1 Levi' kaung yham khaung cao" yang: zug: ade, qe wa khin jaung Eliza , Nun" yao: zo: Yoshu' , Israel amyu" zo: qe: zug:2 ade, qe jhao" te' ye: mung: , – ngonhaung" na jao: vo jham re re: , gug' nyhug' na mug: re re: byid: nae" tau: Mo"so: yang Moshe re mho: to: co' va" ga: Khanain: mang: Shilo:3 vomo" mae ye ta" ako". – Ai ru: mung: Israel amyu" zo: qe wa Moshe mho: to: co' va" we' dakhyo: yao: bam yao: sang: ci va" mug: myid khug mae" vomo", myid gaung jham re byid: ko" ra".4 Pha" se: khyo" yang: Kohad kaung yham khaung cao" mung: qo" yu: ra" myid gaung mae Levi' kaung khin jaung Arun" zo: myid: qe pha" se: khyo" yang: qo" yu: ra" mang: wa Yuda mang: , Simun mang: , Benyamin: mang: khug mae daxe: sam5 vo qo" sang: yu: ako". – Dang shi" Kohad kaung qe wa Ephrim: , Dain: , Manashe: mug: khug mae" daxe vo re qo" ako".6 Gerashon: kaung qe pha" se: khyo" yang: qo" the' yu: ru wa Iskha , Ashe: , Nabtali , Bashain: mang: khug mae" Manashe: mug: dakhyae: akhug mae" daxe: sam vo re qo" yu: ako".7 Merari zo: qe yham khaung cao" yang: Rubin: , Gaid' , Zabulun: mang: khug mae" daxe: shid' vo re qo" yu: ako".8 Mo"so: yang Moshe khyo" mho: to: va" we' dakhyo: Israel amyu" qe wa pha" se: khyo" yang: ai: vomo" we' vomug: jham re Levi' kaung qe jhao" kho' gae: byid'ako".9 Yuda kaung , Simun kaung qe: mug: mae Levi' boe: ngaid: ra" Kohad kaung –10 Arun: zo: myid: qe sao qhid' lhang pha" se: khyo" yang: byid' ra" vomo" jham:11 mang wa – Yuda mang: bam mae Hebron mang: ra" Anaka yao: pho" Abaneto" vo re vomang: we' daga" kho' byid' ra". –12 Ai qere: vo zang we' tin" ra" yo jham , vogaung: jham re Yephuna: yao: zo: Kaleb' re byid' pye' ako".13 Byu: kao zao" se' ra" yaug phao: vho' nae" vo ngaid shao: ga: Hebron vomo" re vomang: we' daga" khin jaung Arun" zo:14 myid: qe re byid' ako". – Ai mae" getau Libana we' yao" vomang: , Yati we' yao" vomang: , Eshatemo" we' yao" mang: –15 Holon we' yao" vomang: , Debira we' yao"16 vomang: , – Aisna we' yao" vomang: , Yuta we' yao" vomang: , Beshemed we' yao" vomang: ngaid: ra" gug vomo"17 re re: – Benyamin: mang: khug mae" Gibeon we' yao" vomang: , Geba we' yao"18 vomang: , – Anatug' we' yao" vomang: , Alamung: we' yao" vomang: ngaid: ra" vo19 zang byid lam: re re: byid' ako". – Arun: zo: myid: qe qo" yu: ra" vozo: vozang alhab' re vomang: bobo: ra" vomo" daxe: sam vo ngaid: .20 Dang shi" ra" Kohad kaung yham khaung qe ngaid: ra" Levi' boe" qe pha" se: khyo" yang: the' yu: ra" gae bam wa21 Ephrim: mang: khug mae bo: ra". – Byu: kao the' zao" se' ra" yaug phao: khug nae" vo ngaid shao: ga: Ephrim: bam mug: mae Shekhim: vomo" re yao" vomang:22 we' daga" byid: ko" ra". – Ai mae" getau Geza we' yao" vomang: , Kipazin we' yao" vomang: , Behorung: we' yao" vomang:23 ngaid: ra" vo zang byid vo re re: , – Dain: mug: myid khug mae" Eliteka