1 Jhaung zug: Abashalung: mathao: yang ngug; qeim" na: ga: Yaba re zhao: kyo"2 ako". – Ai: ba aung myaug; khyo wa byu alhab' bam: khug mae nhag' kaug' jao: boe" byaug; ra". Jhaung zug: pho" yao: zo" mathao nhag' kaug' na: ru byu qe ai: ba3 the' gyo" ako". – Gye jao: mae" phao: lo mo, qho' beim: mung: khug' vho' na: qin" ru: yao: bam ai: myi vo khug khyo sab za:4 vho' yang: vao lo: ako". – Jhaung zug: re: myo, khung: nghoe' pye' mung: nga" zo: Abashalung: we" , Abashalung: we" nga" zo: , nga" zo: ga: zag; hug' ngug; na: ra". –5 Yaba jhaung zug: jhao" vao ye: mung: nao asang: kao we' ni" zo: myiqe: yaug gai , ni" myi: au: xaug' myiqe: jham we' naung cao myiqe: qe: kao re khyaid' yu: ra" ngon- haung" ni" jeim qe alhab' re ana" ba qho' phau: nhao: ava".6 Gyevo re jhid' de, mung: ba nam qe re gyid' ru ngaid: ava". Ni" ade, qe we' sin: zo: qe re pe" dao" mangae" ru nao ana" ba de: de: qhu" ava". Abashalung: daui: na mung: ni" sin: zo: qe shid: byaug; re lam: nao gyai ngaui nae" ngaid nhaung: ru ana" ba de:7 de: qhu" ava". – Ana" re: to" wa, . Thug' ye: mung: ni" sin: zo: qe re myain myhain" dao: jhau wa, . Ai ru: mangaid: re ana" myi nao mae byu dayaug re: mabo:na lo: genae" ein: Mo"so: mang lao: yang: ngo nhang" na: . Ai: mau" lam: nao zoqae: ta mae" ana" joe" sho' phau: zo" ra" mau" tho' je: qug' lo8 nae" ga: ta" peim" ra". – Alao" za: jhaung zug: pho" to" yang: vo kham: dung: mae zaung: ra". Jhaung zug: vo kham: dung: lo: zaung: ru byu alhab' bam: the' gyo" lo" gelao" yao: jhao" te' li" lo: ako". Israel byu qe kam" wa yao: bam: jo, qo khyo phao: lo" byaug veko".9 Israel kaung qe alhab' bam: jhaung zug: pho" ngonhaung" re gyevo alhab' we' Philisti byu qe: lo, mae" khyaid' yu: to: va". Ana" yao: Abashalung: mathao: yang za: mang: din" khug mae" phao: lae" qin"10 ra". – Ngonhaung" xau gyain: mung: tau: yhe' to" Abashalung: re: gye poe tau shid va". Ana" re: jhaung zug: re ye jhui" tug: yu nae" maqham lo: pe" mung: na: bam ko"11 ga: yao: cao: jho" naung" na: ako". – Davi jhaung zug: khyo" khin jaung Zadug' we' Abyata jhao" byu nhao: ke' mung: Yuda ade, qe jhao" ye: yang: ceru: ein: ta" ge, . Jhaung zug: re kho" vang khug dam: vhao" nae" akhyo Israel byu alhab' jho" qham: ru jhaung zug: the' gyo" ava". Naonhaung"12 pe" ein: thao gyo" na ko". – Naonhaung" nga" mao: nhaung:. Nga" shoqug: , nga" sho: ngaid: ru pe" mung: jhaung zug: re dam: jhui" yu nae" thao gyo" na ko" i" ga:13 re: – Amasa re re: nao nga" shoqug: , nga" sho: ngaid: mangaid: i". Nao re nga" qhid' kheim: mae Yaba gaung tha" khyao za: zug: jhaung ma poe" ngaid: re wa ai tho' je yang: Mo"so ngo re kaid' shao: ga: ta" ra" ein: re:14 ta" ge, ga: pin: ke' ra". – Ai ru: Yuda kaung alhab' re dalhang: dae yao: bam: nhag' myid yao: jhao" lao" lhang: yu mung: yao: bam re: nao asang: jeim qe alhab' we' daga" nao yao: dam: lo ri: ga: jhaung zug: re ye:15 jhui: nae" nhao: ke' ako". – Alao" jhaung zug: dam: lo mung: Yodain: gyaung: lo joe" ra". Yuda kaung qe wa jhaung zug: re ye" tug: yu mung: Yodain: gyaung: jhui" kau" te' yu nae" ga: Giligala jo, qo khyo li" lo ko" ra".16 Benyamin: kaung ngaid: ra" Bahurim vobyu Geya yao: zo: Shimi wa Yuda kaung qe we' daga" Davi jhaung zug: re tug: yu17 nae" tau: hin hin zo: cao" li" ra". – Yao: we' daga" Benyamin: kaung dataung , Sholu: jeim Ziba we' yao: zo: qe daxe: ngo" yaug , jeim qe byu lam: shid' xe zo: we' li" lo mung: jhaung zug' qhid' kheim: Yodain:18 gyaung: gau" de; ako". – Jhaung zug' yham byu qe kau" te' nae" yao: o: khyo: kaid' nae" tau: pug dalam: kau: byid' ako". Yodain: gyaung: bin: gau" de, lao" Gera yao: zo: Shimi wa jhaung zug' qhid' kheim: goe; pa"19 mung: , – nga" asang ngo re qobo dabyid: wa, . Nao jhaung zug: Yerusalem: vo mae" thug' lo" ra" ba re ni" jeim nao re zaui" shaid' qobo re daxam" to: byid: . Aung mae20 dake' to: byid: . – Ni" jeim ngo shaid' ru yao: ngaid: ru ba: ra". Ai qere: Yoseb' kaung alhab' qe: qhid' kheim: mae nao jhaung zug: re tug: yu nae" tau: ni" jeim ngo ana" ba thug' li" ru ngaid: ga: mho' bain" ra". –21 Ai qere: Zerua yao: zo: Abishai wa Mo"so: kheim: so' khyo" xau gyain: qhug' yaug re nhang" pye' va" mathao Shimi shid ca" nae"22 mangaid: i" ga: myid' ra". – Davi kam" wa Zerua zo: qe we" ana" ba naonhaung" ngo re gye kaid' nae" ngo we' pe" tin: ko". Ana" ba Israel dayaug yaug shid: re agai nae" i". Ana" ba ngo Israel jhaung zug: ngaid: na: ru ngo ba: na: mangaid: i" ga: qeim:23 ke' yang: , – Shimi re re: nao shid nae" mangaid: ga: jham tang" pye' ra".24 Sholu, yao: zo: Mephiboshed' re: jhaung zug: re tug nae" ga: li" lo: ra". Jhaung zug: thug' lo" ra" ba mae" yaug yo za: dam: lhang" lo: ba joe" sho' yao: wa khyid macid' , nhaid' maui: maqaug , mai25 bau: re: ma cid' lo: na: lo va". – Jhaung zug: re tug nae" tau: Yerusalem: khyo joe" li" au: jhaung zug: wa Mephiboshed' ngo we' daga" pe" mung: mabo: cao ga: myid'26 re , – yao: wa jhaung zug: we" ni" jeim pho" khyid qeim: ra" mathao ni" thao cao" nae" ein: myao: do: nyhang" seim" nae" yaung: na: re nga" jeim: yang mhug' pyag'27 pye' ra". – Nao asang jhaung zug: jhao" mae ni" jeim re ju" phyo' qhug' va". Jhaung zug: nao wa Mo"so: mug: logyo: ru: ngaid:28 ra". Nao o: khyo: kaid' la, . – Nga" akaung qe alhab' nao jhaung zug' qhid' kheim: mae su shid ru: ngaid ko" qere: , zo: gai" dao mae zo" ra" mo, we' daga" ni" jeim re jo, qo qhui" byid' ava". Ai ru: mung: jhaung zug: jhao" ngo nyung nae" akhyo pe" jo, shi" ga:29 ta" ra". – Jhaung zug: pho" kam" wa ni" mau" zo" pe" ta" ca" shi". Nao we' Ziba ai: myid gaung jho" gae ca" nae" khyo ngo ta"30 sho' to: va" ga: mho: ra". – Mephiboshed' re: jhaung zug: kho" vang khyo yaug yo za: dam: qo" lhang" lo va" mathao