1 Arun" yao: zo: tao asang: qhid' kheim: mae caung da" mung: shid thao Moshe re2 asang mho: ru wa – Ni" mao: Arun: shid: ru maqhug' nae" akhyo wa shao gyang" kug qe, khug bain" dao mae" anghoe' re go: to" ra" myo, kyo" akhug khyo mageim: mavao nae" tau: ta" kyo: wa,. Ngo wa bain" pyid' dao jham thaui: mae li" na: na nae". –3 Arun: wa shao gyang" kug qe, khug khyo khoru: kaid' yang: vao nae" i" ein: re , qobo khyaid' kao khyi xeim: kaid' nae" tau: nung: jaung lo: nau" dadau: , phaid' ngaui"4 xeim: yao lo: dadau: bo ca" nae". – Shao lho" ra" pin: bau: pin: lho: re ve, mung: pin: phyid' cui: cui: ca" nae", pin: au: thab' re re: thab' ca" nae". Ai: mai bau: jham wa shao gyang" ra" mathao gaung cid' pye' yang: ve,5 ca" nae". – Qobo khyaid' xeim: kaid' nae" yao dadau: re Israel volo byu jhao" mae" yu zai ngaid nae".6 Arun: wa yao: we' tin" ra" yao" qobo khyaid' kao khyi xeim: nung: jaung re caung da" mung: yao" tau: we' yham byu ma" ho' tau: qobo khyaid' ru re kaid' ca"7 nae". – Caid' be, shid' dau: re re: yu mung: volo seim zaung kham: dung: nhae asang: qhid' kheim: mae qhaug' byid: ca" nae".8 Arun: wa ai: caid' be, shid' dau: re asang: tau: dadau: , nhao: ke' nae" dadau:9 re pha" khyo" mung: – asang: tau: pha" gyo" ang: ra" caid' be, re ci: li" mung: qobo10 khyaid' xeim: caung da" ca" nae". – Nhao: ke' nae" pha" gyo" ra" caid' be, re adaui asang: qhid' kheim: mae qhaug' ngaui" mung: yao" adao mae qobo khyaid' ru re kaid' bin lao" seyo khyo nhao: lhae" ke' ca" nae".11 Arun: wa yao: we' tin" ra" qobo khyaid' xeim: nung: jaung re ci: li" yang: yao" tau: we' yham byu ma" ho' tau: qobo khyaid' ru re kaid' mung: yao: we' tin" ra" qobo khyaid' xeim: nung: jaung re se' ca" nae". –12 asang: qhid' kheim: mae jo; ra" phain mae de; ra" myi: gyoe: bo" mae ke' pyang" yang: Lo:bain: phaui: nhug re xu: yu mung: pin: cug' go: to" ra" qe, khug' khyo ci vao13 lo" nae" ngaid: ra". – Ailao" yao: shid: ru maqhug' nae" tau: ai: Lo:bain: nae ham" ru sagso: bain" nghoe' mae ham" lo" sho' asang: qhid' kheim: mae Lo:bain: phaui: re myi: mae phyu" ngha" nae" ngaid: ra". –14 Nung: jaung sa: daqhae: re yu mung: sagso: bain" ba thug' shaid' re lo, nyhug' yang pyi" sheim: nae" ngaid: ra". Ai: sagso: bain" nghoe' mae re: lo, nyhug' yang nhaid' lhang pyi" sheim: nae" ngaid: .15 Ai: thao mae amyu" qe we' tin" ra" qobo khyaid' xeim: dau: re se' mung: sa: re pin: cug' go: kyo" to" ra" khug khyo ci: vao yang: nung: jaung: sa: re pyi" sheim" ru re" ru: bain" nghoe' dao mae re: , qhid' kheim: shaid' mae re: pyi" sheim: nae"16 ngaid: ra". – Ai re" ru: Israel amyu" qe: mashao magyang" ra" qobo: mathao mae re: shao gyang" ra" kug qe, tau: caung da" byid: nae" ngaid: ra". Dam: yao: bam: mashao magyang" ra" khug mae jo; ra" volo seim zaung: tau: ai re" ru: kaid' ca" nae"17 ngaid: . – Shao gyang" ra" kug qe, khyo qobo khyaid' mau" zaui: nae" vao lo" ra" au: yao: tau yao: yham byu ma" ho' tau: we' Israel volo byu alhab' tau: qobo khyaid' ru re bin yang: dam: thug' li" ayo, joe" sho' volo seim zaung khug mae khag' re: gai: na18 nae" mangaid: . – Ai thao yao: wa asang: qhid' kheim: phain khyo thug' li" mung: phain: tau: mae shao kyang" nae" nung: jaung sa: caid' be, sa: re yu mung: phain lhang" gam: mae khyug jham re gyaid nae"19 ngaid: ra". – Phain dao mae re: , ai: sa: re lo, nyhug' yang nhaid' lhang pyi" sheim: mung: Israel qe: mashao magyang" ru re shao kyang" byid: ca" nae".20 Shao gyang" kug qe; tau: volo seim zaung: tau: xeim: ngaui" phain: tau: qobo khyaid' mau" bin: zaui: so: mung: caid' be,21 adaui nha: to: ca" nae" ngaid: ra". – Arun: wa caid' be; au: dao mae yao" lo, shid' lo; geim" zaui" qang: ci yang: Israel amyu" qe: zai" shaid' qobo mae" da du shaid' nghung" ra" qobo aja: ja: re mho' bain: mung: caid' be; au: mae kai" to: mung: lam ga" ra" byu: lo, khyo" seyo khyo ye: keim" ke' zai ngaid22 nae". – Caid' be, ai wa yao: bam: qobo alhab' re cae: jhug tag: jo, qo khyo vin: ye" lo" nae" ngaid mung: ai: caid' be, re seyo khyo ye: nha: ke' zai ngaid: ra".23 Dam: Arun: wa volo seim zaung khyo vao mung: ai: shao gyang" kug qe, khyo vao nae" ngaid: re ve, ci: ra" pin: mai bau: jham re khyaid' pye' mung: ai: jo, qo mae24 to" to: nae" ngaid: ra". – Shao gyang" ra" jo, qo mae gaung cid' mung: yao" mai bau: re dam: ve, yang: yao: we' tin" ra" phaid' ngaui" xeim: , amyu" zo: we' tin" ra" xeim: re caung da" yang: yao" tau: we' amyu" zo: qe: tau: qobo khyaid' ru re kaid' byid: nae"25 ngaid: ra". – Qobo khyaid' xeim: dau: mae" xau kug' re phain dao mae ngha" ngaui" ca"26 nae". – Seyo khyo caid' be, ye: keim" nha: ke' ra" yaug re: yao" mai bau: re cid' pye'27 mung: gaung cid' ca" nae". – Ai: thao mae za: vo khug khyo agai: vao lo nae". Shao gyang" ra" jo, qo khyo qobo khyaid' ru re kaid' nae" tau: ci: vao: ra" sa: we' tin" ra" xeim: dau: nung: jaung re re: , caid' be, re re: vo yae khyo ci: thug' lo" mung: sho: qid khyid' sho: jham re myi: ngha" pye' ca". –28 Ai re" ru: myi: yengha" yaug re: yao" mai bau: cid' mung: gaung re: cid' ca" nae". Ai: thao mae vo khug gai: vao lo nae" ngaid: .29 Naonhaung" byu ngug xe qae: cao" nae" cao" khyao wa naonhaung" yao: cao: ngaid ngaid , naonhaung" mae" li" bo: na: ra" labug: byumyu" ngaid ngaid nhaid' lho" khye' daxe ba: ne, mae pe" mau" mazaui: lo: za: nhag' jo, yo taung" dug no" na ca"30 nae". – Khoru: ga" re naonhaung" wa asang: qhid' kheim: mae qobo alhab' shao lho" nae" tau: ai: ba na mae khin jaung pho" wa naonhaung" re shao gyang" nae" tau: qobo khyaid' mau" kaid' byid: ca"31 nae". – Ai: ba na wa asang: khang" dao: we' dakhyo: naonhaung" yaug yo za: dug no: nae" ba na , nhag' lam: nyham: khyo"32 taung" na nae" ba na ngaid: ra". – Yao: mo" lo, xo' nae" tau: xau gyain" ru we' aya: khae: yu: ra" khin jaung pho" wa ai: qobo khyaid' mau" re zaui: so: ca" nae". Ai: khin jaung pho" wa shao gyang" ra" pin: mai33 bau: re ve, mung: , – shao gyang" ra" jo, qo tau: volo seim zaung: tau: , xeim: ngaui" phain: tau: , khin jaung qe: tau: we' volo byu alhab' tau: mae qobo khyaid' mau"34 re caung da" nae" ngaid: . – Ce jham wa Israel amyu" zo: qe: qobo alhab' mathao mae dazin mae dalhang qobo khyaid' ru re kaid' nae" tau: naonhaung" cao" pyang" nae" khang" dao: tarha" ngaid: ga: Moshe re asang mho: to" ru we' dakhyo: Arun: kaid' ra".