1 Dam: Mo"so wa Israel qe re nhag' yo" na: au: satain: myo, byo, kaid' mung: Israel byu we' Yuda byu qe re nghe' qug: qu" nae"2 tau: Davi re zhain" ra". – Jhaung zug: wa byu kho nho" na: ru ngo qo" ba nae" tau: Dain: vo mae" Beyasheba vomo" joe" Israel mug: alhab' re su" lhang: lo" mung: byu qe re nghe' qug: qu" wa, ga: yao: mae na: ra"3 sin: thu mo" Yaba re mho: ra". – Yaba kam" wa jhaung zug: pho" re ni" Mo"so wa ni" byu qe re dayo nho" myo" je: nhao mung: nao jhaung zug: qo" the' myao sho' ngaid veshao: wo". Ai re nga" asang jhaung zug:4 pe" mung: ai o ngaui: na: ga: ta" ra". – Ai qere: jhaung zug' dao: kheim: Yaba we' zug: qe: dao: re qo" aung yang: Yaba we' zug: qe wa byu qere nghe' qug: qu" nae" tau: jhaung zug: mae" thug' lo" ko" ra". –5 Yodain: qid gau" de, mung: Gaid' lao: khaung: mae" Aro vomo" ba thug' shaid' Yaza vomo" joe" gyetab zhaug' to" ako". –6 Gilaid mang: , Tathihm-hoshi mang: ye joe" ako". Ai: thao Dan-yan mang: we' Sidon7 mang: khyo lhang: thug' lo mung: , – Turu gyetab we' Hivi vogaung: jham , Khanani vo jham lai: jao: co' yang: Yuda mang: qid bang: dau: Berasheba tau lo" kyab' ko"8 ra". – Ai re" khyo: yao: bam damang: dae geim" kam" lo" mung: lho" gug khye' yang shid' xe ba re Yerusalem: vomo" dam: joe" khe' lo: ako".9 Yaba wa jhaung zug: re byu japhin: paug' qhaug' byid: mung: shae , lhae ba: ci: ra" Israel qam: gai byu she' tid ngaid: . Yuda kaung qe wa ngo" tid ngaid: ra".10 Davi byu qe re bin: nghe' qu" thao nhag' lam: atha" qo" mung: Mo"so we" ngo kaid' ra" mau" gyai shaid' byaug va" ni" jeim pho" qobo re lhoe' ke' byid: la, . Ngo makhyang" mau" zao" kaid' venhaung11 ga: Mo"so jhao" mho' bain" ra". – Ne, seim Davi to" lao" Mo"so: dao: Davi lapa pho"12 Gaid' jhao" joe" li" mung: , – Davi jhao" ye ta" wa, . Mo"so ceru: ga: ta" ra" akhyo sam lam: ngo nao re ceim" shid' nae". Nao pe" ja" dae re khae: yu nae" daja: re khyin13 wa, ga: ta" ke' ra". – Ai mung: Gaid' Davi jhao" ye: mung: mang: din" khug mae sam zin lam: lam: bao" khug' qam" khyo" ke' nae" i". Mangaid: lao" gyevo qe khe' yang: lho" sam khye' nao phao: lae" qin" nae" i". Mangaid: lao" mang: din" khug sam ba lam: lam: no qam" mo" nhao: ke' nae" ru nao o: i". Ngo re nhao: ke' yaug re khoru: lo" zhao nae" pha: khyin: yu wa, ga: ye: ta"14 ra". – Alao" Davi wa ngo nhag' lam: gyai myo" na: kyi: . Mo"so: lo, mae lam: ngaid shao: . Yao" nhag' khyag' ru gyai qi" ra". Byu: lo, tau ngo majoe" shao: ga: lapa Gaid' re ta" ra".15 Ai: ba ne, seim mae" mung: dang: to" ba na thao" sho' Mo"so: yang Israel amyu" qe: dao no qam" mo" nhao: ke' ru mung: Dain: vomo" mae" ru Berasheba vomo"16 joe" byu nhaid' tug shid: ra". – Mug: logyo: Yerusalem: re phyo' pye' nae" ga: yao" lo, qang: yheim" ke' re Mo"so no dae ai: gu: mathao: yang nhag' lam: dam: yo: byaug mung: ga" va" ni" lo, dam: she: yu se, ga: byu qe re phyo' qeim" ra" mug: logyo: re mho: ra". Mo"so: mug: logyo: wa Yebuti byu Arona: zam jao: nhae mae thug' qhu"17 ra". – Byu qe re dae byid' ra" mug: logyo: re Davi myao lao" ngo shaid' va". Qobo zaui" shaid' va". Ce: yao jham wa pe" shaid' lhoe" va". Ni" lo, ngo we' nga" amyu" qe: dao mae za: joe" gyo" veshao: ga: Mo"so jhao" mho' bain" ra".18 Ai: ba re yao: Gaid' Davi jhao" li" lo mung: ye: wa, Yebuti byu Arona zam jao: mae Mo"so: tau: phain ye kaid' wa,19 ga: mho: ra". – Mo"so: mung dao: Gaid' nhaid' thoe khyo" mho: kyo" we' dakhyo:20 Davi ye" lo" ra". – Ana" jhaung zug: yao" sin: zo: ajham ataung we' li" lo: ru Arona the' myao lao" taung gaung thug' ye: mung: jhaung zug' qhid' kheim: gam" goe,21 zo" , – nga" asang jhaung zug: ni" jeim ngo na: khyo pe" mung: li" lo: ru nhe" ga: myid' re Davi wa byu qe: dao mae" no qam" mo" re yo nhao: pye' nae" tau: Mo"so jhao" ngaui" nae" phain zhaug' nug yang: ni" zam jao: vai: yu nae" ein: li" ru22 ngaid: ga: ta" ra". – Arona wa nga" asang jhaung zug: myid: ngaui: khyo: yu mung: ngaui" wa, . Phaid' ngaui" nae" nung: jham re: na: ra". Thao: kaid' nae" gaug be; ra" zai jham we' nung: do: jham re: jo; ra". –23 Arona wa jo, mae" jo, nga" asang jhaung zug: re qhaug' byid' ru mung: ni" AsAng Mo"so wa ni" xeim: khae: yu veshao: wo"24 ga: Davi re ta" ra". – Jhaung zug: re: ai: khyo: ngo mayu nae". Aphug' byid: yang: za: avai: yu nae". Yham sang: ngaui magain re wa nga" AsAng Mo"so re phaid' ngaui" ra" xeim: ngo mangaui" nae" ga: Arona re ta" ra". Ai mung: Davi ngaui Shekela ngo" xe byid: mung: ai: gaug nao: zam jao: we'25 nung: jham re vai: yu: ra". – Ai: tau Mo"so: tau: phain re zhaug' mung: phaid' ngaui" xeim: , zam" khug xeim: re ngaui" byid' ra". Mo"so: yang re: Israel mang: tau: mae" jhaung: mho' ra" dao: kheim: tae" gyo: byid: mung: no qam" dae re myain yo: pye' byid' ra".