1 Ana" Labain" yao: zo: qe wa nga" pho" jo, nho" dai kham alhab' Yaku' sham" tai: lo" venhaung. Ngo nhae ho' pho" dai kham: yang yao: mae ai nho" qo" lo" byaug va" ga: ta" thoe re Yaku' the' gyo:2 mung: . – La:bain" myo, nho re qu" ngaid qere: genhae" we' madau: ru re the' myao:3 ra". – Ailao" AsAng wa Yaku' re ni" phug' phyid' na: ra" mug: , ni" mao: nhaung: qe jhao" dam: lo" wa, Ngo nao we' daga"4 ngaid: ga: mho: ra". – Airu: mung: Yaku' wa byu re nhao: ke' mung: caid' yao jham zam" na: ra" din" yo khyo Lea we' Rakhela'5 re khai: yu mung: , – ni" pho" myo, nho wa nga" qhid' kheim: mae qhid' phyao: re" ru mangaid' ru re ngo myao va". Ngaid qere: nga" pho" Mo"so wa ngo we' daga" ana:6 na: . – Ni" pho" mau" zo" jham re ngo qam: o: bo: ra" nho" zaui: zho" lo va" ru re nao7 tao ba veko" mangaid: i"? – Nao tao: yao: pho" wa ngo re vhain" zo: mung: nga" o: kaung phug' re daxe lhang tha" lhag' pye' byid: ngaid qere: ngo seim" nae" Mo"so8 maqaid ngaid: ra". – Yao: wa ataug' alhag' ru wa ni" o: kaung phug' ngaid veshao: ga: ta" lao" caid' yao jham re: ataug' alhag' ru za: xao: ko" ra". Dam: atung" ataug' mung: ra" caid' yao jham re: atung" ataug' ru za:9 xao: ko" ra". – Ai re" ru: Mo"so wa nao tao: yao: pho" dai kham mae" she: yu yang:10 ngo re byid: va". – Ai: gug' nyhug' jham amyug: cao" ko" au: ngo qu" ke' mung: gug' nyhug' amo" we' zam" ko" ra" alo: jham wa ataug' alhag' atung" ataug' we' aja: ja: ngaid ko" ru re yab mo, mae ngo myao11 va". – Mo"so: mug: logyo: re: yab mo, mae Yaku' we" ga: khai: ru re ngo cemae na:12 ein: ngo tau" ke'. – Yao: wa tau: nghao" qu" ke' wa, gug' nyhug' amo" jham we' zam" ko" ra" alo: jham wa ataug' atung" we' aja: ja" ave, ngaid ko" ra". Khoru: ga" re nao mae La: Bain: khoru: kaid' ru re ngo13 myao va". – Ngo wa so: xam: zang mae nao xau gyain: mung: Ngo re dao: so: to" ra" Bethela' mae" Mo"so ngaid: , ana" to" yang: nao yao" co' phyid' mang: khyo lo" wa, ga: ngo re amyin" byid' ra" ga: Yaku'14 wa ta" kyo: lao". – Rakhela' we' Lea tao wa nga" pho" yham we' pe" tin: mung: ngo tao: tau: pe" nam Ma qo" yu shi: nae" i"? –15 Yao: ngo tao re labug lamai" mang: byu ru: myid venhaung mangaid: i"? Ngo tao16 re aung: zo" pye' venhaung wo". – Nga" pho" jhao" mae" Mo"so qab: yu: ra" khyao kham khyao khae: wa ngonhaung" jo, nho" ngonhaung" zo: dau qe: jo, nho" boe" va". Aimung: Mo"so mho: ru we' dakhyo: kaid' se, ga: yao: re dam: tau: ko" ra".17 Ailao" Yaku' to" mung: yao: myi: yao: zo: bam re ma dae myao: dao jui: nhao:18 ra". – Padain:Aram: mae the' qo" ra" yao" gug' nyhug' alhab' we' qo" ra" jo, nho" alhab' re yu: vin mung: Isag na: jo, qo Khanain: mang: khyo jhui" phao: lo: ra". –19 Ana" La: Bain: wa yao mug' qaug nae" ga: getau khyo ye" lo" au: Rakhela' wa yao:20 pho" gyoe: alho re khug' yu: ra". – Yaku' wa yao: phao nae" akhyo mata" kyo: lo: za: Suri' byu La: Bain: re juyi khyo" yang21 aung: ra". – Ai re" ru: yao" jo, nho" dai kham alhab' we' phao: thug' lo mung: qid gyaung: thoe te' khyo phyaid phyaid gau" de, mung: . Gilaid' bam