1 Mo"so wa Moshe re dam: mho: ru wa , nao Israel zo: myid: qe re ceru: ein: ta"2 shid' kyo: wa, . – Ngo naonhaung" re byid: nae" mang: din" khyo joe" lo" ko" ra" au: , –3 Dao: so: to: mung: caung da" ngaid qere: , caung da" nug yang: ngaid qere: , poe kaid' mung: caung da" ngaid qere: , myi: phaid' ngaui" xeim: jham , getau: xeim: re myi" yang caung da" mung: yao , nung" yang Mo"so re nae ham" xeim: ngaui" nug4 ko" ngaid: re , – Mo"so re xeim: qhaug' ngaui" yaug wa yao nau" yang caung da" re , ngha" ngaui" xeim: ngaid ngaid getau:5 xeim: ngaid ngaid , – xeim: dau: we' daga" gaug zo xeim" tau: xau loga: sam loga: we' lhag' ra" cin nhug phaui: dathaug' pyid' re re: , vhe' sheim: nae" tau: sabyi' qang: sam loga: nyhang" seim" ci: li" ca"6 nae". – Yao re caung da" ngaid: re Mo"so: tau: nae ham" ru boe" nhao nae" gaug zo xeim: kaid' nae" xau byid loga: we' lhag' ra" cinmain" nhug phaui: shid' thaug' pyid'7 re nyhang" seim" mung: , – vhe' sheim: nae" keim tang sabyi' qang: byid loga: re8 caung da" ca" nae". – Mo"so re myi: phaid' ngaui" xeim: , dao: so: to: mung: caung da" ra" xeim: , zam" khug xeim: tau: nung:9 jaung ngaid: re , – Mo"so sheim nae pyo: nae" tau: myi" yang ngha" phaid' ngaui"10 nae" ngaid: re , – nung: jaung we' daga" gaug zo xeim: xau khyaug' loga: lhag' ra" cinmain" nhug phaui: sam pang" re re: , vhe' sheim: nae" keim tang sabyi' qang: khyaug' loga: re ci: li" ca" nae".11 Nung: jaung dadau: , yao dadau: , yao nau" dadau: , caid' be, nau" dadau: re xeim: caung da" ra" au: ai re" ru: kaid' ca"12 nae". – Seim" nyhang" to" ra" yao , nung: jaung khonho" ngaid: ru re cao" yang: dau: khao: dau: ngo" re ai re" ru: kaid' cao" ca"13 genae". – Mang: byu qe alhab' wa Mo"so: tau: nae pyo" ra" xeim: myi" yang phaid' hab' ngaui" ru re ai re" khyo: kaid' ca"14 genae". – Naonhaung" mae li" khug ngha: na: ra" labug byumyu" ngaid qere: , getau: byumyu" ngaid ngaid , Mo"so sheim nae pyo: veshao: ga: myi" yang caung da" nug: ngaid: re naonhaung" kaid' ra" khyo: cao"15 kaid' veshao: . – Volo phaung mae bobo: ra" yaug naonhaung" mae li" khug ngha: na: labug byumyu" qe wa naonhaung" amyu" byu ngug xe qae: cao" nae" li dalam: za: jo, mung: Mo"so: qhid' kheim: mae naon- haung” ngaid: ru we' dakhyo: yao: bam re:16 ngaid ca" nae". – Naonhaung" yao: mae" da du naonhaung" jhao" li" khug ngha: ra" labug: byumyu" jham wa li dalam: , tarha" daja: jo, ca" nae" ga: mho: ra".17 Mo"so wa Moshe re dam: mho: ru18 wa , – Israel zo: myid: qe re ceru: ein: ta" kyo: wa, Ngo naonhaung" re jhui" lo" nae" mang: khyo naonhaung" joe" lo mung: , –19 ai: mang: mae" qo" yu: ra" cinmain" re zo: ko" au: Mo"so re vo; lhaui: jhaung qhu"20 caung da" ca" genae". – Sao qhid' deim" pye" ra" cinmain" jam: ayho' re vo; lhaui: jhaung qhu" kaid' mung: gaug be, jao: mae vo; lhaui: jhaung qhu" kaid' re re" ru:21 kaid' ca" genae". – Naonhaung" byumyu" zo: qe myid: qe wa sao qhid' deim" pye" ra" cinmain" jam: mae" mung: vo; lhaui: jhaung qhu" xeim: re Mo"so re qhaug' byid' na ca" genae".22 Mo"so Moshe re pin: to" ra" khang" dao: byid' ra" ba mae" mung: naonhaung"23 zo" qe: myid' xag' mae , – khang" dao: tarha" alhab' re naonhaung" macao" lo:24 shaid' nghung" ra" mau" mae , – volo mo, byu alhab' wa maba mabeim: shaid' nghung" ko" ngaid: