1 Ai: thao Abashalung: wa lhin" we' jui: myao: nyhang" to: mung: yao" qhid' mae tao: nae" byu ngo" xe yaug re re: nyhang"2 to" ra". – Abashalung: wa no' no' to" mung: vomo" kham: dung: mae lhaung" ye; na: ra". Mau" bo: thug' li" ra" yaug: mau" ta" sho' byid: genae" tau: jhaung zug: jhao" li" re Abashalung: wa nao khovo mae" ngaid: ga: lham: myid' ra". Ai: yaug wa ni" jeim ngo thoe vo mae" Israel byu kaung mae"3 ngaid: ga: dam: tug' jhau: ra". – Abash- alung: wa ni" mau" wa gai: ru we' dang main" ru ngaid: kyi: . Ngaid qere: ni" mau" ai re ta" byid: nae" byu jhaung zug: pho" khag' re re: majaung: nha: to: ga: lham: ta"4 ta" kaid' ra". – Ai: tho' mago" Abashalung: wa ngo kho ce: mang: mae tarha" zug: ngaid: ngaid: re kam" wa mau" thug' mo, alhab' bam: ngo jhao" li" ko" re ngo dang main" ra" khyo" ta" byid: nae" ga: ta" ke'5 ke' kaid' na: ra". – Byu dayaug yaug yao: jhao" phug' te' taung" te' li" lao" ai: yaug re lham: ge; po: yu yu kaid' mung: bobaug6 baug; ke' ke' kaid' ra". – Ai ru: jhaung zug: jhao" mau" ta" nae" ga: li" lo: ra" Israel byu alhab' re Abashalung: khyo" ai: khyo: lham: kaid' na mung: Israel byu qe: nhag' myid re khug' yu: pye' ra".7 Byid zin lai thao Abashalung: jhaung zug: pho" jhao" vao ye: mung: ni" jeim Suri' mang: Gershon: vomo" mae na shi" re Mo"so jhao" ceru: ein: dao: so: to: va". Mo"so ngo re Yerusalem: khyo dam: jhui" lo" ngaid: re wa ngo Mo"so re caung da"8 nae" ein: ta" va". – Ai ru: mung: Mo"so jhao" ngo dao: so: byid' to" we' dakhyo: Hebron: khyo ye: mung: dao: so: to" ru lo" zaui: so: nae" akhang" byid' ke' la, ga: mho'9 ra". – Jhaung zug: pho" re: yaug yo zo: ye: wa, ga: ta" ke' ra". Alao" Abashalung: to" mung: Hebron: vomo" khyo ye" lo" ra". –10 Ai qere: Abashalung: wa Israel byu qe jhao" tau: lhain: logyo: khug' nhao: to: mung: mo, byu qe re labo" maid thoe the' gyo: lao" Abashalung: Hebron: tau jhaung zug' tao" zaung va" ein: ba ge, ein: ye ta" to:11 ge, ga: amyin" byid' to" ra". – Yerusalem: vomo" mae" re: byu shid' yo Abashalung: jhui" zhag' ye" lo" ra". Yao: bam wa pe" ngaid: ru re: maba nhag' lam: phyo phyo12 za: bocao: ye" lo" ko" ra". – Davi mau" qham cao: Gilo vobyu Ahithophela re yao: na: ra" Gilo vo mae xeim: ngaui" jao: mae" Abashalung: khai: jhui" ci: ra". Abashalung: thao bocao" ra" mo, je: je: myo" lo mung: tau: lhain: mau" qam: qi" lo: ra".13 Byu dayaug Davi jhao" li" mung: Israel byu qe: nhag' lam: Abashalung: jhao" bo: byaug veko" ga: lau li" zhao: kyo" ra". –14 Ai ru: mung: Davi wa Yerusalem: mae yao: we' daga" na: ra" sin: zo: qe re to" ge, nyhao: nhaung" phao gelang: . Ai ru: mangaid: re khag' re: Abashalung: lo, mae" qo" loe, nae" mangaid: . Mye, thug' gelang: se, . Ai mangaid: re yao: ngon- haung" re qo" myhi: khe' mung: nyhao: re lo: se' ru we' vomo" re re: shae: yang mho"15 li" nae" ga: ta" ra". – Jhaung zug' sin: zo: qe re: nao jhaung zug: ta" khyo: ni" jeim ngonhaung" cao" nae" ga: mho: ako". –16 Alao" jhaung zug: pho" wa yao" kho" vang sin: zo: qe we' daga" thug' lo" ko" ra". Ngaid qere: jhaung zug' vang re lhaug' na nae" tau: naung cao myiqe: daxe yaug re17 nha co' ako". – Jhaung zug: we' yao: mae na: ra" byu alhab' thug' lo" mung: Beta- mered mae lo" zang" na: bam ko" ra". –18 Yao" sin: zo: qe lhang" kham" to: mung: bocao ko" ra". Kheriti we' Pelethi byu qe re: , Gata vo mae" Giti byu khyaug' yo: re re: , jhaung zug' qhid' kheim: mae su" jin: ye" lo" ako".19 Alao" jhaung zug: wa Hiti byu Ite re nao pe" mung: ngonhaung" thao bocao: qin". Nao wa mo, je: amyu" aqao: mazaug: ra" bang" vo angaid: ru mung: lo" se, . Jhaung zug: jhao" lo" na wa, . Ni" na jao: khyo lo"20 se, . – Ayenhe' za: joe" lo: ru mung: ngon- haung" jhao" pe" mung: ba: cao: qin" nae". Ngo kam" wa su: ca" ru bo mung: su" ru ngaid: . Ai ru: mung: ni" byu qe re jhui: yang: lo" se, . Jeju we' dao: so: zaung: ru21 wa nao mae jo; na veshao: ga: ta" ra". – Ite kam" wa Mo"so re: , nao asang jhaung zug: re: daui: na: we' dakhyo: nao jhaung zug: shid qhug' ngaid qere: , qo" loe; lo" qere: nao ug: ru mae ni" jeim ngo re: dang dang22 bojoe" nae" ga: ta" ra". – Alao" Davi wa xo' ye" lo" gelang: ga: Ite re ta" ra". Giti byu Ite re: yao: mae bo: ra" byu aqi: angai bin23 sho' we' daga" bocao: ye" lo" ra". – Mang: byu qe wa nhag' kaug' ngug mo" gyo" ako". Yao" thao bo cao" mo, alhab' ye" lo" gemung: jhaung zug: yao: Kidron: gyaung: gau" lo" re byu qe bo cao" gau" de; lo mung: seyo khe' khyo" jao" lai: lo" ko" ra".24 Zadug' we' Levi' byu alhab' bam: re: Mo"so: dao: thang" bain" vo; dao: joe" li" gemung: yao: bam ai: dao: thang: bain" khyo" to: yang: byu alhab' vo mae" bin: thug' shao" sho' Abyata wa xeim: to' na:25 ra". – Jhaung zug: pho" wa Zadug' re khai: yu mung: Mo"so: dao: thang: bain" re vo khug khyo dam: vhao" to: wa, . Mo"so ngo re nhag' thaung" ngaid: re wa yao: ngo re dam: jhui" lo mung: bain" re re: , yao" na qab jo, qo re re: dam: qo" the' myao nhao:26 li" nae". – Ai ru: mangaid: nao re ngo ma ngaui lo: ga: ngo re mho: ngaid: re wa ngaid va" ngo na: wo" yao: o: khyo: ngo re27 kaid' shao: ga: ta" ra". – Dam: jhaung zug: wa khin jaung Zadug' re nao lapa ngaid: mangaid: i". Ni" zo: Ahima we' Abyata yao: zo: Yonatain: re jhui: mung: vo khyo yaug28 yo za: lo" na: na wa, . – Naonhaung" lau li" zhao: kyo" ra" ba joe" sho' seyo laug aug'29 mae ngo lao" na nae" ga: ta" ra". – Ai ru: mung: Zadug' we' Abyata wa Mo"so: bain" re Yerusalem: khyo lo" to: mung: ai: tau na: na: ako".30 Davi re: ngug au" au: zang" pye' mung: khyid zhaung: khyaid' ci yang: Zhainlun bam khyo do, lo" ra". Yao" thao bocao mo, alhab' bam: re: au: zang" pye' yang: ngug31 zo" re" bocao: ako". – Abashalung: we' tau: lhain: phaung mae Ahithophela re: bo: ra" ga" lau the' gyo: lao" Davi wa Mo"so we" Ahithophela byid' ra" juyi re caid' pye'32 byid: la, ga: mho' yao: ra". – Bam dao joe" lao" Davi wa Mo"so re goe; pa" ra". Akhi vobyu Hushai re: bau: lao" caid' mung: au: dao myid zhai: kai" to: yang: yao: re tug33 nae" ga: thug' li" lo: ra". – Davi re: nao ngo we' daga" bocao" re wa ngo re qug: khai:34 phau: nhao: ru za: boe" nae". – Vo khug vao lo" mung: Abashalung: re jhaung zug: we" ngo ni" pho" jhao" jeim kaid' lo: qu" we' dakhyo: nao mae jeim dam: kham nae" ein: ta" wa, . Alao" Ahithophela khyug' ra" juyi re nga" bo: de, yang: qo" phyo' pye' li"35 nae". – Vo khug mae nao we' daga" khin jaung Zadug' we' Abyata na: ra" mangaid: i"?. Ai ru: mung: kho" vang khug mae nao gyo" ci: gu: khin jaung tao re lo" zhao: kyo:36 wa, . – Yao: tao mae Zadug' yao: zo: Ahima we' Abyata zo: Yonatain: shid' yaug na: ra". The' gyo" lau dao: alhab' ai tao re ta" kyo: mung: ngo jhao" kyo" ke' la, ein: ta" to:37 va". – Ai mung: Davi ba nam Hushai wa vo khyo ye" lo" ra". Abashalung: re: Yerusa- lem: khyo vao lo: ra".