khyo qhid' kheim: qang yang: ye" lo" ko" ra".22 Ana" Yaku' phao: lo" byaug: ra" akhyo re sam ba ein: re La: Bain: the' gyo: ba:23 ra". – Ailao" yao: wa mao: nhaung: qe re khai: jhui: mung: cao" khe' re nhaid' ba ein: ba mae Gilaid bam dao mae ye: myhi:24 ra". – Mo"so wa Suri' byu La: Bain: jhao" myi" ayo, yab mo, mae joe" li" mung: nao Yaku' re gai: ru re: magai: ru re: data" lha"25 wa, ga: mho: ra". – La: Bain: cao" khe' re Gilaid bam mae cao" myhi: ra" au: Yaku' wa seim zaung kaid' lao: va". La: Bain: we' yao" mao: nhaung: qe re: seim zaung kaid'26 mung: ai mae thang ko" ra". – La: Bain: wa Yaku' re nao pe" mung: sae za: khug' phao: i"? Mang: zin" au: sham" lo" ru we' dakhyo: ngo re yho" to: co' mung: nga" zo: tao re jhui" khug' phao venhaung i"? –27 Ngo re yho" to: co' yang: pe" mung: sae za: khug' phao: i"? Nao re ngaui bau ngaui lho" nghaui" thoe caung: thoe we' zang be, mao" thaung: mung: anhao: ke' nae" ru , nao ngo re pe" mung: mata" lo: kaid' i"? –28 Nga" zo: tao re pe" mung: yang: bobaug baug nae" akhang" mabyid' i"? nao wa29 nhag' magyang" re" ru: kaid' va". – Ana" ngo nao re qo" yhin" pyam" ra". Ngaid qere: amyi ni" pho" lam khug: ra" Mo"so wa joe" li" mung: Yaku' re gai: ru re: magai: ru re:30 data" lha" wa, ga: ngo re mho: ra". – Ana" kam" wa nao ni" pho" yham khyo lhau" joe" nug: ra" mathao mae lo" ru wa ngaid veshao: . Ngaid qere: nga" mo"so alho jham re pe" mung: khug' ci: phao: i"? ga: Yaku'31 re mho: ra". – Yaku' re: La: Bain: re , ni" zo: tao re maqaid maqui" mha" jhui" yu nae" ru gaung yug yang: phao: ru ngaid: . –32 Ni" mo"so alho re kam" wa khoyaug jhao" mae" qhug' re ai: yaug wa shid veshao: , nga" mao: nhaung: qe: qhid' kheim: mae ni" zai yo re ceim" shid' mung: yu: lo" wa, ga: La: Bain: re mho: ra". Rakhela' khug' ci: ru re Yaku' maba ngaid: ra".33 La: Bain: wa Yaku' seim zaung , Lea seim zaung ' vhao cao shid' yaug: seim zaung khyo vao: qho ngaid yang: re: maqhug' lao" Lea zaung mae" thug' mung: Rakhela' zaung khug khyo vao ye" ra". –34 Rakhela' wa ai: gyoe alho jham re yu mung: ma dae myao: . myao: ain: khug khyo ke' nyham: yang: myao: ain: dao mae zaung: na: jo; ra". La:bain wa dazaung: geim" re35 qho mung: maqhug' lao" – Rakhela' wa nga" pho" we" ni" qhid' kheim: mae ngo magai: to" ru re nhag' dayo: , myiqe: qe mae boe" ra" mai ci yang: ngaid: ga: yao: pho" re mho: ra". Ai re" ru: La: Bain: wa gyoe lho re maqho: qhug' ngaid: ra".36 Ailao" Yaku' wa nhag' yo: mung: La: Bain: we' dao: jhang: jho" jhang: ko" ra". Ngo pe" zai" shaid' yang: ngo re ce qhi"37 gyang" cao" khe' i"? – Nga" zai yo alhab' re nao labug: ru phaug' qho va" mung: ni" zai yo daja: ja: re the' qhug' ngaid: re , ni" mao: nhaung: nga" mao: nhaung: qe: qhid' kheim: mae to" to: wa, , Yao: bam wa nao we' nga" gyo: mae dao: phyid' veshao: . –38 Lai: lo" va" zin lam: shid' xe ngo nao mae na: ra" yo, mae ni" caid' yao amo" jham anau" mashoe' khyo" ko". caid' lo: jham re39 ngo mase' zo: . – Myang kha: zoqhid: yang bin" se' ra" caid' yao nao jhao" maci: lo: qu". ngo za: aseim" pye'. na" re, khug' ru ' myi" mae khug' ru ngaid qe re: nao ngo40 re atha" lhaung" mho' ra". – Na" gaung: ba laung re re: , myi" nghin khyo" ru re: , ngo phau" lo va". Yab magyi: ru re: phau" va".41 Ai re" ru: ngo wa zin lam: shid' xe byang" sho' ni" yham mae na mung: ni" zo: shid' yaug: tau: mae daxe: byid zin:, caid' yao jham: tau: khyaug' zin ngo nao re zaui: zho" lo va". Ngaid qere: nao wa nga" o: kaung phug' re daxe lhang tha" lhai" pye'42 byid' ra". Ana" re: . – ngo lam: ra" Mo"so , Abraham: Mo"so , Isag gyaug phug' ra" Mo"so wa ngo we' daga" mana ngaid: re nao ngo re gaung lam: sho pyaid' nhao: ke' nae" dang dang yao: ngaid: ra". Gai gai: yao: ngo qug: khai: phau" ru ' amyaung: ataung" zaui: so" na: ru re AsAng Mo"so the' myao mung: amyi nao re mho" shid'43 ru va" ga: mho: ra". – Ailao" La: Bain: wa ce: myiqe: jham wa nga" zo: qe ngaid ko" ra". Ce: zoshao jham re: nga" zo: myid: qe , gug' nyhug' jham re: nga" gug' nyhug' jham , the' myao: ra" gu: alhab' wa nga" jo, nho" jham ngaid: ra". Nga" zo: qe re re: , yao: bam khau: ra" zoshao qe re re: ngo pe"44 vae" kaid' nae" i"? – Airu: mung: ana" nao we' nga" gyo: mae sadso: boe" veshao: nga" shid' zo: dao: jho" thang" to: lang: ga: Yaku'45 re mho: ra". – Airu: ga: lao" Yaku' wa laug baui dabaui yu yang: so: xam: zang tau:46 zhaug' bin mung: , – Yaku' wa yao" mao: nhaung: qe re laug baui ci: zang" lo mung: bam: to: ge, ga: mho lao" yao: bam re: laug baui ci: zang" lo mung: bam: qaung" to: ko" ra". Ai: laug baui bam: to" ra" adao mae zo:47 shaug' ru kaid' ko" ra". – La: Bain: wa ai: laug baui bam re Yegara-sa-hadutha' ga: mhang" ra". Yaku' wa Gilaid ga: mhang"48 ra". – La: Bain: wa ce: laug baui tai: bam: to" ru wa ngo we' ni" gyo: mae sadso: ngaid: veshao: ga: mho: ra". Ai mung: ai re Gilaid ga: mho ko" ra". Mizapa: ga: re: mho49 ko" ra". – Khoru: ein: re , La: Bain: wa nga" shid' zo: gao" lo" thao mae nao we' nga" gyo: mae AsAng qu" gam: na shao: wo". –50 Nao wa nga" zo: tao re yhin" pyam" ngaid qere: , nga" zo: tao mae" getau nao yham sang myhi" dam: yu ngaid qere: , nga" shid' zo" gyo: mae sadso: boe" na veshao: wo"51 ga: re: , – ai mae" getau La: Bain: wa nao we' nga" gyo: mae ngo tau: zhaug' to: va" ce: laug baui bam we' so: xam: zang re qu"52 qu" wa, . – Ngo nao re ye khaid' nae" tau: ce: laug baui bam re magai: lai nae". Nao ngo re gye khaid' nae" re: ce: laug baui bam mae" magai: li" nae". Ce laug baui bam: to" ru we' so: xam: zang wa sadso: boe" na53 veshao: wo". – Abraham: Mo"so , Yaku' ra" Mo"so , ni" pho" Mo"so wa nga" shid' zo" agyo: mae dao: phyid' veshao: ga: Yaku' re mho: ra". Yaku' re: yao: pho" gyaug phug' ra" AsAng Mo"so: mang re lao: mung: jham54 tang" ra". – Ai: thao Yaku' wa bam dao mae xeim: ngaui" mung: yao" mao: nhaung: qe re zo: shaug' poe khai mung: yao: bam dao mae zo: shaug' yang: bam dao mae yab ko" ra".55 La: Bain: wa ne, seim no' to" mung: yao: zo: yao: myid: bam re bobaug baug: zo" re" min byid: mung: yao" mang: khyo to" phao: lo" ra".