1 Nung: jaung: yang zam" khug xeim: qhaug' ngaui" nug: ngaid: re no malo" ra" alo: amo" dadau: dau: re asang: qhid'2 kheim: mae qhaug' byid: ca" nae". – Ngaui" byid: nae" nung: jaung: au: dao mae yao" lo, kai: mung: seim zaung kham: dung: nhae mae se' yang: Arun" yao: zo: khin jaung qe wa sa: re phain lhang" gam: mae pyi" sheim:3 ca" genae". – Amung: yao: wa ngaui" xeim: kaid' nae" xau kug' we' au mae" au kyid'4 xau alhab' re , – Phyid' dam: qug: nhae mae" jang: sho: shid' lam: we' noce' mae de; ra" xau , noce' we' daga" sho: myain jham re zam" khug xeim: dau: mae" thaid' yu mung:, asang re ngha" hab' xeim: bin:5 qhaug' yang:, – Arun" yao: zo: qe wa phain dao myi: khyeim" mae kai" to" ra" xeim: dau: we' daga" myi: ngha" hab' ngaui" ca" nae" . Ai wa asang jhao" ngha" hab' ra" nae: ham"6 ra" xeim: ngaid:. – asang re yao , caid' be, re ngaui" nug: ngaid: re no malo" ra" alo:7 amo" dadau: dau: re qhaug' ca". – Yao nau" xeim: qhaug' nug: re asang: qhid' kheim:8 khyo ci ye: mung: , – Qhaug' ngaui" nae" yao nau" au: dao mae yao" lo, kai: mung: seim zaung: qhid' kheim: mae se' yang: Arun" yao: zo: qe wa ai: sa: re phain dao lhang" gam: pyi" sheim: genae" ngaid: ra". –9 Amung: yao: wa xau kug' jang: thaung: qug: zin" phyid' yu: ra" sho: myi: , au kyid'10 xau alhab' ,– Phyid' dam: qug: mae de; ra" jang: sho: shid' thaung: , noce' we' daga" sang: mae de; ra" sho: myhain jham re xeim: dau: gaung mae" yu: yu mung: asang re ngha" ngaui" xeim: sho: re qhaug' byid:11 lao", – Khin jaung wa phain dao mae ngha" nae". asang re myi" yang ngha" ngaui" ra" sho: zo: shaug' xeim: boe" ra".12 Caid' be, xeim: dau: qhaug' nug: re asang: qhid' kheim: mae ye: qhaug' byid:13 nae" ngaid: ra". – Xeim: ci: li" yaug wa caid' be; au: dao mae yao" lo, kai" to: mung: seim zaung jao: kheim: mae se' nae" ngaid: ra". Arun" yao: zo: qe wa sa: re phain dao lhang"14 gam: pyi" sheim: genae" ngaid: ra". – Au xau kug', au kyid' mae" xau jham alhab' , –15 Phyid' dam: qug: mae de; ra" jang: sho: shid' thaung: ai mae de; ra" xau , noce' we' daga" sang: mae de; ra" sho: myhain jham16 re phoe' thug' bin lao", – Khin jaung pho" wa ai jham re phain dao mae ngha" nae" ngaid: ra". Ai wa sheim nae pyo" ra" nae ham" xeim: sho: zo: shaug' xeim: boe" ra". Xau alhab' wa asang: qhid' mae" za: ngaid:17 ra". – Naonhaung" amyu" zo: qae: myid' xag' apyaid ato mae xau kug' magai: zo: sa: re re: magai: zo: nae". Ce wa naonhaung" na: ra" jo, qo khao: ngo" mae cao" nae" khang" dao: ngaid: ra" ga: mho: ra".