1 Ai: thao Yoseb wa yao: pho" no: na: ga" ru the' gyo: yang: yao: zo: Manashe: we' Ephrim: tao re jhui: mung: do, lo" ra". –2 Byu dayaug Yaku' re ni" zo: Yoseb do, lo: ra" ga: ta" kyo" ra". Ailao" Israel wa qhao" to" mung: yab jaung: dao mae zaung: jo; ra"3 Ailao" Yaku' wa gekai: lai phung bao qi" ra" Mo"so wa Khanain: mang: Luza: vo mae ngo re li" na: qhu" mung: min byid:4 yang: . – Ngo nao re na: myo: na: laug nhao nae". Nao re byumyu" myo: sho' boe" nhao nae". Ni" amyu" aboe: akaung jham wa ni" thao mae ce: mang: din" re malam: lai: sang nae" tau: ngo byid: nae"5 ga: ta" to", – Egutu mang: mae ngo majoe" li" shi: re, Egutu mang: mae qo" ra" ni" zo: shid' yaug Ephrim: we' Manashe: tao wa nga" nyaug xo' ru ngaid vegeshao: Rubin: we' Simun: re" ru: nga" zo: boe" genae". –6 Thao phyao: nao dam: khau: ra" zo: qe wa ni" zo: ngaid mung: yao: qo" ra" mug: myid mae yao: mao: tao: mang re dam: mhang"7 ca" nae". – Ngo Padain: Aram: mae" dam: phao: lo: ra" au: Khanain: mang: khyo vao lo mung: Ephred' vo we' jhao" li" na: au: ni" myhi" Rakhela' wa nga" lo, mae shid: ra". Shid: ra" jo, qo Belehem: ga: mang: ra" Ephred' khyo lo" ra" khyo dang nhae mae nyhab' to: co' va" ga: Yoseb re ta"8 kyo" ra". – Israel wa Yoseb; yao: zo: tao re myao lao" ce shid' zo: wa khag' ngaid9 ko" ga: myid: lao". – Yoseb wa ce: mang: mae ngo re Mo"so min byid' ra" nga" zo: tao ngaid: ga: yao: pho" re ta" lao" yao: pho" wa ngo jhao" qui" te' li" nhao wa, , yao: tao10 re ngo min byid: nae" ga: mho: ra". – Israel wa kao qi: mung: myo, go: byaug: yang: mathe' myao yang: zoshao tao re anhae khyo qui" ye: nhao mung: ge; vo; bobaug11 baug: ra". – Israel wa ngo ni" myo, khung: re the' myao lo: nae" lao” majho ana" ni" zo: tao re re: Mo"so wa qhu" byid: va" ga:12 Yoseb re mho: ra". – Yoseb wa yao: zo: tao re yao: pho" tao: kheim" mae" she: thug' yu mung: au: lam: goe; gam" nhao: ra". –13 Dam: Yoseb wa yao: zo: tao re Ephrim: re lo, yo lo, mae she mung: Israel lo, vai: shaid' khyo , Manashe: re lo, vai: lo, mae she yang: Israel lo, yo shaid' khyo she: te'14 ye" ra". – Israel kam" wa Manashe: wa zo:qhid' ngaid: na qere: juyi khyo" yang yao" lo, qang: ke' mung: ngai yaug Ephrim"15 au: dao mae kai" ke' ra". – Yoseb re min byid' ru wa nga" phug' Abraham we' nga" pho" Isag lam khug: lo: ra" Mo"so ngo re dapyaid geim" ana" ba joe" sho' qu" gam zho: jhaug' lo: ra" Mo"so ga: mho: ra". –16 Qug: khai: kyin" nhaung" aja: ja: mae" ngo re khyaid' yu: ra" mug: logyo: wa ce: zoshao tao re min jhaung: byid: veshao: wo". Yao: tao re nga" mang we' re: , nga" pho" Abraham we' Isag re re: , paug' yang: mhang" vegeshao: wo". Yao: tao wa myid gye, dao mae gyai myo: laug sho' na: je:17 geshao: wo" ga: mho: ra". – Yao: pho" lo, yo re Ephrim" au: dao mae kai" ru re Yoseb myao lao" yao" nhag' myid mayo18 mung: , – mangaid: ngaid: ra", ce: zoshao she, zoqhid' angaid:. Ce: yaug: au: dao mae lo, yo lo, kai: wa, ga: mho yang: yao: pho" lo, re Ephrim" au: mae" re Manashe" au: dao mae tha" kai: byid: nae" ga: lo, qang:19 ke' ra". – Yao: pho" wa maqaid mung: ngo ba: na: ra". Nga" zo: we" ngo ba: ra".Yao: wa gyai qi" ra" byu thaui: mo" boe" nae" . Ngaid qere: yao: nhaung: wa yao: tho' je: qi: mung: yao" amyu" anyaug wa amyu" myo:20 sho' boe" nae" ga: mho: ra". – Mo"so wa nao re Ephrim: we' Manashe: ru" ru boe" nhao shao: wo" ga: mung: Israel amyu" qe wa ni" mathao mae min byid' li" genae" ga: ai ba mae yao: tao re min gam byid' ra". Ai re" ru: Manashe" jo, qo Ephrim: re21 nha: to" ra". – Israel wa ana" ngo shid: lo" naeva". Ngaid qere: Mo"so wa naonhaung" we'daga"ngaid mung: naonhaung" phug' phyid'qe na: lai: lo" ra" mang: khyo dam:22 jhui" lo" li" nae". – Ai mae" getau ni" mao: ni" nhaung: bam re byid' ra" tho' mae nao re je yang: byid: nae" ru wa nga" shae we' la" yang Amori' byu qe: lo, mae" ngo qo" yu: ra" zai yo mug: myid nao re ngo byid: nae" ga: Yoseb re mho: ra" .