Sao Peim-25

(SHAO GYANG" JHAM: PAUG' )

切换到福音影视网-新版圣经

  • 1 Ai: thao mae Abraham wa myi: dayaug dam: yu: ra". Yao" mang wa Keturah ngaid:
  • 2 ra". – Ai: myiqe: myhi" wa yao" tau: mae Zimran: , Yogshain: , Medain: , Midian: , Ishbag' we' Shua' nhae ho' re khau
  • 3 myhung: byid' ra". – Yogshain" zo: qe wa, Sheba we' Dedain: ngaid ko" ra". Dedain: zo: qe wa Ashuri: , Letushim: , Leumim:
  • 4 nhae ho' ngaid ko" ra". – Midian: yao: zo: qe wa Epha: , Ephera' , Hanug' , Abida' , Eleda: ngaid ko" ra". Ai jham alhab' wa Ketura: kham: mae" akaung jham ngaid ko" ra"
  • 5 Abraham wa yao" jo, nho" dai kham
  • 6 jo; gu: alhab' Isag re byid' ra". – Myi: ngai: kham: mae" zo: qe re re: yao: kao daui: na shi" yo, mae jhaung qhu" gae: myho" byid: mung: yao: zo: Isag yham mae" ba thug' shaid' mang: khyo nhao: ke' ra" .
  • 7 Abraham: kao daui bang: wa dayo:
  • 8 nhaid' xe: ngo" zin ngaid: ra". – Ai re" ru: Abraham wa mao: yang shid: lo" mung: yao" phug' phyid' qe phaung khyo joe" lo" byaug: ra".
  • 9 Yao: zo: Isag we' Ishamela' tao wa Mam:re: jao: gyu" mae jo; ra" Hiti byu Zora, yao: zo: Ephrun" myid gaung cug' Magphela: dung: gyain: mae yao: pho" re
  • 10 nyhab' shaung ko" ra". – Heti byu qe jhao" mae" Abraham vai: yu ra" myid gaung cug' mae Abraham we' Sa:ra: tao re nyhab' ru
  • 11 ngaid ko" ra". – Abraham shid: byaug thao mae Mo"so wa Isag re min jhaung: byid' ra". Isag wa Bera:lakhiro" mae na: na: ra"
  • 12 Ana" ce wa Sa:ra: vhao cao: Egutu amyu" Hagara' khau: ra" Abraham: yao: zo: Ishamela' zo: myid: akaung ako' jham
  • 13 ngaid: ra". – Ce ru wa Ishamela' zo: qe mae yao" anyaug akaung: mang jham ngaid: ra". Zo:qhid' wa Nabayud' , ai mae" Kedara: ,
  • 14 Adbela, Mibsam: , – Mishma: , Duma: ,
  • 15 Massa: , – Hada: , Tema: , Naphisha: ,
  • 16 Kedma: jham ngaid: ako". – Ishamela' zo: myid: qe wa ai: gu: ngaid ko" ra". Ai: gu: wa yao: yao" vogaung: jham we' yao: yao" jo, qo mae cao" mung: aja: ja: mang: ra" zug:
  • 17 daxe: shid' kaung boe" lo" ra". – Ishamela' kao daui bang: dayo: sam xe: nhaid' zin ngaid: ra". Ai: thao kao gain mung: shid: lo" yang: yao" phug' phyid' bam jhao" joe"
  • 18 lo" ra". – Yao: bam wa Ashura' mang: khyo ye" ra" gau: khyo Halila' vo mae" re Egutu ba thug' khyae: Shura' joe" sho' na: myi" lo" ko" ra". Ishamela' na jao: wa yao" mao: nhaung: alhab' mo, avai: ayae mae na ang:
  • 19 byaug: ra". – Ce gu: wa Abraham: yao: zo:
  • 20 Isag akaung jham ngaid: ra". – Abraham: zo: wa Isag , Isag wa kao byid xe ngaid: re , Padain: Aram: mae" Suri' byu Bethuela' yao: zo: Suri' byu La: Bain: nhae: mo"
  • 21 Rebedkha: we' ug' khug' vai" ra". – Isag wa yao: myi: bug daung: boe" mung: yao" tau: AsAng re mho' bain: mung: AsAng gyo: byid: yang: yao: myi: gaung la" li" ra". –
  • 22 Myhi" aung mae" zo nau" tao wa yao: cao: jho" khaid' ko" ra". Yao: myhi" wa ngo mae ceru: mung: ru wa pe" ru: ngaid nae" laug' i"? ga: mho mung: AsAng re myid' qu" nae" tau: to" ye" lo" ra".
  • 23 Aimung: AsAng wa ni" aung khug mae byu shid' myu" bo: ra". Ni" aung mae" majho" dau: ra" byu mo, zhain shid' Zhain khau: li" nae". Damyu" wa damyu" tho' mae qam: o: je: bo nae". Aqi: yaug wa angai yaug: jeim doe, nae" ngaid: ra"
  • 24 ga: mho: ra". – Khau yo, joe" lo: au: yao"
  • 25 aung mae zo: zam bo mung: – Saoqhid' khau: ra" yaug wa mug' yaug: ra" mairu" ru ngaid mung: gaung geim" ane ngaid: ra". Yao: re Eso" ga: mang mhang" byid' ra".–
  • 26 Thao mae" yao: nhaung: wa yao: mao: Eso" khunhag' thaung: thao mae zaui: ci yang: khau: li" ra". Ai: yaug re Yaku' ga: mhang" byid' ra". Ai: zoshao tao khau: ra" au: Isag wa kao khyaug' xe ngaid: ava".
  • 27 Ai: zoshao tao wa qi" qhang: lo mung: Eso" wa sho: kung" nyhug de, mung: seyo mae na yaug boe" ra". Yaku' wa nhag' lam: yin mung: yham mae khyao za: na yaug
  • 28 boe" ra". – Isag wa Eso" byid: zho" sho: re zo" na yang: Eso" re je: jhid' ra". Rebedkha: kam" wa Yaku' re jhid' de; ra" .
  • 29 Dane; ba mae Yaku' zo: shaug' jho' yhaung" na: au: Eso" wa seyo khyo"
  • 30 amyaung: adug joe" lo mung: . – Yaku' re ai: ne ne mung: zo: pho: ngo re zho: la, ngo taung" myaung" kyi: ga: mho: ra". Ai: mathao mae yao: re Edom: ga: mang:
  • 31 ru ngaid: ra". – Yaku' re: ana" ba yao: ni" mao: mo" aya: ngo re aung: byid: la, ga:
  • 32 mho: re , – Eso" re: ngo shid: lo" na: re mao: mo" aya" yang pe" so' ha" nae" ga:
  • 33 mho: ra". – Yaku' wa airu: ngaid: re ana" ba jham tang: wa, ga: mho: ra". Ai mung: Eso" jham tang: yang: yao" mao: mo" aya:
  • 34 re aung" pye' ra". – Ailao" Yaku' wa cin main" we' shigyao: zoxeim: re Eso" re byid: yang: yao: wa zo" gyi: mung: to" phao: lo" ra". Ai re" ru: Eso" wa yao" mao: mo" aya: re pe" shui manho kaid' pye' ra" .
回到本卷目录 回到本版本目录 回到首页