1 Ailao" Yoseb wa yao: pho" myo, khung: mae gam" mung: ngug zo" re" bobaug baug:2 ra". – Ai: thao Yoseb wa yao: pho" mao gaung re sheim nae pyo" ja: we' mocid' jham re nyhang" gyaid nae" tau: yao" jeim mocid' ba mo, re amyin" khyo" ke' ra"3 Sheim nae pyo" ra" ja: we' shaung: nyhang" va" ra" mao gaung re li jo; ru we' dakhyo: to" to: mung: byid xe ba lai lao" Yaku' mathao mae Egutu byu qe wa nhaid' xe ba byang" sho' kaug' nghaui" ngug ko"4 ra". – Ai: kaug' nghaui" ngug: ra" ba na lai lao" Yoseb wa Pharaoh yham byu daqhae: re khai: yu mung: naonhaung" ngo re nhag' myid shogu: ko" ngaid: re Pharaoh re ceru:5 ein: ye: ta" byid: gela, . – Nga" pho" wa ngo shid naeva" gyi: Khanain: mang: mae ngo yao" tau: ngo dau" to: co' ra" lab khung: mae ngo re nyhab' ca" ga: ngo re jham tang: nhao va". Aimung: ngo nga" pho" mao gaung re lo" bin: nyhab' shaung co' yang: dam: gyo" lo nae" akhang" byid: la,6 ein: ye: ta" byid: gela, . – Pharaoh jhaung zug: re: ni" pho" jham tang: nhao: ru we' dakhyo: lo" nyhab' shaung: wa, ga: mho:7 ra". – Yoseb wa yao pho" re lo" nyhab' shaung nae" ga: do, lo" ra". Pharaoh jeim jham ngaid ko" ra" yao" agyi qe Egutu8 mang: mae" nhag' bo ade, qe we' . – Yoseb; yham byu qe , yao: mao: bam: yham byu qe ; yao: pho" yham byu alhab' bo: cao: do, lo" ko" ra". Gug' nyhug' jham we' zoshao qe re Goshen: mae nha co' ko" ra".9 Ai re" ru: myao: lhin" jham , myao: jui: sulhe: jham mo, thaui: mo" yao: Yoseb we'10 daga" cao" lo" ko" ra". – Yodain: gyaung: thoe te' Ataid' gaug be, jao: joe" lo" au: qi: sho' yao: kaug' nghaui" ngug: ru re dam: kaid' ko" ra". Yoseb wa yao: pho" mathao mae nhaid' myi nhaid' ba kaug' nghaui"11 ngug: ra". – Ai re" ru Ataid' gaug be, jao: mae kaug' nghaui" ngug: ru re ai: mang: bao: Khanain: byu qe myao ko" re Egutu byu qe qi: sho' yao: lhaung" kaug' nghaui" ngug: genhaung i"? ga: mho ko" ra". Ai mung: Yodain: gyaung: yae mae" ai: jo, qo re Abela-Mizareim: ga: mhang" ko"12 ra". – Yaku' zo: qe wa yao: pho" pin co' ru13 we' dakhyo: zaui: so: ko" ra". – Khanain: mang: khyo dao: do, lo" mung: Abraham yao: sang: na nae" tau: Hiti byu Ephrun: jhao" vai: ra" Mam:re jao: gyu" Mapuila, din" yo mae jo; ra" myid gyain: mae nyhab'14 ko" ra". – Yoseb wa yao: mao gaung bin: shaung: nyhab' lao" yao: mao: bam we' mao nyham: cao: lo mo, alhab' Egutu mang: khyo dam: phao: gyo" lo ko" ra".15 Ana" yao: pho" shid: byaug thao mae yao: mao: yao: nhaung: bam wa Yoseb nyhao: nhaung" re qu" nhung mung: nyhao: nhaung" yao: re yhin" ra" mathao mae nyhao: nhaung" re dam: yhin" nae"16 laug ga: gaung yug yang: . – Yao: jhao" logyo: nhao mung: ngonhaung" ni" mao: bam nao re mashab makhyang" ru kaid' lai: lo va" ru re qobo lhoe' byid: la, ein: ye: mho' bain: ge, ni" pho" na shi" au: ngon- haung" re pin: to" ra".17 Airu: mung: ni" pho" Mo"so: jeim qe re qobo lhoe' pye' byid: la, ga: mho' bain:18 ko" ra". – Yao: mao: bam re: vao ye: mung: Yoseb; qhid' kheim: mae goe; gam" yang: ngonhaung" wa asang: jeim qe ngaid: bam19 va" ga: mho ko" ra". – Ailao" Yoseb wa pe" gaung dayug ge, ngo wa Mo"so: gaung tha"20 ngaid: ra" i"? – Naonhaung" wa ngo re pyam" yhin" nae" yaung: to: gengaid yang re: Mo"so ana" ba re" ru: byu myo: sho' kao khyi nae" tau: AsAng Mo"so wa gai:21 ra" khyo: kaid' ava". – Aimung: dagaung yug ge, naonhaung" we' zoshao: qe re ngo khau: na nae" ngaid: ga: yao: bam re nhag' tang" dao" yang yaug yo: nhao: ra".22 Ai re" ru: Yoseb wa yao: pho" yham byu qe we' Egutu mang: mae na: na ko" ra". Yoseb wa kao dayo: daxe zin joe" sho' kao23 daui: ra". – Ephrim" yao: zo: yao: myid: myid: sam qae: joe" sho' Yoseb the' myao co' ra". Manashe" yao: zo: Makhira" yao: zo: qe re: yao" tao: kheim" mae the' vo, co'24 ra". – Ailao" Yoseb wa yao" mao: nhaung: qe re ngo shid: lo" na: kyi: va". Gai gai: yao: dang dang Mo"so wa naonhaung" re li" kam" qu" nae" ngaid mung: ce: mang: mae" mung: naonhaung" re Abraham , Isag , Yaku' bam re jham kai: mung: byid: nae" ga" ra" mang: khyo jhui" lo" li" nae" ga: ta" to: co' ra".25 Gai gai: yao: Mo"so wa naonhaung" re li" kam" qu" li" nae". Nga" sho: qug: jham re ce: mang: mae" naonhaung" yu: lo" ca" genae" ga: Israel amyu" qe re jham kai: nhao: ra".26 Ai re" ru: Yoseb wa kao dayo: daxe zin byang" re shid: lo" byaug: ra". Yao" mao gaung re wa sheim nae pyo" ra" aja: ja: gyaid yang: Egutu mang: mae" gaung: mae ke' mung: to" to: ko" ra".