1 Philisti byu qe Mo"so: bain" re yu yang: Ebeneza: vo mae" Azug' vo khyo yu: lo"2 ko" ra". – Mo"so: dao: thang: bain" re Dagon jung khyo vhao" mung: Dagon ayae3 mae to: ko" ra". – Azug' vobyu qe thao: ne, no' re" to" ko" re Dagon wa Mo"so: bain" qhid' kheim: myid gaung mae lang: mung: goe; pa" na: jo; ru myao: ako" , alao" yao: bam wa Dagon re tau: yhe' ke' mung: yao"4 jo, qo tau dam: zhaung: to" ako". – Thao: ne, no' re" dam: to" qu" ko" re Dagon wa Mo"so: bain" qhid' kheim: mae myid gaung tau lang" goe; pa" jo; ru the' myao: ra". Dagon au: we' lo, vo: shid' shaid' wa kham: zang dao mae gyug' kai" jo, mung: gaung lam: a cin lang" jo; ru the' myao:5 ako". – Ai mung: Dagon: khin jaung qe , Dagon jung yham khyo vao li" ko" khag' ngaid qere: Azug' mae jo; ra" kham: zang re ana" ba joe" sho' ma zao" nhao: ko".6 Mo"so: lo, lam" yang Azug' vo mug: khug mae" mo, re qi" thao" pyam" ra" ru we' phyo' qheim" ra". Damang: dae" byu qe re re: mug: byang no nhao yang: mho"7 shid' ra". – Azug' vobyu qe wa ai: mau" re myao gelao" yao: bam wa Israel Mo"so wa ngonhaung" we' Dagon so: adao mae la" ra" lo, mo" kai" ava" , ai ru: mung: Mo"so: bain" re ngonhaung" khug mae mato: lo:8 gejhao" ga: ta" ako". – Ai mung: yao: bam wa Philisti zug: ade, re khai: qham yang: Israel Mo"so: bain" ce re khoru: kaid' nae" ga: jho" myid: ko" ra". Yao: bam wa Israel Mo"so: bain" ai re Gata' vogaung: khyo yeto: ge, ga: jho" qham: ru we' ai: mae9 yeto" ako". – Ai: vogaung: mae yeto" to: thao Mo"so: lo, mo" wa ai: vomo" re qi" thao" phyo' qheim" khyo poe" ke' mung: vobyu aqi: angai alhab' re dae byid' ra"10 khyo" mug: byang phau: nhao: ra". – Dam: mung: Mo"so: bain" re Ejhung: vomo" khyo dai" ke' ko" ra". Ai: vo mae joe" lao" vobyu qe wa ngonhaung" we' ngonhaung" byu qe re se' nae" tau: Israel amyu" Mo"so: bain" re11 yu li" ko" i"? ga: hug' yang: ta" ko" ra". – Ai mung: yao: bam wa Philisti zug: ade, qe re cao" khai: qham mung: Israel Mo"so: bain" ce ngonhaung" we' ngonhaung" byu qe re ma zao" se' pye' shao: nhao: ke' gelang: . Yao" jo, qo tau lo" jo, shao: ga: mho: ako". Pe" mung: ga" re Mo"so wa gyai la" ra" lo, mau" re yao: bam: adao kai" ke' yang: da vogaung: geim" shid: gain: lo" ra" no dae12 ngae: je" lo" yang: ngaid: . – Shid no mae" loe, qere: mug: byang to" ra" qobo dae re phau: yang: ai: vogaung: zag: yao: ra" thoe mug: gaung khyo do, lo" ra".