1 Ana" Egutu mang: mae gaug zo jo; ga" thoe Yaku' the' gyo: lao" naonhaung" khoru: mung: yao: cao: za: jho" zhaug' qu"2 na ko" i"? – Egutu mang: mae gaug zo jo; ga" thoe ngo the' gyo: va". Nyhao: nhaung" mashid lo: kao qo" daui: na nae" tau: ai: mang: khyo ye: mung: nyhao: nhaung" zo: nae" gaug ye: vai: lo ge, ga: yao: bam3 re mho: ra". – Yoseb; yao: mao: nhae ho' daxe yaug wa gaug vai nae" ga: Egutu4 mang: khyo ye: ko" ra". – Yoseb; yao: nhaung: Benyamin: re kam" Yaku' mabo: nhao ngaid: ra". Pe" mung: ein: re yao: mae magai makhe' ru daja: ja: thaung" qhug' nae" ru re gaung yug yang: ngaid: ra". –5 Ai: ayo, mae Khanain: mae re: bao" khug' gyo" mung: Egutu mang: khyo joe" ye: ko" ra" mo, Israel yao: zo: qe re: gaug vai nae"6 ga: li" lo ko" ra". – Ai: ayo, mae Yoseb wa mang: gyi boe" na mung: mang: byu qe re gaug aung: byid' ra" mau" sang ngaid: ra". Yoseb; yao: mao: nhae ho' wa joe" li" mung: yao" qhid' kheim: mae goe; gam"7 pa" ko" ra". – Yoseb wa yao: mao: nhae ho' re myao mung: yao: bam re ba: ra". Ngaid qere: maba geim kaid' mung: dao: qao jhau yang: naonhaung" khai: mae" li" lo ko" ga: yao: bam re myid' ra". Yao: bam re: gaug zo vai nae" ein: Khanain: mang: mae" li"8 ru ngaid: ga: tau" ako". – Yoseb wa yao: mao: bam re ba ngaid qere: yao: bam Yoseb9 re maba mase" ko" ngaid: ra". – Yoseb wa yao: bam: akhyo we' yao: myao: ra" yab mo, re myid: beim: yang: . naonhaung" wa jo" qu" mo, ngaid ko" ra". Cemang: mae" qam: nang" jo, qo re qu" nae" ga: li"10 ko" ru ngaid ko" ra" ga: mho lao". – Yao: bam wa mangaid: wo" asang we" ni" jeim qe gaug zo vai nae" ein: li" ru angaid: .–11 Ngonhaung" wa dayaug: yao: zo: jham za: ngaid: , din: main: mo, re: ngaid: ni" jeim ngonhaung" wa jo" qu" mo, mangaid: ga:12 dam: tau: ko" ra". – Yoseb re: , mangaid: genae". Cemang: mae qam: nang" ra" jo, qo qu" nae" ga: yao: li" ko" ru ngaid veko"13 ra" ga: mho: ra". – Ailao" yao: bam re: ni" jeim qe wa Khanain: mang: mae" pho" dayaug: zo: qe ngo nhae ho' daxe: shid' yaug ngaid: . Ngai: thao" yaug wa pho" we' daga" nha co' va". Dayaug wa mana: byaug14 lo: ga: dam: ta" gelao". – Yoseb re: naon- haung" jo" qu" mo, ngaid ko" ra" ein: mho:15 ru mae. – Naonhaung" re lag yu ca: qu" nae" akhyo: wa ngai: thao" ra" naonhaung" yao: nhaung: majhui" li" ko" re wa Pharaoh kao daui: na: ru we' dakhyo: naonhaung" ce mae" gai: phao: lo" lozai mangaid: . –16 Naonhaung" dao: dang madang: ru ca: qu" mung: ba nae" tau: naonhaung" mae" dayaug re nhao: ke' mung: naonhaung" yao: nhaung: re lo" jhui" yu veshao: . Dang: ra" gu: re wa kyam: mae lhaung" to: nae". Airu: mangaid: re wa Pharaoh kao daui: na: ru we' dakhyo: gai gai: yao: naonhaung" wa jo" qu" mo, ngaid ko" ra" ga: mho yang: . –17 Yao: mao: nhae ho' alhab' re sam ba kyam: mae lhaung" to" ra".18 Sam ba ein: ba mae Yoseb wa yao: bam re khai: yu mung: ngo re: Mo"so re19 gyaug phug' yaug ngaid: . – Aimung: naon- haung" loe, nae" mau" zo" wa naonhuang" din: main" ra" mo, dang dang ngaid: re wa naonhaung" mae" dayaug kyam: khug mae laung" nhao co' yang: dang: gu: kam" wa lo" ge, yham byu qe bao" khug' na genae" ngaid mung: gaug yu: vin yang: lo" gese, . –20 Ngai: thao" ra" naonhaung" yao: nhaung: re ngo jhao" jhui" gyo" li" ge, . Airu: ngaid lao" naonhaung" kao so' re: loe, genae" ga: mho: ru we' dakhyo: cao" pyang" ko" ra". –21 Ai: au: yao: nhae ho' yao: jho" ta" ko" ru wa gai gai: yao: nyhao: nhaung" nhaung: zo" mathao mae qobo qo" bam va". Yao: nyhao: nhaung" re mho' bain" ra" au: yao" nhag' myid qug: khai" ru re nyhao: nhae ho' myao: na va" ru matae" gyo: , ai: mathao mae nyhao: nhaung" adao mae ana" phau"22 bam va" ga: mho ko" ra". – Rubin: re: , zoshao re dazao" thaung: ge, ein: mho va" mangaid: i"? naonhaung" matae" gyo: ko" mathao mae ana" yao" sa: sho: tau: qobo23 dae qhug' khae va" ga: dam: ta" ra". – Ai re" ru: yao: bam jho" ta" ra" dao: re Yoseb ba: gyo: nae" majho ko" ngaid: ra". Khoru: ga" re Yoseb wa dao: dai" yaug khyo" yao:24 bam re ta" ta" mung: ra". – Ai: au: Yoseb wa yao: bam mae" thug' lo" mung: ye: ngug: na: ra". Yoseb dam: vao lo mung: yao: bam we' dam: jho" jhau yang: Simun: re yao: bam: phaung mae" she: thug' yu mung: yao: bam: myo, hao: tae mae myag:25 jab: taui" to" ra". – Ai: thao yao: bam: thaung mae gaug lag: ke' nhao mung: yao: bam: ngaui re re: yao: bam: thaung mae dam: ke' byid: nae" re: khyo le; mae zo: nae" zao: kho re re: , bo: ke' byid' ke' nae" tau: yao" byu qe re ta" yang: yao" byu qe re: ai: khyo: kaid' ko" ra".26 Yao: bam re: myao: dao mae gaug thaung kai: mung: thug' phao: lo" ko" ra". –27 Jomu dajao: mae joe" lo" ko" au: dayaug wa myao: zo zho: nae" gaug thaung phung" ke' re thaung nhaid' mae ngaui kag' re the' myao lao" qu" shi: ge, nga" ngaui re dam: ke' ke' genhaung ga: yao" mao: nhaung:28 bam re ta" kyo" ra". – Yao: bam wa myid: mug' ru we' Mo"so nyhao: nhaung" re ceru: kaid' ru wa pe" ru: ngaid: i"? ga:29 yao: cao: jho" ta" mug' ko" ra". – Khanain: mang: yao: pho" Yaku' jhao" joe" lao" yao: nhae ho' mae thaung" qhug' ra" gu: alhab'30 lo" zhao: kyo: ko" ru wa. – Ai: mang: re ug: ra" mang: gyi wa dao: qao jhau yang: ngonhaung" re ai: mang: mae jo" li" qu"31 mo, ga: jho: ra". – Ngonhaung" re: ngon- haung" wa din: main" ra" mo, angaid: , jo"32 qu" mo, mangaid: . – Ngonhaung" pho" dayaug: zo: qe za: daxe: shid' yaug ngaid: . Dayaug wa mana lo: , ngai: thao" yaug wa Khanain: mang: mae nga" pho" we' daga"33 na co' ga: mho: ra" au: , – ai: mang: re ug: ra" mang: gyi wa naonhaung" din: main" ra" mo, ngaid: ru mangaid' ru re khoru: gai: ba nae" i"? ga: mho yang: naonhaung" mae" dayaug ngo jhao" mae nha: to: co' ge, naonhaung" yham byu bao" khug' khug' na genae" va" zao: kho yu: vin mung: lo"34 ge, . – Ngai: thao" ra" naonhaung" yao: nhaung: re ngo jhao" jhui" gyo" li" geri: , Airu: ngaid lao" naonhaung" jo" qu" mo, mangaid' ru re ba zai ngaid: ra" . Naon- haung" mao: nhaung: re re: dam: nhao: ke' byid: nae". Naonhaung" wa ce: mang: mae gau mung myho" khyo" ru gai: kaid' genae". ga: mho: ru re zhao: kyo" bin thao re. –35 Yao: yaug yao" gaug thaung mae" gaug re phung" qu" ko" au: yao: yaug yao" thaung mae" ngaui kag' jham re yao: bam we' yao: pho" the' myao ko" au: gyai gyaug: din ko"36 ra". – Ai: mathao mae yao: pho" Yaku' wa naonhaung" nga" zo: qere lhaid' she: vegenhaung i"? Simun: re: mana lo: Benya- min: re re: lhaid' she: yu nug shi: ko" i"? ce: ru" mau" wa ngo we' tang: tug' ru ngaid:37 ava" ga: yao: bam re mho: ra". – Rubin: wa Benyamin: re pho" jhao" madam: qo" jhui" lo ngaid: re nga" zo: shid' yaug re se' pye' wa, nga" lo, khug mae yao: re bo nhao: ke' byid: la, ngo nga" pho" jhao" qo" qo" za: dam: lo: jhui" qhaug' nae" ga: yao: pho" re38 mho: ra". – Yao: pho" re naonhaung" we' daga" nga" zo: re maqo" nhao: ke' nae". Yao: mao: shid: byaug va" , yao: dayaug za: adang lo". Naonhaung" ye" lo" gau: khyo mae yao: qug: khai: thaung" qhug' re naon- haung" nga" xae phyu re nhag' kaug' myo, yug: ru we' daga" mai:vo: mug: khyo gyo" lo" nhao: ru ngaid genae" ga: mho: ra".