1Jhaung Zug:-15

(SHAO GYANG" JHAM: PAUG' )

切换到福音影视网-新版圣经

  • 1 Israel jhaung zug: Nebaid' yao: zo: Jerobom tao" zaung daxe: she' zin re Abiyam wa Yuda mang: mae tao" zaung:
  • 2 ra". – Yao: wa Yerusalem: mae sam zin tao" zaung: ra". Yao: myhi" wa Abashalung: yao:
  • 3 zo: Makha mang: ru ngaid: . – Abiya: wa yao: pho" kaid' ra" qobo kaid' mau" alhab' re cao" zaui: mung: yao: phug' kai: Davi nhag' lam: AsAng Mo"so mae yaung" shab; we' dakhyo: yao" nhag' lam: yaung" shab;
  • 4 khyo majo, . – Ai qere: yao" AsAng Mo"so wa Davi myo, khung: qu" yang: yao: zo: re yao: zo" atha" kaid' nhao: ru we' Yerusalem: vomo" tang nhao: to: nae" tau: ai: vomo" mae Davi myi: kaug' theim" pao" to" ra". –
  • 5 Pe" mung: ga" re Davi wa Hiti amyu" Uria akhyo mae" lai yang: AsAng Mo"so: qhid' kheim: mae dang main: ra" mau" kaid' ru mung: yao: re pin: to" gu: yao" bang: gain
  • 6 sho' nghung" ru mangaid: . – Rehoboam we' Yeroboam wa yao: tao kao daui: na: dabang" geim" gye jho" se' ako".
  • 7 Abiya akhyo ca ca" shi" ru we' yao: kaid' mau" alhab' Yuda jhaung zug' mhomyi: paug' mae tung" xam" to" ra". Abiya we' Jerobom re yao: cao: gye jho" se'
  • 8 ko" ra". – Abiya wa phug' pho" qe we' yab pyo" lo" mung: Davi vomo" mae shaung: nyhab' ke' ru qhug' ra". Yao: zo: wa yao" atha" tao" zaung: ra".
  • 9 Israel jhaung zug: Jerobom tao" zaung shid' xe zin re Asa wa Yuda mang: mae
  • 10 tao" zaung: qhid: ra". – Yao: Yerusalem: mae byid xe: dazin tao" zaung mung: zug' gam: ra". Yao: phyid' wa Abashalung: yao:
  • 11 zo: Makha mang: ra". – Asa wa yao: phug' pho" kai: Davi ru: AsAng Mo"so: qhid' kheim: mae dang: main" khyo: zaui" pyang"
  • 12 ra". – Yaug zhang: myiqe: , yaug gai jham rere: , phug' pho" qe kaid' co' ra" sulho rere: mang: din" khug mae" sham" va: pye'
  • 13 ra". – Yao: phyid' Makha re: mashao lho" Ashera alho kaid' ru mung: yao: re jhaung zug: myiqe: mae" phoe' pye' mung: sulho jham re mhain" khyoe' pye' yang: Kedaron qid khaung: mae ngha" pye' byid' ra". –
  • 14 Ai qere: myhao: ra" bug gaung mae" pa" kug' jao: jham re maqab; pye'. Asa myid nhag' lam: kam" wa yao: daui: na: dabang: geim" AsAng Mo"so: qhid' kheim: gai shab:
  • 15 ra". – Yao: pho" kheim: ke' to" ru we' yao: re: jham tang" to: va" hhang , ngaui we' khug' azai: akho jham re AsAng Mo"so: pa" jhaung: yham tau lo" zaui: to" ra".
  • 16 Asa we' Israel jhaung zug: Basha wa yao: tao: pyaid abang" geim" gye jho" khain:
  • 17 ako". – Yuda jhaung zug: Asa jhao" khag' re: vao thug' maqo" kaid' shao: ga: Israel jhaung zug: Basha wa Yuda mang: khyo
  • 18 do, mung: Rama vomo" te" ra". – Alao" Asa wa AsAng: pa" jhaung: yham jo, nho" bain" we' jhaung zug' yham mae" bain" mae je: ra" hhang , ngaui alhab' re she: yu: mung: yao" jeim qe: lo, mae qhaug' byid' ra". Dam: Asa wa Damasku mae zaung: ra" Suri jhaung zug: Hezion yao: myid: Tabari- mon yao: zo: Benhadab jhao" yao: bam re