we' yao" vomang: , Gibethon we' yao" vomang: , –24 Aiyolon we' yao" vo mang: , Gatarimon we' yao" vomang: ngaid: ra" vo zang byid vo re re: ,25 Manashe: mug: myid dakhyae: khug mae Tanad we' yao" vomang: , Gatarimon we' yao" vomang: ngaid: ra" vozang shid'26 vo re re: byid' ako". – Dang shi" Kohad kaung qe: yham khaung cao" yang: the' yu: ra" vo zang vomang: jham alhab' wa daxe vo ngaid: .27 Levi' kaung , Gershon: kaung re: re: , Manashe: mang: dakhyae: khug mae byu: kao zao" se' ra" yaug phao: khug nae" vo Bashain: mang: tau Golain we' yao" vomang: , Beshatera we' yao" vomang: ngaid: ra" vo zang shid' vo re re: , –28 Iskha mang: khug mae Kishun: we' yao" vomang: , Dabare we' yao" vo mang: , –29 Yamug' we' yao" vomang: , Engannim: we' yao" vomang: ngaid: ra" vo zang byid vo30 re re: , – Asha: mang: khug mae Mishala we' yao" vomang: , Abadon: we' yao"31 vomang: – Helakad' we' yao" vomang: , Yahoba we' yao" vomang: ngaid: ra" vo32 zang byid vo re re: , – Nabathali mang: khug mae byu: kao zao" se' ra" yaug phao: khug jao: , Galile mug: khug mae Kade- sha we' yao" vomang: , Hamudo we' yao" vomang: Kartan ngaid: ra" sam vo re re:33 byid' ako". – Gershon: zo: myid: qe yham khaung cao" yang: qo" ra" vozo: vozang alhab' re daxe: sam vo ngaid: .34 Dang: ra" Levi' kaung Merari kaung yham khaung cao" yang: Zabulun: mang: khug mae Yokamean we' yao" vomang: ,35 Kata we' yao" vomang: , – Dimna we' yao" vomang: , Nahalala we' yao" vomang: ngaid: ra" vozang byid vo re re: ,36 Rubin: mang: khug mae byu: kao zao" se' yaug phao: khug nae" jao:, seyo mae Beza we' yao" vomang: , Yahaza: we' yao"37 vomang: , – Kedamug we' yao" vomang: , Mephad we' yao" vomang: ngaid: ra"38 vozang byid vo re re: – Gaid' mang: khug mae byu: kao zao" se' yaug phao: khug jao: , Gaid' mang: mae Yamug' vomo" we' yao" vomang: , Mahanim: we' vomang: , –39 Heshabung: we' yao" vomang: , Yaza we' yao" vomang: ngaid: ra" vozang byid vo re40 byid' ako". – Dang shi" Levi' kaung Merari kaung qe pha" se: khyo" yang: the' yu: ra" vozo: vozang alhab' re daxe: shid' vo ngaid: .41 Israel amyu" qe na: ra" mang: din" khug mae Levi' kaung qe na: ra" vomo" alhab' qhain: , vozo: vomang: bin sho' re byid xe:42 she' vo ngaid:. – Ai: vomo" alhab' jham wa yao" vomang: we' yao: jab jab ngaid: ra".43 Mo"so: yang Ngo byid: nae" ga: phug' pho" qe re nhang: kheim: ke' to: va" mang: din" alhab' re Israel qere byid: va" ru mung: khag' re: khag' kaung: myid gaung qo" the'44 sang: yu: aveko". – Phug' pho" qe re dao: so: byid: va" we' dakhyo: avai; ayae jo, qo khao: ngo" mae myain yo: ra" khyo byid: mung: , yao: bam: qhid' kheim: mae" pe" ru" gyevo qe re: mavae" na ko". Gyevo alhab' yao: bam: lo, mae byid' pye' ra". –45 Mo"so khyo" mung: Israel amyu" zo: qe: tau: mho: to: va" min jhaung: daja: re: mayeim" lo: alhab' lhab' dang: lo: ava".