hezekia shid no no: na mung: Amod' yao: zo: lapa Esaia yao: jhao" li" joe" yang: Mo"so ceru: ga: mho: ra". Nao qo" daui: na lo nae" mangaid: . Shid naeva" mathao ni" yham khug byu: suna nyhang"2 sho' to: wa, se, ga: mho: ra". – Alao" Heze- kia wa khin qae khyo myo, khung: qang3 mung: – Mo"so we" ngo ni" qhid' kheim: vin tang: mung: gyang: so: za: su" na: ra" mathao nao o ngaui nam ja: khao: ngo" re zaui: so: va" ru re beim: so" yu la, wo" ga: ngug byid ngug nhe' gyo" zo" Mo"so jhao"4 jhaung: mho' ra". – Ana" Esaia wa vomo" agaung: lhao" majoe" shi" re Mo"so: dao:5 yao: jhao" joe" li" mung: – nao Nga" byu qe: zug: jhaung Hezekia jhao" dam: tug' ye: yang: ceru: ein: ye ta" wa, . Ni" pho" Davi AsAng Mo"so ceru: ga: mho: ra". Ni" mho' yao: dao: Ngo qo" gyo: va". Ni" ngug byid re: the' myao va". Ni" no gai shao" pye' byid: mung: sam ba: aqho" pa" jhaung:6 yham qo" the' vao nae". – Ni" kao daxe: ngo" zin xo' laung: byid: shi: nae". Nao re re: , ce: vomo" re re: Asuri mang: jhaung zug' lo, mae" khyaid' yu naeva". Nga" myo, nho: yang re: , Nga" jeim Davi myo, nho: mathao: yang re: ce: vomo" re caung gam: yu nae" ga: mho: ra" khyo ta" kyo" ra". –7 Dam: Esaia wa pho' ham" shi: dapoe yu: lo ri: ga: mho: re yao: bam ci: lo mung: byang mae te' hab' byid' ke' re jhaung zug: gai: lo" byaug; ra".8 Ai qere: Hezekia jhaung zug: wa Mo"so ngo re no gai byid: mung: sam ba: aqho" pa" jhaung: yham qo" do, ye: nae" wa pe" ve, lho myhao" qhu" nae" i" ga: Esaia re9 myid' qu" ra". – Ai lao" Esaia wa Mo"so mho: we' dakhyo: ce mau" poe" ke' li" nae" Mo"so mae" ni" tau: ve, lho ceru ngaid nae". Yo, ka" ra" aqab daxe qui" laung" li" nae" i". Daxe naung zaid: zaid: nae" i" ga:10 myid' re – Hezekia wa aqab akham daxe qui" do, lo nae" laui: ra". Ai ru: mangaid: akham daxe naung zaid: lo" shao: ga: ta"11 ra". – Lapa Esaia khyo" re: Mo"so jhao" mho' yao: ru mung: yao: wa Ahaza yo, ka" ra" zam thao aqab akham daxe qui" do, va" ru re dam: tug' zaid: qui" ke' ra".12 Ai: ayo, Babilon jhaung zug: Baladan: yao: zo: Berodag Baladan wa Hezekia no: na: lau dao: the' gyo: mung: yao: jhao" tung" khye' yang jhaung qhu" vhin: ke'13 ra". – Hezekia re: yao: bam re lham: tug: yu mung: yao" zai to: yham mae" ngaui , hhang nae pyo" ra" ja: , phug' thao" xau jham , gye shae lhae sin: ke' to" yham we' yao" ngaui jhi mae bo mae: bo alhab' ceim" qhu" ra". Hezekia wa yao" yham we' yao" mang: din" khug bo mae: bo yao: bam re14 maqhu" ru daja: lhao" majo, lo: . – Alao" lapa Esaia wa Hezekia jhaung zug: jhao" ye: mung: ce: byu qe pe" lau dao: zhao ko". Khomang: mae" nao jhao" li" ko" ru ngaid: ga: myid' re Hezekia wa va" ra" Babilon mang: mae" joe" li" ko" ra" ga: ta" kyo"15 ra". – Kho" vang khug pe" ja: ja: myao: lo" veko" ga: myid' re kho" vang mae jo, mae: jo, alhab' the' myao: yu veko". Ngaui jhi mae bo mae: bo ngo yao: bam re maqhu" ru daja: lhao" majo, lo: ga: ta" kyo" ra".16 Alao" Esaia wa Hezekia re Mo"so: dao:17 tae" gyo: wa, . – Mo"so ceru: ga: mho: ra" ni" yham mae bo mae: bo re re: , ana" ba joe" sho' ni" phug' pho" qe qaung" to" ra" zai cao jab re re: Babilon vomo" khyo sham" tai: lo" ra" ayo, joe" li" nae". Pe" re: matang"18 to: lo: genae". – Nao khau myhung: ke' zo: myid: qe re re: yao: bam sham" jhui" lo" mung: Babilon jhaung zug' kho" vang mae zhe' nha: to" byu qe khyo" to" li" genae"19 ga: mho: ra". – Alao" Hezekia wa nao mho: ra" Mo"so: dao: gai: kyi: . Dang dang nga" abang: re ngaui pyo" ru we' vin tang: za: na: na: re gai: mangaid: i" ga: Esaia re20 tug' mho: ra". – Hezekia zaui: so" lo: dang shi" yao" lo, mau" jham phung bao ham: hung: , qid lhao: we' qid co gyaung: re yao: khoru: kaid' mung: vo khug qid pa" zaui: ra" akhyo Yuda jhaung zug: mhomyi:21 xam: paug' mae tung" to" ra". – Hezekia wa yao" phug' pho" qe we' daga" yab pyo" lo" mung: yao: zo: Manashe: yao" khu tao" zaung: li" ra".