  • 19 nhao: ke' mung: , – ngo we' ni" gyo: mae re: , nga" pho" we' ni" pho" gyo: mae re: lozam" lokhug jo; ra". Ai mung: ngo nao re hhang , ngaui jhaung qhu" dai" ke' ra". Israel jhaung zug: Basha wa ngo mae" thug' lo" sho' nao yao: we' to" to" dao: so:
  • 20 phyo' pye' wa, ga: ta" ke' ra". – Benhadab wa Asa jhaung zug: dao: gyo: mung: yao" sin: thu zug: qere Israel vo khao: ngo" khyo nhao: ke' yang: yao: bam wa Ijon we' Dain: vomo" , Abelabedmakha mae" re Gena- sared we' Nabthali mang: damang" geim"
  • 21 phyo' lhaui" pye' ko" ra". – Basha ai: lau dao: the' gyo: lao" Rama vomo" mazhaug' pin" lo: Tirza vomo" mae lo" na: ra". –
  • 22 Alao" Asa jhaung zug: wa Yuda damang" geim" re amyin" dao: hau" nhao" ke' ra". Mang: byu dayaug lhao" maloe, alhab' bam Rama vomo" mae Basha kyaung" to" laug baui we' sag' thaung: yu mung: Asa jhaung zug: wa Benyamin: mug: mae Geba we' Mizapa vomo" tau: yhe' ra".
  • 23 Ca: xo' ca" shi" Asa jhaung zug' lo, mau" alhab' yao" ham: hung: , yao: kaid' mau" alhab' we' yao: te" to" vo jham: akhyo Yuda jhaung zug: mhomyi: paug' mae tung" to" ra". Yao: kao qi: va" thao khyid
  • 24 mae no boe" lo: ra". – Asa wa phug' pho" qe we' daga" yab pyo" lo" mung: phug' pho" Davi vomo" tau phug' pho" qe we' daga" nyhab' shaung: ke' ru qhug' ra". Yao: zo: Yehoshaphaid yao" atha" tao" zaung: ra".
  • 25 Yuda jhaung zug: Asa tao" zaung: ru shid' zin au: , Jerobom yao: zo: Nadab wa Israel mang: mae tao" zaung: qhid: ra". Yao: wa Israel mang: mae shid' zin zug:
  • 26 gam: ra". – Yao: wa AsAng Mo"so: qhid' kheim: magai: ra" mau" kaid' mung: yao: pho" akhyo we' Israel byu qe re qobo kaid'
  • 27 mau" khyo cao" lo" nhao: ra". – Iskha boe: mae" Ahiya yao: zo: Basha wa yao: re tau: lhain: ra". Basha wa Philisti mang: mae" Gibethon jo, qo tau yao: re se' pye' ra". Pe" mung: ga" re Nadab we' Israel byu qe alhab' bam: Gibethon re lhang" kham" to:
  • 28 ko" ra". – Asa tao" zaung: ru sam zin au: , Basha wa Nadab re se' pye' mung: tao"
  • 29 lhaid' tha" zaung: ra". – Yao: jhaung zug: boe" li" we' Jerobom yham byu alhab' re se' tam" pye' ra". Jerobom byu dayaug re lhao" kao madaui nhao . Ai: akhyo AsAng Mo"so: yang yao" byu Shilo: byu Ahiya re pin: to:
  • 30 va" we' dakhyo: boe" lo: ra". – Pe" mung: ga" re Yeroboam wa yao: yao: shaid' ra" qobo we' Israel damyu" geim" re nghung: nhao: ra" mathao: yang Israel AsAng Mo"so apyaid ato: AsAng Mo"so: nhag' yo" kheim re lhau: zhung" ra" mathao ngaid: .
  • 31 Xeim ca" shi" Nadab amyu" we' yao: kaid' mau" alhab' wa Israel jhaung zug: mhomyi: paug' tau tung" xam" to" ra". –
  • 32 Asa we' Basha jhaung zug: tao yao: nhae kao daui dabang" geim" gye boe" ra".
  • 33 Yuda jhaung zug: Asa tao" zaung: ru sam zin au:, Ahiya yao: zo: Basha wa Tirza vomo" tau Israel byu alhab' re zug' gam mung: tao" zaung: ra". Yao" tao" zaung
  • 34 zin na shid' xe: byid zin ngaid: . – Yao: wa AsAng Mo"so: qhid' kheim: magai: mau" kaid' mung: Jerobom cao" ra" gau: Israel qere shaid' nghung: nhao: gau: cao" lo" ra".
回到本卷目录 回到本版本目录 回到首页