1 Yoshu' yang Yerikho" we' mang: zug: re kaid' ru , A:I' vomo" we' mang: zug: re jhaid' za: se' tam" pye' ga" ru re re: , Gibeon mang: byu qe Israel amyu" zo: qe we' lozam" lokhug kaid' , mung: zam" na ko" ga" re re: Yerusalem mang: zug:2 Adonizede the' gyo: lao". – Gibeon vo wa vomo" jhaung qham ru: qi" ra" vo , A:I' vomo" tho' qi: mung: vobyu yaug gai alhab' bam wa qam: qi: gemung: gyai gyaug na:3 bam: ako". – Ai: au: Yerusalem mang: zug: Adonizede wa Hebron mang: zug: Hahan , Yamug' mang: zug: Pyinan: , Lakhisha mang: zug: Yapha , Egalon: mang: zug: Debira bam jhao" logyo: nhao: ke' ra". –4 Yao: bam re Gibeon vomo" wa Yoshu' we' Israel bam jhao" de, yang: lozam" lokhug kaid' veko" ru mung: ai: vomo" re se' tam" pye' nae" tau: nga" jhao" li" lo ge, ngo we' daga" ceim" se' gelang ga: mho: ke' ra". –5 Amung: Yerusalem: mang: zug: , Hebron mang: zug: , Yamug' mang: zug: , Lakhisha mang: zug:, Egalon: mang: zug: jham ngaid ko" Amori' zug: ngo" yaug qham phaung kaid' mung: yao: yao" gye se' sulhe: qe we' daga" gye to" yang: Gibeon qhid' kheim: mae gyetab to: zo" gye khe' ako".6 Gibeon vobyu qe wa Yoshu' na: ra" Giligala vomo" khyo logyo: nhao: ke' mung: ni" jeim ngonhaung" re mageim: daqu" nha: to: . Phyaid za: li" lo mung: bao" thaug' khyi: yu la, . Bam dao mae na ko" Amori' mang: zug: qe qhain: yang: ngon- haung" re gye se' nae" ga: mo, khain khain7 veko" ga: kyo" ke' ra". – Yoshu' wa gye se' mau" jhao: ra" qam: bo sulhe: jham we'8 daga" Giligala mae" do, lo" ra". – Mo"so: yang re: yao: bam re dagyaug . Ni" lo, mae Ngo qhaug' nae". Ni" qhid' kheim: mae byu dayaug lao" maqo" ye; na nae" ga: Yoshu'9 re mho: ra". – Yoshu' wa Giligala mae" da myi khyeim do, lo" mung: gye jham10 re nyag we' ke' gye khe' yang: – Mo"so: yang yao: bam re Israel amyu" zo: qe: qhid' kheim: mae gye seim" nhao: ra". Gibeon vo yae mae xo sho' gye jho" se' mung: Behoron khyo do, lo" ra" gau: khyo" cao" yang: Azeka we' Makeda vo joe" sho' cao"11 khe' se' ako". – Ai bam wa Israel qe: qhid' kheim: mae phao: lo" mung: Betahoron gyo" lo" ra" mae" Mo"so: yang mug: tho' mae" lag qu qi: re Azeka vo joe" sho' yao: bam: adao qu: khyo" ke' mung: yao: bam Israel qe: shae mae shid: ra" tho' lag qu: yang shid: gain: pye' ako".12 Ai re" ru: Amori' byu qe re Israel amyu" zo: mae qhaug' byid' ra" ba re , Yoshu' wa Mo"so jhao" jhaung: mho' yang: o" ba we" nao wa Gibeon vomo" re re: , o" lho" we" nao wa Ayalung: lao: khaung: mae re: sae za: tae" to: byid: la, ga: Israel qe: qhid'13 kheim: mae mho: ra". – Ai we' dakhyo: Israel amyu" zo: qe gyevo re dae co' mabin: phaug' phaug' wa ba re: sae za: tae" jo, mung: lho" re: thang: jo; ra". Yasha: nho: tung" paug' mae bo: ru wa mug: le; phyo: mae" ba wa ye; thang: jo; ra". Ba vao nae" ru: seim" ru daba kho myao" ra" mangaid:14 i"? – Mo"so wa byu: dao: tae" gyo: mung: ai ru" ra" akhyo dane, re: maboe" qu". Thao re: maboe" lo: nae". Pe" mung: ga" re Mo"so wa Israel qe: thao de, yang: gye khe' ru ngaid: ra".15 Ai: thao Yoshu' wa Israel amyu" zo: qe we' daga" Giligala khyo dam: lo" byaug: ako".16 Mang: zug: ngo" yaug re: tao" phao yang: Makeda akhyaung mae vho' na:17 ako". – Makeda akhyaung mae vho' na ko" mang: zug: ngo" yaug re ye the' myao va"18 ga: Yoshu' re kyo" ke' ako". – Alao" Yoshu' wa akhyaung kham: mae gyai qi" ra" laug jhain" nghoe' to: mung: lhaug' byu nha: to:19 ge, . – Naonhaung" kam" wa dathang: na ge, . Gyevo re cao" khe' mung: myhi mae" myhi se' pye' ge, . Vomo" khyo davao ge, . Naonhaung" Mo"so apyaid ato: Mo"so wa yao: bam re naonhaung" lo, mae qhaug'20 byid' to: va" ga: mho: ke' ra". – Yoshu' we' Israel byu qe wa gyevo qe re thao" lo" sho' cao" se' tam" pye' mung: dang: ra" damyo" wa gang" tang: ra" vomo" khug khyo vao:21 pye' ko" ra". – Byu qe wa Yoshu' na: na: ra" Makeda khyo yaug yo za: dam: tug' lo ko" ra". Israel byu dayaug re lao" qobo maqo" vhin ngaid: ra".22 Yoshu' re: akhyaung kham: phung" ke' yang: ai: mang: zug: ngo" yaug re akhy- aung" khug mae" she: thug' mung: ngo23 jhao" jhui" lo geri: ga: mho: ke' ra". – Yao: bam re phung" ke' mung: Yerusalem zug: , Hebron zug: , Yamug' zug: , Lakhisha mang zug: , Egalon: mang: zug: ngo" yaug re akhyaung khug mae" she: thug' yang:24 Yoshu' jhao" jhui" lo ko" ra". – Ai: mang: zug: jham re Yoshu' jhao" jhui" lo veko" ru mung: Yoshu' wa Israel byu alhab' re khai: yu mung: yao: we' daga" gye se' to" ye" ra" gye au: she qe re qui" lo geri: , ce: mang: zug: qe: lang zang: zab ge, ga: mho: ra". Yao: bam re: qui" li" mung: ai: mang: zug: jham: lang zang: re zab byid'25 ako". – Yoshu' re: naonhaung" gye kaid' ko" gyevo alhab' re Mo"so: yang ceru: kaid' zai mung: dagyaug ge, . Nhag' lam: dangai ge, . Qam: phin: yang: qhao: ge, ga: yao:26 bam re aung lham" nhag' tang" ra". – Ai ru: ga: bin: mho thao Yoshu' wa mang: zug: qe re qam" pye' mung: sag' gae ngo" gae mae lhao" to" ra". Yao: bam re myi"27 thao: dau joe" sho' lhao" to" ako". – Ba vao thao za: Yoshu' mho: ke' we' dakhyo: sag' gae mae" khyo" yu yang yao: bam vho' na: akhyaung mae ke' zaui: to: mung: akhy- aung kham: mae laug baui gyai myo: sho' yang jhid' to" ako". Ai: laug bam ana" ba joe" jo; jo; ra".28 Ai: ba re Yoshu' wa Makeda vo re qo" se' aung: yu mung: vo we' mang: zug: re shae: yang mho" pye' ra". Vomo" mae na ko" byu alhab' bam: re dayaug lao" madang sho' jhaid' za: phyo' se' pye' ra". Yerikho" mang: zug: re kaid' ru: Makeda mang: zug: re re: kaid' ra".29 Ai: thao Yoshu' wa Israel amyu" zo: qe we' daga" Makeda mae" ru Libana vomo"30 khyo ye: yang: gye zin" ra". – Mo"so: yang ai: vomo" we' mang: zug: re Israel qe: lo, khyo qhaug' byid: mung: vo we' vobyu alhab' dayaug re lao" matang" shae: yang se' tam" pye' ra". Yerikho" mang: zug: re kaid' ru: ai: mang: zug: re kaid' ra".31 Yoshu' wa Israel byu qe we' daga" Libana mae" Lakhisha khyo ye: mung:32 gye ye zin" ra". – Mo"so: yang ai: vomo" re Israel qe: lo, mae qhaug' byid: mung: thao: ba re zag: aung: yu: pye' ra". Libana re kaid' ru: ai: vomo" we' vobyu alhab' re shae: yang se' pye' ra".33 Ai: au: Geza: mang: zug: Hoyam wa Lakhisha vo re bao" nae" ga: li" ru mung: Yoshu' wa ai: mang: zug: we' yao" byu alhab' re dayaug lao" madang lo: jhaid' za: mho" pye' ra".34 Xo' yang: Yoshu' wa Israel byu qe we' daga" Lakhisha mae" Egalon: vomo" khyo35 gyetab zhaug' yang: gye lo" zin" ra". – Ai: ba re yao: qo" se' aung: yu yang: Lakhisha re kaid' ru: ai: vomo" we' vobyu alhab' re shae: yang daba za: mae jhaid' za: qo" zin" pye' ra".36 Dam: dalhang Yoshu' wa Israel amyu" zo: alhab' we' daga" Egalon mae" Hebron37 vomo" khyo gye ye: zin" ako". – Qo" aung: yu lao" Egalon: vomo" re kaid' ru: ai: vomo" we' mang: zug: re re: , ai: vo we' tin" ra" vomo" mae" alhab' re re: , vobyu alhab' re dayaug lao" madang lo: shae: yang se' tam" pye' mung: vo we' vobyu alhab' re jhaid' za: se' nhau" pye' ra".38 Yoshu' wa Israel amyu" zo: qe we' daga" Debira vomo" khyo tug' lo yang: gye39 lo: zin" ra". – Ai: vomo" we' mang: zug: re re: , ai: vomo" we' tin" ra" jo, nam alhab' rere: , aung: yu mung: shae: yang vobyu alhab' dayaug lao" madang jhaid' za: se' tam" pye' ra". Hebron we' Libana vomo" mang: zug: re kaid' ru: Debira we' mang:40 zug: rere: kaid' ra". – Ai re" khyo: Israel Mo"so pin: to: va" we' dakhyo: Yoshu' wa bam mug: cao" yang: re: , qid bang: shaid' khyo re: , lao: khaung: , qid zo: qid zang jo, mae" jo, mae" mang: zug: alhab' re cao" se' mung: kao daui: ra" byu dayaug lao" matang" jhaid' za: se' tam" pye' ra". –41 Kadesha-bana mae" ru Gaza: vomo" joe" sho' mae re: , Goshen: damang: geim" we' daga" Gibeon vomo" joe" sho' se' aung: yu: ra".42 Israel Mo"so apyaid ato: Mo"so wa Israel qe: thao de, yang: gye se' ru mung: ai: mang: jham we' mang: zug: qe alhab'43 re dadae mae za: aung: yu: pye' ra". – Ai: thao Yoshu' wa Israel amyu" zo: alhab' we' daga" Giligala: na qao: khyo dam: lo" ra".