1 Ai: thao Yezarela byu Nabug' wa Yeza- rela vo tau sabyi' khyae qo" ra". Ai: khyae wa Samari jhaung zug: Ahab' kho" vang2 we' te' za: ngaid: . – Ahab' jhaung zug: wa Nabug' re ni" sabyi' khyae nga" yham we' jhao" ra". Ngo ai re xeim: khyae kaid' nae" ngo re byid: la, . Ngo nao re je: gai: ra" sabyi' khyae byid: nae". Mangaid: lao" nao ngaui: o: ngaid: re aphug' shao: nae"3 ga: mho' ra". – Nabug' wa phug' pho" qe: jhao khae myid gaung nao re byid: ga" ru wa AsAng Mo"so yao: tam" kyo" shao: ga:4 Ahab' re ta" ra". – Ai: mathao phug' pho" qe: jao khae mug: nao re maqo" byid: ga: Yezarela vobyu Nabug' Ahab' re ta" ra" mathao yao: myid myo: yang: mamyain: makhyaid' mung: yao" kho" vang khyo dam: lo" ra". Yao" yab jaung: tau lang" na zo" myo, khung: nyham" pye' mung: zo re: mazo: .5 Yao: myi: Yezabela yao: jhao" li" mung: mazo: losho' pe" myid myo" na: ra" ga:6 myid' ra". – Alao" jhaung zug: wa Yezarela vobyu Nabug' re ngo khai mung: ni" khyae ngo re aung: byid: la, . Mangaid lao" je: gai: ra" getau khyae re ngo byid: nae" ein: mho' re nao re nga" khyae maqo" byid: ga: dam: ta" ru mung: nhag' ngai: na: ga: ta" kyo"7 ra". – Yao: myi: Yezabela wa nao Israel mang: re zug: gam: na: mangaid: i"?. To" wa zo: yang: myain yo za: na wa, . Ngo lam: Yezarela vobyu Nabug' khyae qhaug' byid: nae" ga: yao: re ta" myain myhain" ra". –8 Ai mae" yao: wa Ahab' mang khyo" tung" khye' tung" yang: so:te' thaung: mung: ai: tung" khye' jham re Nabug vo mae na: ra" agyi qe , ade, qe jhao" tung" vhin: ke' ra". –9 Ai: tung" khye' mae zo: shaug' zang: yo, tau" to: mung: byu qe: qhid' kheim: Nabug10 re zhaung: to: ge, . – Ai mung: azhaug' amhe' byu shid' yaug yao" qhid' mae nha mung: nao AsAng Mo"so we' jhaung zug: re nhang" pye' ava" ein: sagso: kham nhao ge, . Ai: thao yao: re she: thug' yang: laug baui yang pye' se' ge, ga: tung" vhin: ke' ra".11 Ai: vo mae" agyi qe we' kheim: so' bo mo, wa Yezabela tung" vhin: ke' ra" tung"12 khye' we' dakhyo: zaui: so" ako". – Yao: bam zo: shaug' jao" yo, tau" phyid' to: mung: Nabug re mang: byu qe tho' je: langa: bo: jo, qo mae zhaung: to" ako". –13 Ai: azhaug' amhe' byu shid' zo: wa Nabug' qhid' kheim: li" zaung mung: Nabug' wa AsAng Mo"so we'jhaung zug: re nhang" ra" ga: yao" akhyo sagso: kham: ako". Ai: thao ai: vo mae" yao: re she: thug' mung:14 laug baui: yang pye' se' ako". – Ai mae" yao: bam wa Yezabela jhao" Nabug' re laug baui: yang pye' se' pye' va" ga: ta" nhao: ke'15 ko" ra". – Nabug' re pye' se' pye' va" khyo Yezabela the' gyo: lao" Ahab' re Yezarela vobyu Nabug' manug: aung: byid' sabyi' khyae re sang: pye' se , Nabug' madaui lo: ,16 shid va" ga: ta" ra". – Nabug' shid va" khyo Ahab' the' gyo: lao" Yezarela vobyu Nabug' sabyi' khyae sang: pye' nae" ga: to" ye" lo"17 ra". – Ai: au: Tishabi vobyu Elia jhao" joe"18 li" ra" AsAng Mo"so: mung dao: wa , – nao Samari mae na: ra" Israel jhaung zug: Ahab' re ye:tug wa, . Yao: Nabug' sabyi' khyae19 sang: pye' nae" ga: ye" lo" va". – Yao: re ceru: ein: ta" wa, , AsAng Mo"so mho: ra" , nao byu: kao re se' mung: yao" jo, nho" rere: sang: yu nhaung i". Dam: mho shi" ra" lakha: jham Nabug' sa: yo; ra" tau ni" sa: rere: yo; li" genae" ga: mho: ra" akhyo20 ye ta" wa, ga" khyo ta" ra". – Ahab' wa ngo re gye kaid' su we' ngo we' dam: jho" qhug' va" i" ga: Elia re ta" ra". Elia wa nao AsAng Mo"so: qhid' kheim: mae qobo kaid' nug yang: ni" gaung re aung" pye' va" mathao21 nao we' ngo qhug' ru ngaid: . – AsAng Mo"so mho: ra" , ni" adao qug: khai: nhao: ke' mung: nao re jhaid' za: sham" pye' naeva". Ahab boe: yaug gai alhab' bam: we' Israel qe mae kyam: lhaung" to: su , phao: loe; lo" su bin sho' re se' jheim"22 pye' naeva". – Nga" nhag' yo: kheim: re lhau: zhung" ra" qobo we' Israel qe re shaid' nghung: nhao: qobo: mathao: yang ni" aboe: re Nebaid yao: zo: Jerobom boe: we' Ahiya zo: Basha boe: ru: ngo boe" pye'23 nae". – Yezabela mau" zo" re AsAng Mo"so mho: ru wa , Yezarela vokham" nhae mae lakha: jham Yezabela re zo: genae". –24 Ahab' boe: vo khug mae shid; ngaid: re lakha: zo" pye' nae". Vo taung gaung tau shid; ngaid: re dao" lhau: ngho' jham: yang zo" pye' li" genae" ga: mho: ra" akhyo Ahab'25 re ta" kyo" ra". – Ahab' we' dau: ru dayaug lhao" mana. Yao: myi: Yezabela re: yao: re bozhain" ra". Ai mung: AsAng Mo"so: qhid' kheim: qobo kaid' nug mung: yao" gaung26 aung" pye' yaug ngaid: . – AsAng Mo"so: yang Israel amyu" qe: qhid' kheim: mae khe' pye' va" Amori byu qe kaid' ko" sulho kug' ra" ru we' anyain: avho: kaid' mau" re vin tang: zaui: so" ra".27 Elia zhao: kyo" dao: Ahab' the' gyo: lao" yao" bau: lao" caid' pye' mung: jid: mo" bau: ve; ra". Zo: shaug' jao" ru , jid: mo" phyao: myhung: tau lang" jo; ru we' kaug'28 qin" ra". – AsAng Mo"so: mung dao: Tishabi29 vobyu Elia jhao" joe" mung: , – Ahab' nga" qhid' kheim: mae khoru: nyham: khyo" ru re nao myao va" i". Ai ru: nga" qhid' kheim: nhag' lam: nyham: khyo" ra" mathao yao" bang: re ai: qug: khai: majoe" nae". Yao: zo" qae: mae za: yao" yham khaung tau ngo poe" nhao: ke' nae" ga: mho: ra".