1 Ana" Suri mang: we' Israel mang: gye2 maboe" ru sam zin ngaid va". – Sam zin ein: zin re Yuda jhaung zug: Yohoshaphaid' wa Israel jhaung zug: jhao" li" lo: ra". –3 Israel jhaung zug: yao" sin: zo: qe re Gilaid mang: Yamug' vomo" wa ngonhaung" mang: khug mae bo: ra". Ai qere: nyhao: yaug yo za: na yang: Suri jhaung zug: lo, mae" malhaid' yu: ru wa naonhaung" ba4 ko" i"? ga: ta" ra". – Yohoshaphaid rere: nao ngo we' daga" gye se' nae" tau: Gilaid mang: Yamug' khyo do, lo" nae" i"? ga: ta" ra". Yohoshaphaid' wa ngo wa nao ru: , nga" amyu" wa ni" amyu" ru: , nga" myao: jham ni" myao: jham ru: angaid: ga: Israel jhaung zug: re ta" ra".5 Dam: Yohoshaphaid' wa ana" ba yao: AsAng Mo"so re ye myid' qu" lang:6 ga: Israel jhaung zug: re ta" ra". – Israel jhaung zug: wa lapa byid yo re khai: qham: to: mung: ngo Gilaid mang: Yamug' khyo gye to" gai: i"? , magai i"? ga: myid' qu" re yao: bam wa do, lo" wa, . AsAng Mo"so ai: vomo" re ni" lo, tau: qhaug' byid: naeva"7 ga: ta" ko" ra". – Ai qere Yohoshaphaid wa nyhao: AsAng Mo"so re qo" myid' jhaug' yu nae" tau: yao" lapa dayaug daqo: na shi"8 i"? ga: myid' re , – Israel jhaung zug: wa AsAng Mo"so jhao" qo" myid: byid: nae" su Imala yao: zo: Mikha na: shi" ra". Ai qere: ai: yaug re ngo gyid' ra". Nga" adao ngaui lho" dao: makho". Nhang: kheim: za: ata" hau" ra" ga: Yohoshaphaid' re ta" ra". Ai lao" Yohoshaphaid' wa jhaung zug: nao ai9 ru: damho ga: dam: ta" ra". – Ai: au: Israel jhaung zug: wa daui nhao dayaug re khai mung: Imala yao: zo: Mikha re mye, za: ye10 khai: lo ge, ga: amyin" khyo" ra". – Israel zug: we' Yuda jhaung zug: Yohoshaphaid' nhae wa jhaung zug: khyung ve; ci yang: Samari vomo" kham: , qhid' kheim: mae yao: yao" tao" tau zaung: jo, mung: lapa qe alhab' bam: yao" nhae qhid' au: pa: na:11 ako". – Khenana yao: zo: Zediki wa jo, to' khyug kaid' mung: AsAng Mo"so: amyin" dao: joe" ra". Suri byu rere: qo" phyo' pye' sho' ce: khyug; yang nao yao: bam re thaung" lhaui" pye' ca" nae" ga: mho: ra"12 khyo ta" kyo" ra". – Lapa qe alhab' bam: re: Gilaid mang: Yamug' vomo" khyo gye lo" se' aung veshao: . AsAng Mo"so: yang ai: vo re jhaung zug' lo, mae qhaug' byid' li" nae" ga: pa: ako".13 Mikha: re yekhai: logyo: re: lapa qe wa jhaung zug: re ngaui lho" dao: za: daqam: daqhi pa byid' ako". Ai ru: mung: nao re: yao: bam ru: ngaui lho" dao: za: pa byid:14 wa, ga: ye ta" ra". – Alao" Mikha wa AsAng Mo"so kao daui: na: we' dakhyo: AsAng Mo"so: amyin" dao: re za: ngo dam: ta"15 kyo: zai angaid: ga: mho: ra". – Jhaung zug: jhao" joe" lo ko" au: jhaung zug: wa Mikha we" ngonhae Gilaid mang: Yamug' vomo" khyo gye se' to" gai: i"? , magai: i"? ga: myid' re Mikha wa gye lo" se' aung veshao: . AsAng Mo"so wa jhaung zug' lo,16 tau qhaug' byid' li" nae" ga: ta" ra". – Alao" jhaung zug: wa AsAng Mo"so: mang khyao: we' dang main" dao: mae" je yang: nao ngo re pe" re: mata" ru nao re khonho" lhang17 ta" peim: ca" ga: ta" ra". – Mikha wa Israel byu qe wa yao zam: mabo: yao ru: bam mug: mae gao" myi" sin" na: ru ngo myao va". AsAng Mo"so wa cebam asang maqo" ko". Khag' re: khag' yao: yao" yham khyo ngaui pyo: za: tug' lo" veshao: ga: mho: ra"18 akhyo ta" kyo" ra". – Israel jhaung zug: wa Yohoshaphaid' re ce yaug nga" akhyo mae ngaui lho" dao: mata". Magai: dao: re za: ahau" ra" ein: ngo ta" va" mangaid: i" ga:19 mho: ra". – Alao" Mikha wa ai: mathao: yang AsAng Mo"so: dao: gyo: byid: wa, . AsAng Mo"so wa yao" tao" myhao mae zaung: jo; ru rere: , mug: gaung: ajham ataung qe wa yao" lo, yo lo, vai: ye; na ko"20 ru rere: ngo myao: ra". – AsAng Mo"so wa Ahab Gilaid mang: Yamug' khyo gye se' do, lo" re lo" shid nae" tau: kho yaug ba: ngaug nae" ga: ta" re lhang" kham" to: mo,21 wa dayaug daru: ga: dam: ta" ako". – Ai re mashao: solo wa AsAng Mo"so: qhid' kheim: li" ye, mung: ngo yao: re qo" ngaug nae" ga:22 mho: ra". – AsAng Mo"so wa khoru: ngaug nae" ga: myid' re mashao: solo wa ngo ye: mung: yao" lapa alhab' bam: nhaid' mae mhug' ra" mashao: solo boe" nae" ga: ta" ra". Alao" AsAng Mo"so wa nao yao: re qo"23 ngaug nae" ai ru: kaid' wa, ga: ta" ra". – Ai ru: mung: AsAng Mo"so wa mhug' sham" dao: ba: ta" ra" subyo re jhaung zug' lapa alhab' qe mae ke' vhao" to: va". Jhaung zug' mau" mae AsAng Mo"so: yang magai: khyo za: ta" hau: nhao: va".24 Ai: au: Khenana yao: zo: Zedakia qui" te' lo mung: Mikha re pyo' ke' mung: AsAng Mo"so: Solo nao mae vao: jaung" nae" tau: khore" khyo: ngo mae" thug' lo"25 ra" ga: myid' ra". – Mikha wa nao vho' na nae" ga: akhug; qe, vao lo" ba nao qo"26 the' myao nae" ga: ta" ra". – Israel jhaung zug: re: Mikha re cam" yu mung: vomo" ug Amon we' jhaung zug: yao: zo: Yosha27 re qhaug' byid: yang: , – Ceyaug re kyam: lhaung: to: ge, . Ngo yaug yo gai" dam: lhang" lo: yo, joe" sho' ceyaug re sho: jhin taung" zho: jhaug' nha: to: ge, ga: ta" ra". –28 Mikha wa nao yaug yo za: adam: qo" lo: re wa AsAng Mo"so nga" nhaid' yang dao: ta" nae" mangaid: ga: ta" ra". Xo' yang: mang: byu qe we" alhab' bam beim: so" na ge, ga: ta" ra".29 Ai ru: Israel jhaung zug: we' Yuda jhaung zug: Yohoshaphaid' nhae Gilaid mang: Yamug' vomo" khyo gye se'30 do, lo" ako". – Israel jhaung zug: wa Yohoshaphaid' re ngo nga" gaung re bau: agoe" ve; ci yang: gye poe khyo vao nae". Nao kam" wa jhaung zug: khyung bau: ve; ci wa, ga: ta" ra". Ai mung: Israel jhaung zug: wa gai boe" khyo: bau: ve; ci yang:31 gye se' jao: akhug khyo vao: ra". – Suri jhaung zug: wa Israel jhaung zug: mae" je yang: byu aqi: angai khag' rere dase' ge, ga: gye se' lhin" sin: zo: qere: ug: ra" sin: thu mo" sam xe: shid' yaug re pin: to" ra". –32 Gye lhin" ug zug: qe wa Yohoshophaid' re myao gelao" yao: bam wa dang za: ceyaug wa Israel jhaung zug: ngaid: nae" ga: yao:33 re cao" khe' se' ko" ra". – Yohoshaphaid' kam" wa zag: hug' ke' ra". Israel jhaung zug: mangaid' ru gye lhin" ug zug: qe ba: pye' gelao" macao" khe' lo: dam: lhang: lo"34 ako". – Byu dayaug wa yao" la: mageim: bag; ke' yang: Israel jhaung zug: vae: dug; nghoe' we' qao bao" gyo: bag; zao" ke' mung: yao: wa ngo re gye poe akhug mae" jhui" thug' se. Ngo dae de' byaug va" ga:35 gye lhin" keim: su re ta" ra". – Ai: ba gye je: jho" se' ako". Jhaung zug: wa Suri byu qe we' thaung" qhug' na: au: yao" gye lhin" tau byu re pao mung: zaung: na: ra". Myi" thao joe" lao" shid lo" byaug mung: no dae mae" sa: wa gye lhin" khyo yug; gyo" ra". –36 Ba vao: lo" lao" gye thaui: mo" qe khag' re: khag' yao" vo , yham khyo lo" gese ga: hug' ta" na: ako".37 Ai: ru: jhaung zug: shid: pye' mung: Samari vomo" khyo yu: lo" yang: ai: tau38 lo" nyhab' shaung: ako". – Gye lhin" we' sin: jham re Samari voyae qid lhao: mae cid' ako". AsAng Mo"so: dao: kheim: we' dakhyo: lakha: jham yao" sa: yo, shaug' ako". Yaug zhang: myhi" qe re: ai: tau gaung39 cid' ko" ra". – Ahab' mau" zo" we' yao: kaid' mau" alhab' wa , yao: kaid' ra" xao zaui kho" vang we' yao: te" to" vogaung: alhab' jham: akhyo Israel jhaung zug: qe:40 mhomyi: paug' mae tung" to" ra". – Ahab' wa phug' pho" qe we' daga" yab pyo" lo" mung: yao" atha" Ahazia tao" zaung: ra".41 Israel jhaung zug: Ahab' tao" zaung byid zin re Asa yao: zo: Yohoshaphaid' Yuda mang: mae tao" zaung: qhid: ra". –42 Yao: tao" zaung: qhid: au: kao sam xe: ngo" zin ngaid va". Yerusalem: tau shid' xe: ngo" zin zug: kaid' ra". Yao: myhi" wa Shilahi43 yao: zo: Azuba mang: ra". – Yao: wa yao: pho" Asa khyo gau: mae" manghung: lo: su: mung: AsAng Mo"so: qhid' kheim: dang: ra" khyo: kaid' nae" gelho: kaid' ra". Ai qere: myhao: bug gaung mae" pa" kug' jao: jham re mayu: pye' ru mung: byu qe ai: jo, qo tau xeim: ngaui" yang: nae pyo" ja: ngha"44 nhae" na shi: ko" ra". – Yohoshaphaid' jhaung zug: wa Israel jhaung zug: we' gye makaid' nae" tau: lozam" lokhug kaid' ra".45 Ca ca" shi" Yohoshaphaid' zaui: so" khyo , yao" ham: hung: we' gye se' lo: akhyo jham re Yuda jhaung zug: mhomyi:46 paug' tau tung" xam" to" ra". – Yao: pho" Asa ta mae" dang shi" yaug gai o: khyo: cao" byid' ra" myiqe: lho yhe' yaug gai jham rere: mang: din" khug mae" khe' pye'47 ra". – Ai: ayo, Edom mang: tau jhaung zug: mana. Yuda jhaung zug: khyo" nha: to" mang: zug' yang za: zug: gam: na: ru48 ngaid: . – Yohoshaphaid' wa Ophira mang: khyo hhang yetai nae" ga: Tarshi qid lha mo" zhaug' qere: Ezion geba: tau byo; qeim:49 pye' yang: maqo" ye: lo: . – Ahab' yao: zo: Ahazia wa Yohoshaphaid' re nga" sin: zo: qe ni" sin: zo: qe we' daga" qid lha zaung vegeshao: ga: mho' qere: Yohoshaphaid'50 magyo: . – Ai thao Yohoshaphaid' wa phug' pho" qe we' daga" yab pyo" lo" mung: yao: pho" Davi vomo" mae phug' pho" qe we' daga" shaung nyhab' ke' qhug' ra". Yao: zo: Yohoram yao" atha" tao" zaung: ra".51 Yuda jhaung zug: Yohoshaphaid' tao" zaung: ru daxe: nhaid' zin: au: Ahab' yao: zo: Ahazia Samari vomo" mae tao" zaung mung: Israel qe: adao shid' zin zug' gam: ra".52 Ai: yaug wa AsAng Mo"so: qhid' kheim: makhyang" mau" zaui: mung: yao: pho" khyo dang , yao: myhi" su" gau:, Nebaid yao: zo: Jerobom yang Israel qe re qobo53 kaid' nhao: gau: mae su" na: ra". – Bala so pa" kug' caung da" zo" yao: pho" kaid' qhu" mau" alhab' we' dakhyo: Israel AsAng Mo"so re nhag' yo: lhau: zhung" na: ra".