1 Ana" Levi amyu" Kohad' kaung mae" Izeha" yao: zo: Kora' wa Rubin: kaung Eliaba' yao: zo: Dathain: we' Abiram: , Peled' yao: zo: O" na' bam re khai: yu2 mung: , – volo phaung mae myo, nho nga: qo" ru we' ai: mo, phaung mae bo: ra" agyi kaid' ra" Israel amyu" zo: shid' yo: ngo" xe we' daga" Moshe re tau: lhain: mung: , –3 Moshe we' Arun: tao mae" phao: thug' yang: ni" shid' zo: wa saung" yao: xo ko" ra". Volo byu alhab' wa shao lho" ru za: ngaid ko" ra". Mo"so re: yao: bam we' daga" na va". Ai ru: mung: ni" shid' zo: wa Mo"so: volo byu qe: dao mae pe" mung: ni" shid' zo: yao: ngaid beim: ko" i"? ga: mho ko" ra".4 Ai ru: ga: mho thoe gyo: lao" Moshe5 goe; gam" na: ra". – Kora' we' yao" thao de, mo, re re: , khoyaug wa Mo"so: byu ngaid: ru re re: , khoyaug wa shao lho" ru re: , khoyaug re yao: jhao" jhui" te' yu nae" ru re: , ne, mo" ba Mo"so qhu" li" nae". Khyin: yu: ra" yaug re re: , yao" nhae khyo6 jhui" te' yu: li" nae". – Kora' we' yao" thao de, mo, we" naonhaung" ceru: kaid' ge, . –7 Bo" lang" yu mung: ne, kao Mo"so: qhid' kheim: mae bo" mae Lo:bain: we' myi: kai: mung: ci: li" ge, . Ai: au: Mo"so khyin: yu: ra" yaug wa shao lho" ra" yaug ngaid shao: . O" Levi zo: qe we" naonhaung" saung" yao:8 xo veko" ra" ga: mho: ra". – Dam: Moshe wa Kora' we' Levi zo: qe we" tae" gyo:9 ge, . – Naonhaung" wa Mo"so: seim zaung mae mau" vin vo, mung: volo byu: qhid' au: mae ye, yang: yao: bam: mau" re vin vo, nae" myid: nghae" ru we' Israel qe: Mo"so wa naonhaung" re khai: yu mung: jo, qo byid: nae" tau: Israel volo mo, phaung we'10 kho' khaui" to: mung: , – nao re re: , ni" mao: ni" nhaung: bam Levi zo: qe alhab' re re: , yao" nhae mae na nhao: ra" jeju re maphug' makhyaid' kaid' mung: khin jaung11 aya: re qho genhaung i"? – Ai ru: mung: nao we' ni" thao de, mo, alhab' geim" wa Mo"so re tau: lhain" na genhaung i"? Arun: re qobo zhaug' nae" wa yao: pe" ru" yaug ngaid: ra" i"? ga: mho mung: ,12 Eliaba' yao: zo: Dathain: we' Abiram re ye: khai nae" byu nhao: ke' ra". Yao: shid' zo: re: nga" shid' yaug mali" nae" ga: mho13 ko" ra". – Nao wa ce: seyo segae: mae ngonhaung" re se' mung: nung: nug' byo: yhid , yug: ra" mang: mae" ngonhaung" re khe' thug' pye' ru za: nhag' mashid ana" re: ngonhaung" adao mae zug: agyi akaid'14 nug; shi" i"? – Ai: tho' mago" nung: nug' byo: yhid , yug: ra" mang: khyo nao ngo- nhaung" re majhui" lo", yo thaung: yo gug jham sabyi' khyae jham re re: mabyid: lo: , ce: byu qe: myo, jid' jham re thug' phaug' pye' nug shi" i"? nao jhao" nga" shid' zo: mali" nae" ein: dam: phaug' tau" ke' ko" ra".15 Alao" Moshe wa nhag' gyo" gyid' mung: Mo"so re ce: byu jham caung da" ra" jhaung qhu" re dakhae: yu byid: la, yao: bam: myao: dadau: re re: ngo mayu: qu" , yao: bam dayaug re re: ngo mapyam" qu"16 ga: mho: ra". – Moshe wa Kora' re nao we' ni" thao de, mo, alhab' wa Arun: we' daga" ne, mo" ba Mo"so: qhid' kheim: mae17 na lao: ge, . – Naonhaung" yaug nge, yao: yao" bo" lang" yu mung: Lo:bain: ke' mung: naonhaung" alhab' myi: bo" alhab' re shid' yo: ngo" xe Mo"so: qhid' kheim: khyo ci: li" ge, . Nao we' Arun: re: yao: yao" myi: bo"18 ci ge, ga: mho: ru we' dakhyo: , – ai: byu qe yaug nge, wa yao: yao" bo" re yu mung: myi: we' Lo:bain: re ke' mung: Moshe , Arun: we' daga" volo seim zaung kham:19 dung: mae li" ye; byaung" na ko" ra". – Ai re" ru: Kora' wa yao: shid' zo" qhid' kheim: mae volo byu qe re seim zaung mae khai: ham: nha: to" ra". Alao" Mo"so: phung bao wa bao: thug' li" ra".20 Mo"so wa Moshe we' Arun: re dam:21 mho: ru wa , – ce: volo mo, byu qere ana" yao: se' jheim" pye' nae" , nao tao yao: bam we' lin: lin: na ge, ga: Moshe we' Arun:22 re mho: ra". – Yao: tao kam" goe; gam" mung: AsAng Mo"so we" , na mae: na alhab' jao khae o: go: ci: ra" Mo"so we" byu dayaug shaid' nghung" ra" qobo: mathao mae volo mo, phaung re nhag' gyid' nae"23 i" ? ga: mho' bain: ko" ra". – Alao" Mo"so re: , Kora' , Dathain , Abiram: bam: seim24 zaung re jao" lha" genae" tau: , – volo mo, byu qe ta" shid' kyo: wa, Moshe mho: ru we' dakhyo:,25 Moshe wa to" ye; lo" mung: Israel amyu" zo: kao qi: va" mo, we' daga" Dathain:, Abiram: jham jhao" ye: mung:, –26 ce: makhyang: mashab: ra" seim zaung re jao" lha" mung: na: bam ge, yao: bam: zai jham re re: dathe' tin: ge, . Ai ru: mangaid: re yao: bam: qobo: mathao mae byo, qeim: ru qhug' genae" ga: volo mo, byu jham27 re mho: kyo: ko" ra". – Ai ru: mung: byu jham wa Kora', Dathain: , Abiram: bam: seim zaung lhang" gam: mae" phao: qhui" lo" ko" gemung: , Dathain: , Abiram: re: myi: zo: qe we' daga" thug' li" mung: seim zaung kham: dung: mae ye; na: bam ko"28 ra". – Alao" Moshe wa ce: mau" alhab' wa nga" nhag' myid khyo" kaid' ru mangaid: . Mo"so kaid' nhao yang: ngo kaid' ru re naonhaung" khoru: ba: myao: yu nae" ga"29 re , – sosu byu qe phau" ra" shid khyo volo sosu byu qe re mho" shid' ru za: ce bam phau: ko" ngaid: re Mo"so nhao: ke' ru ngo30 mangaid: . – Ai ru: mangaid: , Mo"so wa khyo gegau: re nyhang" yang: myid gaung bag: go; li" mung: cebam re re: , yao: bam we' tin" ra" gu: alhab' re re: , myug: pye' mung: yao: bam wa adaui phe, phe, shid zug' mug: khyo gyo" lo" re Mo"so re shaid' nghung: veko" ru re naonhaung" ba: li" genae".31 Dao: thao zo; ru we' yao: bam zab: ci: ra" myid gaung wa go; gyae" li" mung: , –32 myid gaung nhaid' ho" yang: yao: bam we' yao: bam: yham byu alhab' re re: , Kora' we' tin" ra" mo, we' yao: bam: zai33 yo alhab' re re: myug: pye' ra". – Yao" gaung khyao