1 Jhaung zug: Belshaza: wa khaung: mhao: dataung re khai: zhang: mung: poe qi: kaid' mung: khaung: mhao: dataung2 we' sabyi' shaug' na ko" ra". – Belashaza: wa sabyi' shaug' tau" qu" au: mae Yeru- salem: pa" jhaung: yham mae" yao: pho" Nebukhaneza: sham" tai: lo: ra" ngaui keim hhang keim re yao: mae" dadu zug: nau" , jhaung zug: myhi" , myi: ngai jham shaug' nae" tau: ai: keim jham yu: li" genae" amyin" khyo" ke' ru we' dakhyo: –3 Yerusalem: mae jo; ra" Mo"so: yham mae" yu: lo: ra" hhang keim jham re yu: li" ko" va" mung: jhaung zug: , zug: myhi", zug: nau" jham we' myi: ngai jham wa ai: keim4 jham we' shaug' ko" ra". – Sabyi re shaug' mung: hhang: mo"so , ngaui mo"so , gyid: mo"so , jo, to' mo"so , sag' tam" mo"so , laug baui mo"so jham re caung: khin" ako".5 Ai: ayo, mae byu: lo, poe wa qang: thug' li" mung: myi: te' zang adao yham khinqae mae tung" ce' li" tung" qhu" ra". Ai re" ru: li" tung" ra" lo, poe re jhaung zug:6 the' myao lao" – Jhaung zug: myo, nho sham: lo" mung: gaung yug sho: byo, yang: phyid' dam: alaug gyug: sho' paid' laug nin"7 ra". – Geim phain" mo, Khalade" mho"su jham re khai ge, ga: zag: hug' ke' mung: mho: ru wa , ai: tung" ce' re ba: nghe' mung: lase" ba: pheim: yaug re bau: ne re ve, nhao mung: lang zang: mae hhang pye: vhe' yang: mang: din" mae sam yaug ein: zug: aya: byid: nae" ga: Khalade" mho" su8 jham re mho: ra". – Jhaung zug' juyi bo mo, joe" zang" li" ko" qere: ai: tung" ce' re maba: nghe' ko". Lase" maba: pheim ko"9 ngaid: ra" mathao – Belshaza: jhaung zug: wa gyai gaung yug gyaug: din myo, nho sham: byaug: ra". Khaung: mhao: jham re: mug' na: bam ko" ra".10 Ai: au: mae jhaung zug' yao: myi: wa jhaung zug' dao: , khaung: mhao: qe: dao: re the' gyo: mung: poe khyo vao ye: yang: jhaung zug: malam: lai: kao daui veshao: . Pe" myid damyo: . Myo, nho dasham11 wa, . – Shao gyang" ra" Mo"so: Solo we' byang" vin" ra" byu dayaug mang: din" khug mae na: ra". Ni" pho" ta re ai yaug mae Mo"so: juyi we' dau: ra" au: naug: sozo: du: juyi bo ru na: ra". Ai: yaug re ni" pho" Nebukhaneza: wa Maku juyi bo mo, , geim phain" qe , Khalade" mho" su jham12 qe re ug nae" aya: byid' to" ra". – Khoru: ga" re yab mo, lase" pheim: ru , dao: myid: jham re pheim nae" nyain: laba lajhao we' gekai: lai: ra" solo wa Daniel ga: mang: ra" yao: mae bo: ra". Beltashaza: ga" ra" mang re re: jhaung zug: byid' to" ra". Ai: Daniel re khai lao" lase" re nghe' pheim byid' li" nae" ga: mho: ra".13 Daniel re yao: jhao" khai: vhao" yu: ra". