1 Mo"so: dao: thang" bain" Philisti mang:2 mae lho" nhaid' khye' lo" jo; jo, va". – Ai re Philisti byu qe wa khin jaung qe we' boe, ba: phyid' mo, re khai mung: Mo"so: bain" re khoru: kaid' nae"? Yao: to" ra" jao: khyo pe" jhaung qhu" yang nhao: ke' nae"? Pa:3 qu" ge, ga: myid: ko" ra". – Yao: bam wa Israel amyu" Mo"so: bain" re nhao: ke' re akeim wa danhao: ke' ge, . Qobo khyaid' ra" xeim: dau: wa bobyid' ke' ca" nae". Ai lao" za: naonhaung" no dae yo: lo" nae". Alao" za: pe" mung: yao" lo, mo" mashe: yu: ru qo" ha nae" ngaid: ga: ta" ko" ra". –4 Pe" ja: re qobo khyaid' xeim: dau: ein: byid' ke' nae" ga: myid: ko" re yao: bam wa Philisti zug: qe ange, nghe' yang: hhang mug:byang alho ngo" lam: , hhang qug alho ngo" lam: byid' ke' ca" nae". Naon- haung" we' naonhaung" zug: qe mae de;5 ra" no bug: daja: za: ngaid ko" ra". – Ai ru: mung: naonhaung" mae" mug: byang alho we' myid re phyo' qheim" ra" qug lho kaid' mung: Israel amyu" Mo"so: nga: re caung: khin" byid: ca" genae" . Alao" za: yao" lo, mo" naonhaung" we' naonhaung" mo"so: adao mae" re: , naonhaung" myid gaung mae" re: she: re she: yu: pye' li" nae". –6 Pharaoh jhaung zug: we' Egutu byu qe qao: ra" nhag' lam: bo ko" ru: pe" mung: qao: ra" nhag' lam: bo ko" i"? yao: bam re saung" yhin" lo lao" yao: bam wa Israel qe re nhao: ke' yang: ai bam byaung" lo" byaug; ako". –7 Ana", ngaid qere: lhin" asag' zhaug' yu mung: kyau: mavhin: qu" shi" , anau" jhui" ra" nung: zang shid' dau: re lhin" mae vhin mung: nung: nau" re wa yao" na jao: nung:8 zaung khyo taui" pye' ge, . – Mo"so: bain" re lhin" dao mae kai: mung: peim" ke' ra" qobo khyaid' jhaung qhu" hhang zai jham re bain" yae tau getau: bain" mae ke' mung:9 nhao: ke' ge, yao: za: lo" veshao: . – Bain" ai: ru yao: bam: mang: lo" ra" khyo Bedsh- emed vomo" gau: lo" va" lao" wa ai qam" aqi: poe" ke' ra" Mo"so yao: ngaid va". Ai ru: mangaid: lao" zaui" ci yang: ngon- haung" re mho" ru mangaid: mageim boe" ang yang: phau" ru angaid: ein: ru qo" ba zai ngaid: ga: jho" qham: ako".10 Ta" ko" we' dakhyo: byu qe kaid' yang: anau" jhui" ra" nung: jaung zang shid' dau: re lhin" mae vhin" mung: nung: nau" re11 yao" jo, qo tau taui" to" ako". – Mo"so: bain" we' daga" hhang qug jham , mug: byang alho jham bo: ra" bain" re re: lhin"12 mae kai: ko" ra". – Nung: jaung zang shid' dau: wa Bedshemed gau: khyo vang" vang" lo" mung: ein ba ga: myang: ye" lo" ra". Lo, yo , lo, vai: manghung: hau" mo" khyo din: za: ye" lo" ako". Philisti zug: qe wa Bedshemed vomo" joe" sho' bocao" ako". –13 Bedshemed vobyu qe wa lao: khaung: mae saung so yaid: na: ako". Yao: bam tau: qu" ke' ko" re bain" ai myao lao" gyai ngaui14 bau: ko" ra". – Lhin" wa Bedshemed vobyu Yoshu' yothaung: khug vao lo" mung: laug mo" baui dao mae lo" ye; thang: jo; ra". Ai jham wa lhin" ai re khyoe' mhain" pye' mung: nung: zang shid' dau: re wa Mo"so: qhid' mae" phaid' ngaui" xeim: kaid' ko"15 ra". – Levi byu qe wa Mo"so: bain" we' hhang zai bo: ra" bain" re khyo" yu mung: laug mo" baui dao mae kai" to: ko" ra". Bedshemed vobyu qe wa ai: ba re yao: Mo"so jhao" phaid' ngaui" xeim: we' zam"16 khug xeim: qhaug' byid' ako". – Ai: akhyo re Philisti zug: ngo" yaug; gu: ai re myao co' mung: ai: ba re yao: Ejhung: khyo lo" byaug ko" ra".17 Mo"so jhao" ga: peim" ke' ko" qobo khyaid' jhaung qhu" ngaid: ra" hhang mug: byang alho jham re wa Azug' vo tau: ga: da lam:, Gaza: tau: da lam: Ashakelung tau: da lam: , Gata tau: da lam: , Ejhung:18 tau: da lam: ngaid: ra". – Hhang qug jham wa Mo"so: bain" kai" to" ra" laug mo" joe" sho' vomo" ngaid qere: , seyo: vogaung: ngaid qere: Philisti zug: ngo" yaug we' tin" ra" vozo: vozang agu nghe' yang: ai: mae bo: gu: alhab' ngaid: ra". Ai: laug wa ana" ba Bedshemed vobyu Yoshu' yo khug mae jo; ra".19 Bedshemed vobyu qe Mo"so: bain" zao" qu" geyang: byu nhaid' xe we' ngo" tug re dae byid' ru phau" ako". Ai re" khyo: Mo"so: yang yao: bam re dae mo" phau: zo: nhao mung: byu qe ngug; yhai:20 na: bam ko" ra". – Bedshemed vobyu qe wa shao gyang" ra" ce: apyaid ato: Mo"so: qhid' kheim: mae kho yaug qo" ye; tang: jo, ko". Ngonhaung" jo, qo wa kho yaug na: ra" khyo ye" lo" nae" i" ga: ta" ako". –21 Kiyaredyarim vobyu qe jhao" byu nhao: ke' mung: Philisti byu qe Mo"so: bain" re dam: dai" byid: veko". Naonhaung" lo:yu gese, ga: pyang: ke' ko" ra".