1 Nebukhaneza: tao" zaung: ru shid' zin ein: zin yab mo, the' myao yang: gyaug: din: ra" mathao yao: yab myain mabo ngaid:2 ra". – Yab mo, ta" pheim: kyo: genae" tau: mae Maku' juyi ba mo, boe, phyid' mo, Khalade" mho" pho" qe re khai: zhang: ge, ga: amyin" khyo" ke' ru we' dakhyo: yao: bam jhaung zug: jhao" joe" zang" li" lao" –3 Jhaung zug: wa ngo yab mo, re myao va". Ai: yab mo, re maba. Gyo: re: maba: gyo" phaid' mung: nhag' lam: yaug mayo mung:4 kyi: ga: mho: ra". – Khalade" juyi ba mo, re: asang jhaung zug: malam: lai: daui: na shao: . Ngonhaung" re asang: yab mo, re ta" kyo: la, . Ngonhaung" lase" re pheim: kyo: nae" ga: Suri' myain" khyo" mho ko"5 ra". – Jhaung zug: re: ngo amyin" byid' to: va". Ai: yab mo, re naonhaung" maqo" ceim" shid' ko" re naonhaung" re adau dau je; phyid' khyo" nae". Naonhaung" yham dang: ug' khug' jham re re: nung: khyid'6 bam poe" pye' 'nae". – Yab mo; lase" re ba: pheim: kyo: ko" ngaid: re jhaung qhu" byid:7 mung: nga: yhe' nae" ga: mho: ra". – Yao: bam re: asang jhaung zug: we" myao: ra" yab mo, ta" kyo: la, . Ngonhaung" lase" ta" pheim byid: nae" ga: dam: mho ko" re –8 Jhaung zug: wa ngo amyin" byid' to: gau re naonhaung" wa ba na ayo, myao" nae" khyo" qhui: nug ko" ru re ngo dang dang ba9 va". – Yab mo, re mata" kyo: , mapheim: kyo: ko" ngaid: re naonhaung" danhag' lam: za: kaid' ci mung: ayo, lai sho' nga" qhid' kheim: mae mhug' dao: ta" seim" ko" mathao naonhaung" tau: tarha" daja: za: ajo; . Ai ru: mung: yab mo, ngo re ta" kyo: gela, . Ai lao" naonhaung" lase" re naon- haung" ba: pheim: ru re ngo ba nae" ngaid:10 ra" ga: yang: dam: tau" ra". – Khalade" mho" pho" qe re: jhaung zug' mau" re ba: pheim: thug' ra" mo, myid gye, mae dayaug re: mang. Khoqhi" phung bao ham" hung: qi" ra" jhaung zug: we' zug: re: lo, kyo' qu" , boe, phyid' mo, main: tain: mho" pho" we' Khalade" ba se" mo, re ceru: ga: mamyid'11 qu" ko". – AsAng jhaung zug: myid' ra" ja: wa gyai qug: gyai no; ra" ja: ngaid: ra". Byu we' mazam" makhug: ra" Mo"so mae" jain" yang: khoyaug re: asang jhaung zug' qhid' kheim: mae maqo" pheim: kyo: nae" ga:12 dam: mho ko" ra". – Ai: dao: re the' gyo: lao" nhag' kyid kyid yo: mung: Khalade" mang: mae juyi ba mo, alhab' re se' nae"13 amyin" khyo" ke' ra". – Ai ru: juyi ba mo, re se' nae" jhaung zug' amyin" thug' lo: ra". Daniel we' yao" byin cao: qe re se' nae" qho ko" re .14 Daniel wa Babilon: vo mae" juyi bo mo, re se' nae" tau: thug' ye" ra" jhaung zug: zaung" mo, re ug: ra" gye zug Arog15 re no: gyo: yo: dao: jhau mung: – Jhaung zug' amyin" wa pe" mung: ce qhi" phyaid: i"? ga: yao: re myid' re , Arog wa ai: akhyo16 yao: re ta" kyo" ra". – Daniel wa jhaung zug' yham khyo vao mung: yab mo, pheim kyo: nae" ayo, re akhang" byid: nae" akhyo mho' bain: mung: ,17 Yao" yham khyo phao: lo" mung: ai: akhyo re yao" zam" cao: Hanani , Mishela'18 bam re ta" kyo: mung: – Ngonhaung" wa getau: Babilon: juyi bo mo, we' daga" mashid nae" tau: mae ce: no; thao" ra" ja: mae nhag' myain: nhag' khyag' the' yu nae" akhyo re mug: gaung: AsAng Mo"so re19 jhaung: mho' gelang: ga: mho: ra". – Myi" mae lamyhung" khyo" ai: no; thao" ra" ja: re20 