mae" da du yao: bam we' tin" ra" mo, alhab' we' daga" adaui phe, phe, shid' zug' mug: khyo gyo" lo" mung: myid gaung wa dam: jid' lo" yang: yao: bam re volo byu phaung mae" qab: pye' ru qhug'34 ko" ra". – Yao: bam zag: gyi: hug' ra" thoe re lhang" gam: mae na: bam ko" ra" Israel amyu" jham the' gyo: ko" re ngonhaung" re re: myug: re myug: li" nae" ga: gaung yug sang: kho: mung: phao: sin" lo" ko" ra". –35 Lo:bain: ngha" hab' ngaui" ko" ra" mo, shid yo: ngo" xe yaug re re: Mo"so mae" myi: gyo" li" mung: nga" shid ko" ra".36 Mo"so wa Moshe re mho: ru wa ,37 Ai: shao lho" ra" bo" re gaug: yu yang:38 myi: vhe' khyo" pye' bin lao", – Yao: yao" kao re phyid' sho' zai" shaid' nghung: ko" ra" mo; bo" re phain nghoe' kaid' nae" gyid: ne bo" re be; pye: nae" tau: khin jaung Arun" yao: zo: Eliaza: re ta" wa, . Ai: bo" jham shao lho" ru ngaid mung: Israel amyu" mae so: xam: ngaid veshao: ga: Moshe re39 mho: ru we' dakhyo: , – Khin jaung Eliaza: re: , myi: nga" shid phau: ko" ra" mo, caung da ko" ra" bo" jham re yu mung: phain40 nghoe' gyid: ne bo" re be; ra". – Arun" kaung mangaid' ra" getau: kaung qe wa ngha" hab' ru caung da" ra" khyo" yang Kora' we' yao" bo: de, mo, re" ru: maboe" nae" tau: Mo"so wa Moshe nhaid' thoe khyo" pin: to" ru we' dakhyo: ai: bo" jham wa Israel amyu" zo: qe re mho" shid' ra" so:41 xam: ngaid: ra". – Thao: ba: ne, mae Israel volo byu qe wa ni" shid' zo: wa Mo"so: byu zo: qe re se' vegenhaung i"? ga: mho mung: Moshe we' Arun: re qobo vhin ru we' nyung ko" ra".42 Ai re" ru: volo byu qe Moshe we' Arun: jhao" mae ham: na ko" au: , volo seim zaung khyo lhang: qu" ke' re , jham thaui wa volo seim zaung re nghoe' gam mung: Mo"so: phung bao bao: qhi: jo; ra". –43 Moshe we' Arun: wa volo seim zaung44 khyo qui" ye: ko" ra". – Mo"so re: volo byu45 qe jao" mung: na ge, – Ngo wa ana" jao" yao: ce bam re se' pye' nae" ga: Moshe re mho lao" yao: bam wa goe; gam" yang: na:46 na ko" ra". – Moshe wa Arun: re nao bo" lang" re yu: ci mung: phain dao mae" myi: we' Lo:bain: re yu: ci mung: volo byu qe jhao" phyaid phyaid ye: yang: qobo khyaid' mau" re kaid' wa, Mo"so nhag' gyid' mung: qug: khai: qhug' veko" ra" ga: Arun: re47 mho: ru we' dakhyo: , – Arun: wa ai jham re yu: ci mung: volo byu phaung khyo tao" ye" ra". Ai: au: volo byu qe qug: khai: qhug' qhid: mung: Lo:bain: re bo" mae" phyu" ke' yang: yao: bam: qobo khyaid' mau" re kaid'48 ra". – Daui: na shi" mo, we' shid va" mo, agyo: mae ye; jo, mung: qug: khai: no" lo"49 thang: lo" byaug: ra". – Kora' mathao mae shid: ra" mo, mabo lo: ai: qug: khai: mae boshid: ra" mo, alhab' re datug: byid taung:50 nhaid' yo bo: ra". – Ai: qug: khai: thaung: no" lo" lao" Arun: wa volo seim zaung kham: dung: Moshe jhao" dam: lo"ra".