1 Ce wa Davi lo" thao" pin co' ra" dao: ngaid: . Yaku' Mo"so: akhang" khyo" xau gyain: kham mung: phung qi" ra" yaug , Israel amyu" mae no gyo: yo taung" ba: caung: su Yese" yao: zo: Davi caung: dao: ein nae" ru wa .2 Mo"so: Solo ngo mae ta" na: ra". Yao" mung dao: nga" sho tau te' to" ra".3 Israel Mo"so wa Israel laug aug' ngo re ceru: ga: mho: ra". Byu qe re ug: gam: ra" yaug wa dang main: ra" khyo" khang" mung: Mo"so re gyaug phug' zo" ug ca".4 Mug: phung: thao re bo" bao tau , myid mae nyug lao qam" vho' taid' ra" mhin: re yhaug' ke' ru: , mug: madab: ne, seim re" ba thug' so' bag bao pao" ke' ru: ngaid ca" nae".5 Nga" akaung amyu" qe wa Mo"so: qhid' kheim: mae ceru: tang: jo; mangaid: i". Apyaid ato: khang" dao: yao: ngo we' to" to: byid: mung: ai: khang" dao: dalhang: dae maboe" dang: li" qere: , ngo re khyaid' yu: ra" akhyo nga" qam: qo" jao: boe" byid' ra".6 Azhaug' amhe' byu qe kam" wa lo; yang magai: zao" tin" ra" , va: pye' qhug' zau: gae ru: boe" genae".7 Ai re va: pye' yaug wa jo, to' bau: we' geim lhae re ci mung: ai: zau: gae yaug; ra" mae yao: jhaid' za: ngha" pye' ru qhug' nae" ngaid: ga: mho: ra".8 Davi mau" vin: ra" sulhe: qe: mang jham ein nae" ru wa Takhamoni akaung Yosheb-bashaebed wa zug: jhaung ngaid: . Ai: yaug wa Ezani byu Adino ga: yaug we' da yaug za: ngaid mung: dalhang: dae byu she' yo re qo" se' pye' ra".9 Yao" o mae wa Ahohi kaung Dodo yao: zo: Eleza ngaid: ra". Ai: yaug wa Davi thao bocao: sulhe: sam yaug mae bobo: ra". Philisti byu qe gye to" nae" qham phaung ko" au: Israel byu qe naung zaid' lo" gelao" yao: bam za: lham: qhao: mung: .10 Ai: yaug yao" lo, nhae" lo" yang: shae: yang thaug' to' zo" myaung" byaug sho' Philisti byu qe re se' pye' ra". Mo"so: yang ai: ba aung mo" tang: khyo" ke' ra". Mo, je byu qe wa gyevo: zai cao cao" sham: nae" ga: za: bocao: li" ako".11 Yao" o gyab mae Harari kaung Age yao: zo: Shama ngaid: . Philisti byu qe lag laung: yo mae gye se' to" seim" na ko" re Israel byu qe phao: lo" gelao" .12 Ai: yaug wa yo khug agaung: mae ye; na mung: Philisti byu qe re lham: qo" khe' se' aung: yu: ra". Mo"so: yang aung mo" tang: khyo" byid' ra".13 Ai: sulhe: sam yaug; phaung mae bo: ra" sulhe: mo" sam yaug wa byao gin yo, re Davi na: ra" Adulam: laug aug' dung: khyo ye joe" ako". Philisti gye mo" thaui: re: Rephim lao:geim: mae dab zhaug' to" ako".14 Ai: au: Davi wa yao" gyetab zaung mae na: na mung: Philisti byu qe wa Belehem: vo tau gyetab zhaug' to" ako".15 Ai: au: Davi wa Belehem: vomo" kham: dung: nhae mae" qid thaung: qid re ngo re khoyaug qo" khe' jhaug' nae" yha" ga: shab' myid; lao" zo" ta" ra".16 Ai: sulhe: sam yaug kam" wa Philisti gyetab ye phyo' mung: Belehem: vomo" kham: nhae tau jo; ra" qid thaung: mae" qid re khae: yu mung: Davi jhao" yu: lo: ako". Ai qe re: Davi mashaug' lo: za: Mo"so: qhid' kheim: vhe' khyo" pye' zo" .17 Mo"so we" ce: qid shaug' nae" akhyo ngo we' va" jo, shao: . Ce: qid wa yao: yao" kao re pe" o: mado ye" ra" mo; sa: ngaid: mangaid: i" ga: ta" mung: ma shaug' lo: na: ra". Ai: sulhe: sam yaug wa ai: ra" mau" zaui: so" ako".18 Zerua zo: Yaba yao: nhaung: Abishai re: sulhe: sam yaug mae je: khye' yaug ngaid: . Yao: wa geim lhae ci mung: byu sam yo yaug qo" se' aung: pye' mung: sulhe: sam yaug khug mae bo: ra".19 Ai ru: mung: zug: jhaung aya: re qo" ra". Ai qe re: sao qhid' re" sam yaug re20 mamyhi. – Kabazela vo mae" sulhe: ngaid: ra" Yehoada yao: zo: Benaia re: bobo: ashi". Ai: yaug kaid' ra" mau" qi: wa Mo"ba' byu shid' yaug re qo" se' pye' ra". Nghin khyo" ra" gyo, yo, re myid khung: khyo vao yang: lo:tin: re qo" se' pye' ra".21 Gaung gyai qi" ra" Egutu byu re re: qo" se' pye' ra". Egutu byu lhae ci qe re: Benaia wa zaung: bao" za: ci mung: ye: yang: Egutu byu: lo, mae" lhae lhaid' yu yang: ai: lhae: yang yao: re se' pye' ra".22 Ai: ra" mau" Yehoada yao: zo: Benaia zaui: so: mung: sulhe: sam yaug mae bovao: ra".23 Yao: wa sulhe: sam xe yaug tho' ze qe re: sao qhid' re" sulhe: sam yaug re mamyhi ngaid: ra". Davi wa yao: re khaung: mhao: khyo" nha: ra".24 Yaba yao: nhaung: Atahela re: sulhe: sam xe zo: mae bobo: ra". Getau: byu qe wa Belehem: byu Dodo yao: zo: Elahan-25 an , – Harodi kaung Shima we' Elika , –26 Phalati kaung Helaza , Teko kaung Ikesha yao: zo: Iya .27 Anathod kaung Abyaza Husha kaung28 Mebune – Ahohi kaung Zalamung , Netophati kaung Mahare ,29 Netophati kaung Bana yao: zo: Heleb , Benyamin: kaung Giba vo mae" Ribai yao: zo: Iti .30 Pirathoni kaung Benaia , Gasha lao: geim: mae" Hide .31 Abati kaung mae" Abilabon , Bahumi32 kaung mae" Azama , – Shalaboni kaung Eliba , Yushin: yao: zo: Yonatain: .33 Hara kaung mae" Shima: , Hara kaung Shara yao: zo: Ahiam .34 Makhati kaung Ahabe yao: zo: Eliphe- led , Gilo kaung mae" Ahilophela yao: zo: Eliam.35 Karamela kaung mae" Hezare , Abi kaung Phare .36 Zoba kaung Nathain: yao: zo: Igala , Gaid' kaung mae" Bani .37 Amon: byu Zeleg , Zerua yao: zo: Yaba re gye sin: zai bao" ci byid: su Berod kaung Nahare .38 Itari kaung mae" Ira we' Gared .39 Hiti byu Uria , qhain" re yao: bam alhab' sam xe: nhaid' yaug ngaid: .