1 Ai: thao Davi ta sam zin lam: lam: bao" khug' mo" gyo" mung: Davi Mo"so re myid' qu" re Mo"so: yang Gibeon byu qe re se' ra" Sholu yang byu: sa: sheim: pye' ra" yao" amyu" mathao boe" ru ngaid: ga: ta" ra". –2 Gibeon byu qe wa Israel amyu" mangaid:. Dang: ra" Amori' amyu" qe ngaid: ako". Israel qe yao: bam re dao: thang: jho" to" to: veko" qere: Sholu wa Israel we' Yuda kaung akyu" re qu" yang: yao: bam re se' tam" pye'3 nae" seim" ra". – Ai mung: jhaung zug: wa Gibeon byu qe re khai mung: naonhaung" tau: khoru: kaid' byid: ca" nae". Mo"so: jao khae naonhaung" min byid: nae" tau: pe" yang qobo khyaid' re gai nae" ga: myid'4 ra". – Gibeon byu qe wa Sholu we' yao" amyu" jham mae" ngaui , hhang ma mho'. Israel qe re se' nae" re: ngonhaung" akhang" maqo" ga: ta" ako". Jhaung zug: pho" kam" wa naonhaung" o: khyo: ngo kaid' nae" ga:5 ta" ra". – Ai ru: mung: yao: bam wa jhaung zug: pho" re ngonhaung" re yhin" mung: Israel mang: din" khug mae maqo" na sho' ngonhaung" re mho" pye' nae" seim" ra" yaug; yao: zo: nhaid' yaug re ngonhaung"6 lo, mae qhaug' byid: la, . – Mo"so khyin: yu: Sholu na: ra" Gibeon vo tau yao: bam re ngonhaung" Mo"so: tau: cui" lhao" to: nae" ga: ta" ako". Jhaung zug: wa ngo qhaug' byid: nae" ga: mho: ra".7 Ngaid qere: Sholu yao: zo: Yonatain: we' yao: tao: gyo: mae Mo"so: mang mae nhang" to: va" ru jo; ra" mathao jhaung zug: wa Sholu: zo: Yonatain: aung gyo"8 Mephiboshed' re o: byid: ra". – Ai ru: mung: jhaung zug: wa Aia yao: zo: Rizpa myiqe: khau: ra" Sholu: zo: Amonia we' Mephiboshed' tao re re: , Sholu: myiqe: zo: Mikhala kham: mae" Meholati byu Bazile yao: zo: Adrola khau: ra" yaug gai zo: ngo"9 yaug re re: yu yang: – Gibeon byu qe: lo, khyo qhaug' byid: ko" ra". Yao: bam ai: bug gaung dao mae Mo"so: qhid' kheim: yao: bam re lao" cui" pye' va" ru mung: ai: byu nhaid' yaug geim" dalhang: dae shid: pye' ko" ra". Yao: bam re se' ru wa mug' yo" gaug yaid; qhid: ra" ba ngaid: .10 Aia yao: zo: Rizpa wa jid: mo" mai pho' yu mung: laug zhaug' adao myhung" to: yang: gaug yaid: qhid: ra" ba na mae" ai: mao gaung adao mug: qu: jhug' ra" yo, joe" sho' na" re ngho' yang mazo: , myi" re zoqhid ma li" qo" bin: sho' qu" caung:11 na: ra". – Sholu; naung cao myi: Aia yao: zo: Rizpa kaid' ra" mau" re Davi the' gyo:12 lao" , – Philisti byu qe Gilaboa bug gaung mae Sholu re se' yang: yao" mao gaung re Bedshain jo, qo tau lhao" to" ru mae" ye khug' yu: ra". Gilaid mug: mae" Yabesha byu qe jhao" ye: mung: Sholu: shoqug: we' yao: zo: Yonatain: shoqug: yu: lo yang: –13 ai: lhao" to" byu qe: shoqug: jham re re: khyui: zhag' yu mung: Benyamin: mug: Zela vo Sholu: yao: pho" Kisha lab qo tau14 shaung: nyhab' ke' ra". – Jhaung zug: pin: to" we' dakhyo: bin: zaui: so: thao mang: din" tau jhaung: mho' dao: Mo"so dam: tae" gyo: byid' ra".15 Philisti byu qe Israel byu qe re gye dam: zin" lo gemung: Davi we' yao" sin: zo: qe yao: bam re lham: se' ko" ra". Davi kam"16 wa pyaung" byaug; ava". – Rephim amyu" Ishbi-benob yang gyid: Shekela sam joe: la" ra" lhae ci mung: gye bau: asag' ve; shaung: ci yang: Davi re se' nae" ga: seim" ra". –17 Zerua yao: zo: Abishai bao" mung: Philisti byu re se' pye' ra". Ai mae" Davi byu qe: yang nao Israel myi: dam macaid' byaug shao: thao re khonhae" re: ngonhaung" we' daga" gye se' jao: gai: li" lo: nae" mangaid: ga: kheim: ke' mung: kham" to: ko" ra".18 Ai: thao Goba Philisti byu qe we' dam: jho" se' au: re: Husha byu Tibekhe yang19 Rephim: byu Sapa re se' pye' ra". – Thao: lhang Goba jo, qo mae Philisti byu qe re gye khe' ko" ra". Ai au: Belehem: vo mae" Yarera zo: Elahanan wa qo, mo" qhi" bo: ra" lhae gaung ci su Gilaid byu Golied yao:20 nhaung: Lakhimi re se' pye' ra". – Thao dalhang Gata vo mae gye jho" zin: ko" au: gaung khyao myhao mung: lo, dashaid' lo, nyhug' khyaug' nyhug' nyhug' , khyid dashaid' tau khyaug' nyhug' nyhug' qhain" re shid' xe: byid nyhug' de; ra" Rapha: byu21 dayaug wa , – Israel qe re gyai ga: zhaug' kyid' na: au: Davi yao: mao: Shima: yao: zo: Yonatain: yang ai: yaug re se' pye' ra". –22 Ai: byu byid yaug wa Gata vomo" tau na: ra" Rapha lau: gai dayaug; yao: zo: ngaid mung: Davi we' yao" sin: zo: qe: lo, mae shid qhug' ako".