1 Dari' jhaung zug: wa mang: din" mau" zo" re vin vo, nae" tau: mang: gyi dayo:2 shid' xe to" to" ra". – Mang: din" so' ha" manyham: gyo" nae" tau: mae ai: mang: gyi jham re ug mung: ca nae" tau: yao: bam: adao mae mang: gyi aqi: sam yaug re qo vhin: to" ra". Ai: mang: gyi sam yaug mae3 Daniel bobo: ru za: maka" – Gekai: lai: ra" nyain: wa jab byang" mung: mang: gyi alhab' , mang: ug agyi jham tho' mae je: qag: ra" mathao mang: din" damang" geim" re yao" lo, khug mae qhaug' byid: nae" ga: jhaung zug: myid: tau" da: to" ra".4 Ai: ayo, mae mang: gyi aqi: jham we' mang: gyi jham wa Daniel re qobo qho mung: mang: din" mau" re ca: zaui: ko" ra". Daniel wa dao: so: zaung mung: qobo daja: re: mabo: ra" mathao qobo qho: ru mathe'5 qhug' myao ko" mung: – Ai ru: mung: ai: byu jham wa yao" Mo"so re lam khug goe; pa" ra" li mae" jain" yang: Daniel re qobo vhin nae" akhyo majo, ngaid: ra" ga: yao:6 cao: jho" ta" ko" ra". – Jhaung zug: jhao" ham phaung mung: asang jhaung zug:7 malam: lai: kao daui: na shao: . – AsAng jhaung zug: mae" lai mung: getau: byu re ngaid ngaid Mo"so re ngaid ngaid ba na sam xe: aqho" mae jhaung: mho' ra" yaug re lo:tin: dung: gyain: khug khyo khyo" ke' ru qhug' nae" magai: lhai: lo" amyin" re khyo" nae" tau: mang: din" zug: , vozug: , mang: gyi , byin qham khaung: mhao: , sin: thu alhab' geim" daru: za: qham: ci ko"8 ra". – Jhaung zug: we" magai: tha" lo" ra" Medi' we' Persi cao" khyao we' dakhyo: amyin" khyo" mung: so: xam:ce' be; te' wa,9 ga: mho ko" lao" – Dari' jhaung zug: wa amyin" byid: mung: so: xam: ce' be; te' ra".10 Ai: amyin" tung" khye' mae so: xam: ce' be; te' ga" ru re Daniel ba lao" yao" yham khyo lo" mung: Yerusalem: shaid' khyo qang: ra" tho' pyae mae" kham: zo: dung: phung" pye' yang: qhid' phyao: re" ru: paid' thaug' thaug' mung: dane, mae sam lhang jhaung: mho' mung: Mo"so: jeju re caung:11 khin" ra". – Ai re" ru: Mo"so re jhaung: mho' na: ru re agyi khaung: mhao: jham wa12 the' myao ko" ra". – Yao: bam wa jhaung zug: jhao" vao ye: mung: asang jhaung zug: we" asang mae" jain" yang: getau: byu re ngaid ngaid Mo"so re ngaid ngaid sam xe ba: aqho" jhaung: mho' ra" yaug wa lo:tin: gyain: khyo khyo" ke' nae" amyin" re so: xam: ce' be; te' va" mangaid: i"? ga: myid: ko" ra". Jhaung zug: re: magai: tha" lai" ra" Medi' , Persi cao" khyao we' dakhyo: dang:13 ra" ga: mho: ra". – Agyi khaung: mhao: qe wa asang jhaung zug: we" Yuda mang: mae" sham" jhui" lo: ra" Yuda amyu" Daniel wa nao re re: , so: xam: ce' be; te' to" ra" tarha" re re: pe" shui manho lo: daba mae sam lhang lhang jhaung: mho' na: ra" ga:14 jhaung zug: re ta" kyo: ko" ra". – Ai: dao: re the' gyo: yang: jhaung zug: wa nhag' lam: atha" qo mung: Daniel re khoru: qo" lhoe' nae" laug ga: myid: nghae" zo" ba vao15 sho' lhoe' ke' nae" khyo qho: ra". – Agyi khaung: mhao: qe ham phaung mung: asang jhaung zug: we" dalhang khyo" ke' va" amyin" re magai: qab: yu ga: Medi' , Persi cao" khyao mae bo: mangaid: i"? ga: dam: mho ko" ra".16 Jhaung zug: akhang" byid' ru we' dakhyo: Daniel re khai: yu mung: lo:tin: gyain: khug khyo khyo" ke' ko" ra". Jhaung zug: re: nao mathang mano: jhaung: mho' lam khug: na: ra" ni" Mo"so wa nao re khyaid' khyi: yu veshao: ga: Daniel re17 mho: ra". – Yao: bam wa laug pye: re ci: li" mung: dung: gyain: nhaid' re nghoe' jhid' yang: Daniel tarha" mau" mae malaung: mayeim" nae" tau: mae jhaung zug' so: xam: we' agyi khaung: mhao: jham: so:18 xam: re be; te' ko" ra". – Ai thao jhaung zug: wa yham khyo phao: lo" mung: damyi geim" zo mazo: , go" nhain" qhu" mo, re makhai: vhao" lo: yab mapyo: lo: ngaid: ra".19 Ne, seim no' to" mung: lo:tin: gyain:20 khyo ye" lo" ra". – Joe" ye: lao" ngug: ra" thoe we' Daniel re yao: mung: daui: na: ra" Mo"so: jeim Daniel we" nao malam: lai: caung da" goe; pa" na: ra" Mo"so wa nao re lo:tin: gyain: mae" qo" khyaid' khyi: yu:21 ra" i"? ga: myid' ke' ra". – Daniel re: asang22 jhaung zug: kao qhang veshao: . – Nga" Mo"so wa mug: logyo: re nhao: khyo" ke' mung: lo:tin: nhaid' re pyid' to: yang: ngo wa lo:tin: gye mae" qo" loe, va". Khoru: ga" re Mo"so: qhid' kheim: mae qobo mabo. AsAng re re: mazai" shaid' mazai" nghung:23 ga: mho: ra". – Ai: au: jhaung zug: wa gyai ngaui bau: mung: Daniel re dung: gyain: mae" phoe' thug' yu ge, ga: amyin" byid' ke' ru we' dakhyo: Daniel re dung: gyain: mae" phoe' thug' yu mung: Mo"so re lam jang" ra" mathao mae yao: mae the' tin: the' thaung" caid' ra" dae khu dakhu re: mamyao ko" ngaid: ra".24 Ai: thao Daniel re qobo zhaug' ra" mo, re jhaung zug' amyin" khyo" khai: yu mung: myi: zo: jham we' daga" lo:tin: gyain: khyo khyo" ke' ko" re myid gaung lao" majoe" shi: mae" lo:tin: jham wa yao: bam: shoqug: shoqae jham re bin" khyug' mhain" pye' ko" ra".25 Ai: thao Dari' jhaung zug: wa myid gye, dagye, geim" mae khug ngha: na ko" ra" byumyu" jham we' myain" thoe aja: ja: jhau ko" ra" mo, alhab' re tung" khye' tung" mung: naonhaung" mae ngaui bau: yaug26 yo: ru myo" laug lo veshao: wo". – Ngo ug: ra" damang: din" geim" mae na: bam ko" ra" naonhaung" wa Daniel Mo"so re gyaug phug' ge, ein: ngo amyin" khyo" ke' ra". Khoru: ga" re ai: Mo"so wa daui: na: ra" Mo"so , gyag maqui: thain" madaui: Mo"so ngaid: ra". Mang: din" re: byo, qeim: khyo majoe" nae". Kheim: so' re: gang" tang:27 jo; li" nae". – Yao: khyaid' khyi: yu mung: loe, nhao va". Mug: gaung we' myid gaung mae ve, lho we' mug' pho: jham mau" yao: kaid' na: ra". Daniel re lo:tin: gyain: mae" khyaid' lhoe' yu: ra" Mo"so wa ai ru" ra" Mo"so ngaid: ra" ga: mho: ra".28 Ai re" ru: Daniel wa Dari' jhaung zug' ta mae re: , Persi amyu" Kuru' jhaung zug' ta mae re: na gai yaug yo taung" qhug' na: ra".