1 Xo' yang: Israel byu qe wa AsAng Mo"so: qhid' kheim: mae qobo kaid' ko" ru mung: yao: bam re Midian: amyu" qe: lo, mae nhaid' zin lam: lam: qhaug' byid' ra".2 Midian: byu qe: yang Israel byu qe re aung: pye' mung: pyam" yhin" ko" mathao Israel byu qe wa bam mae gang" tang: ra" laug aug' , myid kyaung" dung: jham re3 kaid' yu: ako". – Israel byu qe yo bin: kaid' to: thao Midian: byu qe we' Amaled' byu qe ba thug' shaid' byu qe to" li" lo mung: –4 gyetab li" zhaug' yang: Gaza: vogaung: joe" sho' qhovo: qhoshi: zai" phyo' yhain" pye' gemung: zo" ra" ja: we' yao , caid' , gug' nyhug' jham re Israel mang: mae matang"5 to: lo: kaid' ko" ra". – Khoru: i" ga" re yao: bam: gug' nyhug' , seim zaung jham wa khyag' phaung" ru: myo: geyang: yao: bam: ma dae myao: jham matho' laug gemung:6 Israel mang: re phyo' do, lo: ako". – Israel qe wa Midian: byu qe: mathao: yang gyai sho: jhin gemung: AsAng Mo"so re zag: hug' yao: ke' ako".7 Ai re" khyo: Midain byu qe: mathao AsAng Mo"so jhao" hug' yao: ke' ko" au: –8 AsAng Mo"so wa lapa dayaug re Israel qe jhao" nhao: ke' mung: Israel qe: AsAng Mo"so mho: ra" dao: kheim: wa jeim toe' jao: Egutu mang: mae" naonhaung" re Ngo9 jhui" she: yu va". – Egutu byu qe: lo, mae" re: , pyam" yhin" mo; lo, khug mae" re: , naonhaung" re Ngo khyi: yu mung: yao: bam re naonhaung" qhid' kheim: mae" khe' pye' yang: yao: bam: mang: re gae10 byid: va". – Ngo wa naonhaung" AsAng Mo"so ngaid: . Naonhaung" bocao: na: ra" Amori' byu qe pa" kug' ra" mo"so jham re dagyaug ge, ein: Ngo khang" dao: khyo" to: va" qere: naonhaung" Nga" dao: re matae" gyo: ko" ga: mho: ra".11 Dam: AsAng Mo"so: mug: logyo: li" lo mung: Ophara vo mae" Abeza nhae Yosha' sang: ra" shiqae gae gyid' mae zaung: jo; ra". Yosha' yao: zo: Gidon: wa yao" gaug jham re Midian: byu qe mamyao lo: sho' ga: sabyi' pyag' ra" zaung mae gaug re pyag'12 na: ra". – AsAng Mo"so: mug: logyo: wa gaung li" qhu" mung: qam: bo: ra" sulhe: we" AsAng Mo"so wa nao we' daga" ana: na:13 ra" ga: mho: ra". – Gidon: wa AsAng we" , AsAng Mo"so wa ngo we' daga" bona: ru dang: ngaid: re pe" mung: ce ru: qug: khai: phau" i"?. AsAng Mo"so wa ngonhaung" re Egutu mang: mae" jhui" she: lo: mangaid: i"? ga: naonhaung" phug' pho" qe ta" ko" khyo: kaid' qhu" ra" mug' pho" mau" zo" jham wa khai: mae ngaid: ra". Ana" kam" wa AsAng Mo"so ngonhaung" re shelhaui: mung: Midian: byu qe: lo, mae qhaug'14 pye' va" mangaid: i"? ga: mho: ra". – Alao" AsAng Mo"so wa yao: re qu" zhaug' te' to: mung: ana" nao mae bo: ra" phung bao: yang ye: wa, . Nao Israel byu qe re Midian: byumyu" lo, mae" khyaid' yu wa, . Nao re Ngo nhao: mangaid: i"? ga: mho: ra". –15 Gidon: kam" wa AsAng we" ngo ru" yaug Israel byu qe re khoru: ba: khyaid' yu nae". Nga" ra" nhae jham wa Manashe: nhae qe mae je: myaung sho" ra" mo, ngaid: . Ngo re: ngonhaung" yham khaung qe: gu: mae wa goe" thao" yaug angaid: ga: phaug' jhau:16 ra". – Alao" AsAng Mo"so wa dang dang Ngo wa nao we' daga" ngaid: ru mung: nao byu dayaug re za: re" ru: Midian: byu qe re17 qo" se' pye' li" nae" ga: mho: ra". – Gidon: re: , ngo wa ni" qhid' kheim: myo, nho qo" yaug ngaid: re wa ngo we' jho" jhau yaug myhao" qhu" ra" khyo" ve, lho qhu" la, . –18 Ngo tug' lo" mung: nga" jhaung qhu" xeim: Ni" qhid' kheim: maqo" qhaug' byid: byid: wa ce: jo, qo mae" da lo" byaug lhe" ga: mho' vhao" re nao madam: li" lo lo wa Ngo na: na nae" ga: mho: ra".19 Gidon: wa tug' lo" mung: caid' nau" dadau: we' cinmain" dabye" yang bai" phaui: mabo: cinmain" lung: re jho' ra". Caid' sho: re gyain mae ke' mung: sho: kyug' qang: re ug' mae ke' yang: mug: logyo: na: ra" shiqae gae qao: mae li" qhaug' byid' ra". –20 AsAng Mo"so: mug: logyo: khyo" yang sho: we' bai" phaui: mabo: ra" cinmain" yho' re yu mung: laug baui dao mae kai" to: wa, . Sho: kyug' qang: re ai: tau vhe' gyain: wa, ga: mho lao" mho: ru: Gidon: zaui: so"21 ra". – Ai: au: AsAng Mo"so: mug' logyo: wa yao: ci: ra" zaung: bao" yang sho: we' main" phaui: mabo: ra" cinmain" yho' re tin" ke' lao" laug baui dao mae" myi: de; li" mung: sho: we' main" phaui: mabo: cinmain" yho' nga" jeim" byaug: ra". AsAng Mo"so: mug:22 logyo: re: byaug: lo" ra". – AsAng Mo"so: mug: logyo: ngaid: ru re Gidon: qo" ba lao" AsAng Mo"so we" ngo kam" wa AsAng Mo"so: mug' logyo: re myo, khung: zhaug'23 za: qo" the' myao va" ga: mho: ra". – AsAng Mo"so wa ngaui pyo: veshao: . Dagyaug24 wa, nao mashid nae" ga: mho: ra". – Ai: jo, qo mae Gidon: wa AsAng Mo"so: tau: ga: ngaui" phain kaid' mung: Yehova Shalom ga: mhang" ra". Ai: ru Abeza: nhae qe: jo, qo Ophara vo mae ana" ba joe" sho' jo; ra".25 Ai: myi re AsAng Mo"so wa ni" pho" nung: shain: lo: we' nhaid' zin bo: ra" shid' lam" nung: jaung lo: re yu yang: ni" pho" zhaug' to" Ba:la' mo"so re ngaui" byid' ra" phain re phyo' pye' wa. Ngaui" phain ayae mae" Ashera gae re re: thau: lhang" pye'26 wa, . – Ngo khang" to: va" we' dakhyo: ce: laug baui dao mae AsAng Mo"so: tau: ngaui" phain re tau: yhe' mung: thau: lhang" pye' sag' yang shid' lam" nung: re phaid' ngaui" yang: ngaui" xeim: to' wa, ga:27 mho: ra". – Gidon: re: yao" daui mung byu daxe yaug re khai: yu yang: AsAng Mo"so mho: to" khyo: zaui" ra". Yao: pho" yham byu jham re re: , vobyu jham re re: gyaug mung: na" re mavae" zaui: mung: myi" re28 zaui: so" ra". – Ne, seim no' re" vobyu qe to" li" ko" au: Ba:la' phain wa gyoe; lang: jo, mung: ayae mae" Ashera gae thau: lhang" to" ru , gethaung: sain tau: yhe' to" ra" phain mae shid' lam: ein nae" nung: lo: ngaui" byid' to: ko" ru re the' myao ko"29 ra". – Ai re myao lao" yao: bam wa ce khag' kaid' ru ngaid: ra" ga: dayaug we' dayaug jho" myid' ca: qu" ko" ra". Ai re damyo" wa Yosha' yao: zo: Gidon: kaid' ru ngaid:30 ga: mho ko" ra'. – Ai lao" vomo" byu qe wa Yosha' re , ni" zo: Ba:la' ngaui" phain re phyo' pye' mung: ayae mae" Ashera gae re thau: lhang" pye' ra". Ai mung: yao: re se' pye' nae" ngaid: . She: thug' ke' wa, ga:31 mho' ako". – Yosha' khyo" yang ai jham re Naonhaung" Ba:la' thao de, yang: kaid' genae" i"? yao: re khyi: yu genae" i"? yao: re bao" ra" yaug: wa ana" ne, seim ba gaung ma tau shi: re shid byaug veshao: . Ba:la' wa moso dang: ngaid: re ai re phyo' qeim" ra" yaug wa yao" gaung yao: qobo lau:32 veshao: ga: phaug' jhau: ke' ra". – Ce re" khyo: Ba:la' so yao" ngaui" phain re dayaug phyo' lhaui" pye' ru mung: ai: yaug: adao mae yao: re phau: zo: veshao: ga: mho yang: yao: zo: re ai: ba mae" Yeru-Bala ga: mhang" pye' ra".33 Ai: ayo, Midian: mang: byu , Amaled' mang: byu , ba thug' shaid' mang: byu qe wa ceim" qham phaung yang: Yeza- rela lao: khaung: khyo" yang gyetab nha:34 to" ako". – AsAng Mo"so: Solo wa Gidon: adao mae vao: gyo" mung: yao: labo" maid ke' ra" mathao Abiza byu qe bocao" yain"35 ako". – Logyo: qe re: Manashe: mang: dau cao" yang: nhao: ke' mung: Manashe: nhae qe re: bocao" qhain" lo: ako". Ai: thao Asha mang: , Zabulun: mang: , Nabthali mang: dau khyo logyo: to' ke' mung: ai mae" byu qe re: bo cao" zang" qhain" lo ko" ra".36 Gidon: khyo" re: AsAng Mo"so jhao" AsAng we" Nao pin: to: va" we' dakhyo: nga" amyu" re ngo khyo" khyaid' yu zai37 dang: ngaid: re – ngo khyo" yao dadau" amug' zam jao: mae to" to: nae". Yao mug' nghin jhug' yang: zam jao: dadae: geim" kyaug' khyi li boe" ngaid: re pin: to: va" khyo: Israel qe re ngo khyo" khyaid' yu zai ngaid: ru re ngo qo" ba: yu nae" ga: mho'38 ru dakhyo: boe" dang: lo: ra". – Ne, seim no' mae" to" yang: yao mug' jhab' qu" re nghin qang: wa geim: dalam: byang" sho'39 ngaid: . – Xo' yang: Gidon: wa AsAng we" nhag' dayo: . Dalhang dam: mho' qu" shi: nae". Yao dadau" amug' yang ana" dalhang kin: qu" nae" akhang" byid: shi: la, . Zam jao: dadae: geim" wa nghin jhug' yang: yao mug' wa kyaug' khyi li" ngaid: shao:40 ga: mho' ra". – Ai we' dakhyo: ai: myi re: AsAng Mo"so: poe" ke' ru mung: myid gaung dao jao: geim" jhug' jo, qere: yao mug' wa vhai vhai za: ngaid: jo; ra".