re; volo byu alhab' bam wa Mo"so: tau: sheim nae ham" na veshao: khyo" to" ra" li jo; ru we' dakhyo: gaug zo caung da" jhaung qhu" , vhe' sheim: nae" keim tang jhaung qhu" we' mung: nung: jaung lo" yang myi: phaid' ngaui" xeim: re re: , caid' be; yang qobo khyaid' xeim:25 re re: caung da" byid: ca" genae". – Khin jaung pho" wa Israel mo, phaung qe: tau: qobo khyaid' mau" kaid' byid: yang: yao: bam mabeim: maso: shaid' nghung" ra" qobo re lhoe' ru qhug' genae". Yao: bam re: mabeim: maso: shaid' nghung" ra" qobo: mathao mae qobo khyaid' xeim: we' mung: myi" yang caung da" nae" jhaung qhu" re Mo"so qhid' kheim: khyo ci: li"26 ca" genae". – Ai re" ru: kaid' lao" volo byu alhab' wa shaid' ko" ngaid qere: , mabeim: maso: mung: shaid' nghung: ko" mathao mae Israel zo: myid: volo mo, byu alhab' re: , yao: bam mae khug ngha: na: ra" labug: amyu" re: ai: qobo mae" loe, genae".27 Byu dayaug yaug mabeim: maso: shaid' nghung" ngaid: re qobo khyaid' xeim: dau: dazin mabyang" shi" caid' be, nau" dadau:28 re ci: li" ca" nae". – Ai re" ru: khin jaung pho" wa Mo"so: qhid' kheim: mae mabeim: maso: shaid' nghung" ra" yaug: tau: mae qobo khyaid' mau" re kaid' byid: lao" ai: yaug wa qobo lhoe' pye' ru qhug' nae"29 ngaid: ra". – Israel zo: myid: we' yao: bam mae khug ngha: na: ra" getau: amyu" tau: mae mabeim: maso: mung: shaid' nghung" ra" au: tarha" cao" khyao daja: za: ngaid ca" nae".30 Israel zo: myid: ngaid ngaid , getau: byumyu" ngaid ngaid , vae" vae" za: tau thaug' shaid' nghung" re , Mo"so re maphug' makhyaid' kaid' ru boe" mung: ai: yaug re yao" amyu" mae" jao khae qab:31 pye' ru qhug' nae". – Mo"so: mho dao: re malam" makho kaid' mung: khang" dao: re shaid' lhoe" ra" mathao: yang ai: yaug wa yao" qobo yao: phau: mung: gai gai: yao: jao khae qab: pye' byid' ru qhug' nae".32 Ana" Israel zo: myid: qe seyo mae na ko" au: dane; mae" dug no: ba mae thao: qho byu dayaug re the' myao ko" ra". –33 The' myao: ra" mo, wa ai: yaug re Moshe , Arun: , volo byu qe: qhid' kheim: khyo jhui"34 lo ko" ra". – Ngaid qere: yao" qobo de: de: mathe' myao shi: mung: kyam: lhaung" to:35 ko" ra". – Alao" Mo"so wa Moshe re byu ai: yaug wa dang dang se' pye' ru qhug' nae". Volo byu alhab' wa vo yae mae ai: yaug re laug baui: yang pye' se' ca" nae"36 ga: Moshe re mho: ra". – Mo"so Moshe re amyin" byid' ru we' dakhyo: volo byu qe wa ai: yaug re vo yae khyo she: ye: mung: laug baui: yang ceim" pye' ko" mung: ai: byu shid: ru qhug' va".37 Mo"so wa Moshe re dam: mho: ru38 wa , – Israel amyu" zo: qere ceru: ein: ta" shid' kyo: wa, yao: bam: amyu" zo" qe: myid' xag' qe wa mai bau: athao ajheim mae khyang nyhug: yang bin: myho kaid'39 lhao" te' ci ca" genae". – Ai: bin: myho re naonhaung" the' myao lao" Mo"so: khang" dao: alhab' jham re myid: beim: mung: cao" pyang" genae" khyo: , qhid' phyao: yao: myid: khyo: yao: , yao: yaug yao: o ngaui: khyo: cao" yang: shaid' ru nghung" ru re40 mangha lo: , – Nga" khang" dao: jham re myid: beim: mung: cao" pyang" ru: yang naonhaung" AsAng Mo"so: tau: shao gyang" nae" khyo: ai ru: kaid' cao" ca" genae". –41 Ngo wa naonhaung" AsAng Mo"so boe" na nae" tau: naonhaung" re Egutu mang: mae" khyaid' khyi: jhui" lo: ra" naonhaung" AsAng Mo"so ngaid: , Ngo wa naonhaung" AsAng Mo"so yao: ngaid va" ga: mho: ra".