1 Davi wa yao: re manug mo, alhab' we' Sholu: lo, mae" Mo"so: yang yao: re khyaid' yu: to" au: re Mo"so jhao" nghaui" caung: thoe ce yang nghaui" caung" ra".2 Mo"so wa nga" laung: mo" baui , nga" vokham" , ngo re khyaid' yu: AsAng ngaid: .3 Nga" Mo"so , nga" laug aug' yao: mae ngo khug; na: . Nga" go lung: , ngo re khyaid' yu: khyug nga" gye byu gai" ngo khug jao: , nga" khyaid' yu AsAng ngo re pyam" yhin" jao: mae" khyaid' yu: ava".4 Caung: khin" main" ra" Mo"so jhao" ngo mho' mung: gyevo: lo, mae" khyaid' yu: ru qhug' va".5 Shid no bang: lhung" ngo re lhang" kham" lo mung: phyo' tai: lo" moe bug; dang" yang ngo din: byaug; .6 Movo: mug: taui" yang ngo re kham" to: mung: shid zug: lha" thaung: to" mae ngo qe" jo, va".7 Ai ru: ngo nhag' ngai: na: au: re Mo"so jhao" hug' yao: ke' va". Zag: hug' thoe re yao" pa" jhaung: yham mae" gyo: byid: mung: ngo mho' yao thoe yao" no: khug kyao" vao lo" ra".8 Ai lao" yao" nhag' yo" kheim: mathao: yang myid gaung nain" lab; li" mung: mug: gaung: apain jham nain" na: ra".9 Yao" nho khyo" myi: khug' thug' mung: nhaid' khug mae" re: nga" na: ra" mathao myigyoe: zu" zu" ru de; na: ra".10 Mug: gaung: gye re nyham: khyo" yu mung: gyo" lo: ra". Yao" khyid agyid' mae11 thau: no; mug: caid' jo; ra". – Kherubim: tau jui: yang: dao" ra". La daung vho' adao mae thug' qhu" ra".12 Tang: no, kyid ngaid: mug: caid' tang: mung: ra" qid: yang mug: gaung: jham phyu thaui: wa yao: re lhang" kham" to" ra".13 Yao" qhid' kheim: mae" bao qhi: bag bao tau fa: myi: nga" na: ra".14 Mo"so mug: gaung mae" mug: dam: dam" myhang" ke' mung: myhao: thao" Mo"so: yang thoe mo" thaid' ke' ra".15 Myo: khe' bag; ke' mung: gyevo re myi" sin" pye' ra". Lhe' caid' vhag' qhu" ke' mung: gao" phao: seim" pye' veko".16 Mo"so qeim: ke' ru we' yao" tau: mae" so' she: ke' ra" mathao qid mo" dae khyo jham thug' lo mung: myid gaung aqao: apain jham myao: thug' li" ra".17 Mug: tho' khyo" lo, re yheim" ke' mung: qid mo" lao mae" ngo re khyi: yu: ava".18 Ngo re gyid' ra" mo, , ngo magai: tho' aung sho' qam: qi" ra" gyevo: lo, mae" ngo re khyaid' yu va".19 Ngo qug: khai: phau" ra" ba ngo re kham" kyo" to: qe re: Mo"so kam" wa nga" khug ngha jao: boe" byid' ra".20 Yao: ngo re dae: ra" jao: mae she: nha: to: mung: ngo re ngaui: ra" mathao khyaid' lhoe' ke' va".21 Ngo din: main" we' dakhyo: Mo"so ngo re akyu" byid: mung: nga" lo, shao gyang" ra" ru: yang tug' byid' ra".22 Pe" mung: ga" re ngo re: Mo"so: khyo cao" na mung: nga" Mo"so re shaid' pye'23 va" ru mangaid: . – Yao: mho: to" khug mae ngo su" na mung: yao: ta" to" ru mae" manghung: .24 Yao" qhid' kheim: mae dang main: mung: makhyang" mau" jao" lha" na: .25 Ai ru: mung: Mo"so nga" dang main" ru we' yao" qhid' kheim: tau ngo shao lho" na: ra" mathao ngo re jeju tug' byid' ra".26 Nhag' myain: ba su re nhag' myain" ra" myid , nhag' dag su re nhag' dag; myid27 shao lho" su re