Mo"so wa Daniel re qhu" byid' ra". – Alao" Daniel wa Mo"so: jeju re caung: khin" zo" Mo"so: mang khyao: wa malam: lai: nga: ye; na veshao: wo". Juyi we' re: kheim: so' qam: o: we' re: byang" vin" jo, veshao:21 wo". – Yao: wa ayo, abain: we' yo, gin re tha" lhag' na: ra". Jhaung zug: jham re re: qab: pye' nug yaug re qab: pye' mung: tau: to' nga: yhe' nug yaug tau: to' nga: yhe' ra". Juyi bo mo, juyi byid' ra". Au: naug: sozo: du: mo, jeju khyo" yang za: myao: kyao"22 ba: gyo: nhao: ra". – No; thao" mung: qug' ra" ja: jham re bao bao de: de: qhu" byid' ra". Mug: caid' khug mae bo: gu: re yao: ba mung: mug: bo" wa yao: we' daga" na:23 na: ra". – Nga" phug' pho" jham: Mo"so wa ngo re juyi laba lajhao qam: o: re byid: mung: ngo jhaung: mho' ru we' dakhyo: jhaung zug' yab mo, re phung" qhu" byid' ra" jeju re caung: khin" caung: nghaui" ra" wo" ga: Daniel ta" caung" bin lao" ,24 Babilon: juyi bo mo, re se' nae" tau: mae jhaung zug: amyin" byid' to" ra" Arog jhao" ye: mung: Babilon: juyi bo mo, re dase' shi: . Ngo re jhaung zug: jhao" jhui" ye: la, . Ngo yab mo, we' lase" re pheim: kyo: nae" ga: mho: ra".25 Alao" Arog wa Daniel re phyaid za: jhaung zug: jhao" jhui" vhao" mung: yab mo, we' lase" re ba: ta" ba: pheim: ra" byu dayaug Yuda amyu" kyam: laung" ru dayaug re the' myao va" ga: ta" kyo"26 ra". – Jhaung zug: re: ngo myao: ra" yab mo, ta" kyo: mung: lase" re qo" pheim: sho' kyo: nae" i"? ga: Betlashaza: mang:27 ra" Daniel re myid' re – Daniel wa asang jhaung zug: myid' ra" dao: myid: re juyi bo mo, , lo, kyo' qu" mo, , Maku' juyi ba mo, joe" lo nae" ayo, re ba: ra" ba se" mo, wa asang jhaung zug: re pheim: kyo: nae" tau: maqo" ba: ta" pheim ko" ngaid:28 ra". – Nghoe' nyham" to" ra" jham re qhu" byid: mung: thao phyao: boe" lo nae" ra" ja: nam jab re Nebukhaneza: jhaung zug: re qo" ta" pheim: ra" Mo"so daso wa mug:29 gaung: dao mae na: . – AsAng jhaung zug: thao phyao: boe" lo nae" akhyo jham re yab qo mae myid: nghae" ra". Nghoe' nyham" to" ru re phung" qhu" ra" Mo"so wa thao phyao" ayo, mae boe" lo nae" ra" ja: re30 asang re ci: qhu" ru ngaid: ra". – Ngo byu sosu getau tho' juyi je: bo yang: ce: nghoe' nyham" to" ja: re ngo ba: ta" ba: pheim: ru mangaid: . Nao jhaung zug: pho" ai: lase" re ba: yu mung: nao myid: to" ra" ru ba: gyo: sho' ai: akhyo re Mo"so qhu" byid' ru angaid: .31 Jhaung zug' yab mo, mae the' myao: ru wa sulho re the' myao: ra". Gekai: lai ave, we' bao qhi mung: qu" gyaug sho' ra" gaung khyao sulho ni" qhid' kheim: mae32 ye; jo; ra". – Yao" au: wa hhang gyang" ngaid: ra". Qao gao we' lo, wa ngaui ngaid:33 ra". – Vae: dug: we' paung daung: wa gyid: ngaid: ra". Khyid shid' khyid wa jo, to' ngaid: ra". Khyid vo: wa jo, to' dadau zho:34 gam: dadau ngaid: ra". – AsAng qu" na: au: re lo; yang mabe; lhang" yu: ru yao: za: yao: boe" ra" laug baui wa jo, to' datam" zho: gam: datam" ngaid: ra" khyid vo: re35 li" zao" mung: gyug' main" lo" ru wa – Jo, to' zho: gam: gyid: , ngaui , hhang , jham gyug: mung: aphaui: wa zin vao kheim: gaug nao: jao: mae" phaui: lhug ru: boe" yang: la ci: dao" lo" mung: yao: bam: jo, qo majo, baui" lo" byaug: ra". Sulho re