yao: alhab' yu: pye' re lao" gai: ra" ga: mho: ra".31 Gilaid' mang: byu Bazile re: Yoge- lim vomo" mae" li" mung: jhaung zug: re Yodain: gyaung: thoe te' dai" ke' nae" tau:32 yao: we' daga" gau" lo" ra". – Bazile wa kao she' xe byang" mung: mao: va" yaug ngaid:. Jhaung zug: pho" Mahanim mae gyetab to" ra" da bang" gu: jhaung zug: re caung da" ra". Yao: wa ham: hung: qi" na gai su33 dayaug ngaid:. – Jhaung zug: pho" wa ngo jhao" bo cao la, . Yerusalem: vomo" mae nao re ngo khau nae" ga: Bazile re mho:34 ra". – Bazile wa nao jhaung zug: pho" we' daga" Yerusalem: lo" bo na nae" ru nga" kao35 khonho" ba: dang lo: nae". – Ana" ba nga" kao she' xe dau va". Gai magai re ngo qo" ba: kho' khaui: lo: nae" i". Ni" jeim ngo zo: vae myho' , mamyho' qo" ba lo: nae" la, . Zomyi: zolau: qe: nghaui" thoe qo" tho' ba: gyo: , the' gyo: lo: nae" la, . Ai ru: mung: ni" jeim nao jhaung zug: re pe" ein: ba: nhaung"36 nhao lo: nae". – Ni" jeim ngo Yodain: lao thoe te' nao jhaung zug: pho" re dadain: zo: bo cao" dai" ke' nae". Ce nho" qi" ra" jhaung: qhu" re jhaung zug: pe" ein: byid:37 nae" i". – Ni" jeim pho" nga" co' phyid' jao: myhi" pho" lab qo yae tau shid nae" akhang" kam" byid: la, . Ai qere: ni" jeim Khimham: bo: ra". Nao jhaung zug: we' daga" yao: bo cao shao:. Nao o: khyo: yao: re yhung: wa,38 ga: mho: ra". – Jhaung zug: pho" wa ngaid va" Khimham ngo we' daga" lo" zai ngaid:. Nao o: khyo: yao: re ngo kaid' byid: zai va". Nao mho' mae: mho' re: ni" tau: ngo39 kaid' byid: zai ngaid: ga: mho: ra". – Byu alhab' bam: Yodain: gyaung: gau" de, ko" ra". Jhaung zug: re: yao" gaung yao: gau" de, mung: Bazile re bobaug baug zo" yao: re min byid' ke' ra". Yao: re: yao: na jao: vo40 khyo dam: lo" byaug: ra". – Jhaung zug: wa Giligala vo khyo joe" mung: Khimham: re: yao" thao bocao: ra". Yuda kaung alhab' we' Israel amyu" agaung: dano" za: jhaung zug: pho" re li" tug; jhui: ko" ra".41 Israel byu qe alhab' jhaung zug: jhao" li" mung: ngonhaung" mao: nhaung: Yuda kaung wa nao re khug' yu mung: ni" kho" vang yham byu , sin: zo: qe alhab' re Yodain: gyaung: li" kau" te' yu: ru wa pe" mung: ngaid: ga: jhaung zug: re ta" ako". –42 Yuda kaung qe wa jhaung zug: wa ngon- haung" mao: nhaung: akaung ngaid: ra" mathao ngaid: . Ce: mau" mae naonhaung" pe" mung: nhag' yo: ko". Jhaung zug' zao: kho ngonhaung" zo" i". Ngonhaung" re jhaung qhu" daja: ja: byid' i" ga: Israel qe re43 dam: phaug' ta" ako". – Dam: Israel amyu" qe Yuda kaung re ngonhaung" wa xe bam dabam jhaung zug: we' tin" ra". Davi we' naonhaung" te' ra" tho' ngonhaung" je: tin" ra". Ai ru: ngaid: re wa ngonhaung" jhaung zug: jhui" yu: ru mae ngonhaung" we' shi" maqham lo: ngonhaung" re mabo: lheim" yu: ra" khyo" pe" mung: kaid' ko" ga: dam: ta" ko" ra". Dam: Yuda kaung qe ta" ra" dao: lam: Israel amyu" qe: dao: tho' je: gang" tang: ra".