shao lho" myid , nhag' lam: kaui su re mazhaung" ra" myid nao qhu" byid' ava".28 Nyham: khyo" mo, re AsAng khyaid' yu mung: ngaid beim: mo, re kam" wa khyoe' pye' nae" ga: qu" xam" to" ra".29 Mo"so we" nao wa nga" myi: kaug' ngaid: . Mo"so wa nga" caid' no, re bao byid' ava".30 Ngo AsAng re pao mung: gyetab qo" phyo' pye' va". Nga" Mo"so re khug yang: vokham" qo" lhoe" pye' va".31 Mo"so gin nyhang" ra" ru jab byang" ra". Mo"so: dao: so: wa dang: ra". Khug ngha: ra" byu alhab' bam: gug: gam jao: poe" byid' ra".32 Mo"so mae" je yang: getau pe" ru" Mo"so na shi". Ngonhaung" Mo"so mae" jain" yang: pe" ru" laug aug' qi: jo, shi".33 Ai: Mo"so wa ngonhaung" qam: o: , ngonhaung" phung bao ngaid mung: ngo su" ye" khyo dang din: jao byid' ra".34 Nga" khyid re xe' khyid ru: phyaid nhao mung: myhao: ra" jo, qo tau ngo re to" to" ra".35 Nga" lo, mae gye mau" mho" byid: mung: nga" lo, lam" yang gyid: la: qo" thaung: ra".36 Ni" khyaid' yu: go lung: ngo re byid' ava". Ni" zang: kham: ra" khyo" yang ngo re tau: yhe' to" ra".37 Ngo su" ye" khyo dang qu" kin byid: mung: nga" khyid tha" thu: lang: nae" mangaid: .38 Gyevo re ngo qo" khe' pye' mung: phyo' pye' va". Yao: bam re maqo" sham" jhaid' pye' pye' wa ngo dam: tug' lo nae" mangaid: .39 Yao: bam re nga" khuvo: gyid' tau lhang" to: mung: maqo" to" lo sho' khe' pye' va".40 Pe" mung: ga" re nao ngo re gye qo" se' nae" qam: we' phyid' cui: cui: byid: mung: ngo we' mazhaung: mo, nga" agyid' tau lang" de; bam: ako".41 Ngo re gyid' mo; gyevo qe: lang zang: ngo re qhaug' mung: qo" phyo' pye' nae" akhang" byid' ra".42 Yao: bam hug' yao ko" au: khyaid' yu nae" su mana. Mo"so jhao" zag: hug' ko" qere: matau: byid: .43 Alao" ngo wa yao: bam re myid phaui: re re" ru: nhug nhug bin: mhain" thao khyo dang tau boe, said re ru: nao: zab nae" tau: phyu" to: va".44 Nga" byu qe: yug: jhin mae" khyaid' yu ra". Su: byumyu" ade, ngo re boe" nhao mung: ngo maba: byumyu" ngo mae jeim boe" nhao: pye' ra".45 Labug; byu qe ngo re mho' bain: mung: nga" akhyo lhau" the' gyo" dazab mae yao: nga" dao: gyo" aveko".46 Labug byu qe sham: byaug mung: yao: bam khug; na: jao: mae" ko, ko, nin" zo" thug' lo: ako".47 Mo"so wa daui: na: ru mung: nga" laug aug' tau ngaui lho" na shao: wo". Ngo re khyaid' yu: laug aug' ngaid: . Mo"so wa qi" qhang: na shao: wo".48 Nga" thao khyo" loge, phaug' byid: mung: nga" agyid' tau labug: amyu" re khyo" na: to" Mo"so ngaid: .49 Gyevo qe: lo, mae" ngo re thaid' yu: ra". Ngo re mho" phyo' mo; adao mae nao ngo re tau: yhe' to: mung: lhaid' zo: mo; lo, mae" re: khyaid' yu: ra".50 Ai ru: mung: Mo"so we" labug; amyu" qe: tau: mae ngo nao re caung: nae". Ni" mang kheim: re caung: nghaui" na nae" wo".51 Mo"so wa yao: jaung: to" jhaung zug: re khyaid' yu: mau" aqi: nhao byid: mung: yao" xau gyain: qhug' Davi we' yao" akaung qe re apyaid ato yao" nhag' myain" jeju aqhu" byid' na veshao: wo".