li" zao" thaung" laug baui wa je: qi" li" yang: bam qi: ru: boe" mung: myid dagye, geim" re nghoe' gam: lo" ra" ga: yab mo, myao: ra".36 Ana" wa yab mo; lase" re pheim: sho'37 kyo: nae" ga: mho: ra". – AsAng jhaung zug: we" nao wa jhaung zug: qe: tho' jhaung zug: ngaid: ra". Mug: gaung: dao mae" Mo"so wa mang: din" we' daga" phung bao kheim: so' qam: o: re asang38 re byid: va" ra". – Byu na: jao: alhab' we' myid gye, gug' nyhug' gug' du: , mug: le; phyo: ngho' jham re: asang: lo, mae qhaug' mung: asang wa alhab' geim" re ug nae" akhang" qo" ra". AsAng wa sulho: au:39 ngaid: ra". – Ni" thao mae ni" mang: din" o mae gyab mung: ra" mang: din" damang: thug' li" nae". Ai: thao mae myid dagye, geim" re ug gam: ra" gyid: ga" ra" sam lam"40 mang: din" thug' li" nae". – Byid lam: ein: ra" mang: din" jo, to' ru: gang: tang: mang: ngaid: li" nae". Jo, to' wa getau: ja: nam jab alhab' geim" be; khyoe' mhain" pye' re" ru: byid lam: ein: ra" mang: din" wa be; khyug' yhin" pyam" ru re kaid' li" nae". –41 Sulho: khyid vo: we' khyid nyhug' jham wa jo, to' datam" zho: gam: datam" ngaid: ru re myao: ru we' dakhyo: yao: cao: go; sin" lo" ra" mang: din" boe" nae". Ngaid qere: phaid' ra" zho: gam: we' jo, to' we' lhag' ru re myao mung: jo, to' wa gang"42 tang" ra" qam: o: bo: li" nae". – Khyid nyhug' jham wa jo, to' datam" zho: gam: datam" ngaid: ru we' dakhyo: ai: mang: din" wa datam" qao: ru datam" wa au" ru43 ngaid: li" nae". – Phaid' va" zho: gam: jo, to' lhag' to" ru re myao: ru we' dakhyo: mang: byu qe getau: amyu" zo: jham we' zam" khug: li" genae". Ngaid yang: re: zho: gam: jo, to' magai: lhag' ru ru: yao: bam wa yao: cao: maqo" gai: zam" khug44 genae". – Lo; yang mabe; lhang" yu: ra" laug baui wa bam dao mae" yao: za: yao: gyoe" bai" mung: jo, to' gyid: zho: gam: ngaui , hhang jham re be; khyug' mhain" pye' ra" ru re myao: ra" akhyo wa mabyo, maqeim lo" ra" mang: din" dalam: re ai: jhaung zug: qe: ta mae mug: gaung: AsAng45 Mo"so wa tau: yhe' nhao: li" nae". – Ai: mang: din" wa getau: byumyu" lo, khug majoe" vao nhao lo: . Tho' mae ta" to" ra" mang: din" alhab' geim" re phyo' sin" pye' mung: malam: lai: gang: tang nae". Ai re" ru thao phyao: boe" lo: nae" ja: jham re ham" hung: qi" ra" Mo"so wa asang jhaung zug: re phung" qhu" ru ngaid: ra". Yab mo, malam: lai: lase" re: jo main: ra" ga: Daniel wa jhaung zug: re mho: ra".46 Alao" Nebukhaneza: jhaung zug: wa goe; gam" mung: Daniel re goe; pa" bin lao" xeim: caung da" nae" re: , sheim nae pyo: nam myi: ngha" hab' mung: caung47 da" nae" nyhang" byid' ra". – Nao wa ce: nghoe' nyham" to" ra" ja: re qo" pheim: qhu" mung: gai gai: ni" Mo"so wa Mo"so alhab' tho' Mo"so , jhaung zug: qe: AsAng nghoe' nyham" to: ra" ja: jham re phung" qhu" ra" AsAng ngaid: ra" ga: mho mung: –48 Daniel re nga: yhe' yang: jhaung qhu" myo: sho' re byid: mung: Babilon: mae khaung: mhao: aya: re re: Babilon: juyi bo mo, re ug49 nae" aya: re re: byid' ra". – Ai: au: Daniel wa jhaung zug' re mho' bain: ra" mathao jhaung zug: wa Shadared' , Meshed' , Abedanego" bam re Babilon: mang: mae zug: aya: mae qo vhin: byid' ra". Daniel wa jhaung zug' yung" mae na: ra".