1 Ai: au: Benyamin: kaung Bikhri zo: Sheba mang: ra" azhaug' amhe' byu dayaug na: ra". Ai: yaug wa labo" maid yang: Israel byu qe we" nyhao: nhaung" Davi we' dajhid' lhao" matin: . Yese" yao: zo: mae pe" jao khae re: maqo". Israel byu qe we" khag' re: khag' yao" zaung khyo lo"2 ge, ga: mho: ra". – Ai mung: byu qe Davi mae" thug' mung: Bikhri zo: Sheba' thao bo cao: lo" byaug; ako". Yuda kaung kam" wa Yodain: gyaung: mae" Yerusalem: joe" jhaung zug: jhao" bocao ko" ra".3 Davi jhaung zug: Yerusalem: kho" vang lo" joe" lao" kho" vang yham lhaug' nae" tau: nha co' ra" naung cao myiqe: daxe zo: re yham dalam: mae lhaung" to: mung: khau: ra". Ai qe re: yao: bam jhao" ma zam" lo: . Yao: bam shid: ba na joe" sho' lhaung" to: qhug' mung: cug' mo" ru: na ko"ra".4 Jhaung zug: re: Amasa re Yuda kaung qe alhab' khai: zhag' yu mung: sam ba: gyo: re yao: bam we' daga" nao ngo jhao"5 li" lo ge, ga: pyang: ke' ra". – Amasa re: ye" lo" mung: Yuda byu qe re khai: zhag' na: gu: mae jho" dang: to" ba na zai" lhai: pye'6 ra". – Davi wa Abashalung: zaui: so" ra" tho' Bakhri yao: zo: Sheba' kaid' ru je: xo: li" nae". Ni" asang: jeim qe re jhui: mung: ai: yaug re cao" wa, . Ai ru: mangaid: re yao: vo kham" gang" ra" vo khyo vao lo" lao" ngon- haung" lo, mae" loe; lo" nae" ga: Abishai re7 mho: ra". – Ai ru: mung: Abishai wa Yaba byu qe we' Khariti byu , Pelethi byu qam: bo: ra" sulhe: alhab' bam: we' daga" Bikhri zo: Sheba' re cao" khe' nae" tau: Yerusa-8 lem: vo mae" thug' lo" ko" ra". – Gibeon vomo" tau mae" laug qi: mo" lo" joe" ko" au: Amasa yao: bam re li" tug: yu: ra". Yaba yao" gye bau: ve, mung: phyid' dam: phyid' cui: tau yao" shae byao laui: ci: ra". Ye" lo" na: re shae yao: za: shoe: gyo" lo" ra". –9 Yaba wa Amasa re mao: we" qao" na: i" ga: ta" zo" bobaug baug; mhug' mung: lo, yo lo; yang Amasa nhaid' maui: myo, byid' ra". –10 Lo, vai: lo; yang zhab' ci: shae re Amasa maso" beim" mathao yao" vae dug; thug' kyao" ke' mung: au thaid' myid gaung khyo lhang" ke' ra". Madam: thug' kyao" paug' lo: qere: Amasa shid: byaug va". Yaba we' Abishai nhae kam" wa Bikhri zo: Sheba' re11 cao" khe' ye" lo" ako". – Amasa nhae mae Yaba: daui mung byu dayaug ye; jo, mung: bocao mo, re Yaba we' Davi thao de; ra"12 mo, wa Yaba jhao" bocao ge, . – Amasa kam" wa hau" mo" khyo gaung: tau yao" sa: tham: mae lhau" na: ra". Khyo mae li" lo mo, alhab' ai: tau ye; byaung" na ko" ru re Yaba: byu dayaug the' myao lao" Amasa mao gaung re getau vo; qhui" pye' mung:13 mai pho' yang nghoe' to" ra". – Ai ru: khyo dang mae" vo; qhui" pye' lao" za: byu alhab' bam: Yaba we' daga" Bikhri zo: Sheba' thao khe' ye" lo" ko" ra".14 Yaba wa Bedmakha mug: , Abela vo joe" sho' Israel mug: damang" geim" khyo kho' ye" lo" mung: Beria byu alhab' bam: re: zang" qham yang: Yaba thao bocao: ako".15 Sheba' khug; na: ra" Bedmakha mug: Abela vomo" re lhang" kham" to: mung: taung gaung mae" vokham" we' tau" te' mae gyab lhao: dau" bam" ko" ra". Yaba we' yao" byu alhab' bam: wa vokham"16 phyo' nae" tau: dau" phaid' ko" ra". – Ai au: juyi bo: ra" myiqe: dayaug vo khug mae" hug' ta" ke' ru wa tae" gyo: ge, tae" gyo: ge, . Ngo Yaba we' dao: qo" jho" jhau nae" tau: Yaba re ce khyo qui" te' li" re: ga"17 ein: ta" kyo: ge, ga: mho: ra". – Yaba qui" ye" qu" re ai: myiqe: wa nao Yaba ngaid: i" ga: myid' re ngo ngaid: ga: dam: ta" ra". Ai: myiqe: wa ni" jeim myhi" dao: tae" gyo: byid: la, ga: ta" ra". Yaba re: tae" gyo:18 nae" ga: dam: tau" re , – myiqe: wa gai gai: yao: Abela vo tau qham phaung: yu mung: mau" qo" pin" geshao: ga: genhae"19 re: ta" re: lhaung" ta" ako". – Ngo wa Israel amyu" mae yaug yo: khyo cao" yang: dao: so: zaung: ra" byu dayaug ngaid: . Nao wa Israel vo Israel yao: myhi" dayaug re phyo' pye' nae" seim" ava". Mo"so: jao khae pe" mung: myug; pye' nug: i" ga: ta" ra". –20 Yaba wa myug; pye' ga" ru we' phyo' pye' ga" ru ngo we' va: lin shao: . Dang za: va:21 lin shao: . – Ai ru: mangaid: . Ephrim: bam mug: byu Bikhri zo: Sheba mang: ra" yaug jhaung zug: Davi re tau: lhain" ava". Ai: yaug re byid: la, . Alao" ai: myiqe: wa yao" au: lam: re ni" qhid' kheim: tau pye' khyo"22 byid: nae" ga: mho: ra". – Alao" ai: myiqe: wa yao" juyi we' dakhyo: vobyu qe jhao" lo" mung: yao: bam wa Bikhri zo: Sheba' au: lam: phyid' ci yang: Yaba re pye' khyo" byid' ako". Alao" za: yao: labo" maid mung: byu qe re: ai: vo mae" yao: yao" yham khyo lo" byaug; ako". Yaba re: Yerusalem: vomo" jhaung zug: jhao" dam: lo: ra".23 Yaba wa Israel gyetab mo" alhab' re ug; ra" zug: jhaung ngaid: . Yohorida yao: zo: Benaia wa Kheriti byu we' Pelethi byu qe24 re ug su ngaid: . – Adoniram wa khang: khyui zug: jhaung ngaid: . Ahilu yao: zo: Yohoshaphaid' wa mhomyi: zam: ngaid: . –25 Sheva wa tung" su.26 Zadug' we' Abyata wa khin jaung mau" vin ngaid: . Yari vobyu Ira wa Davi kho" vang ug su ngaid: .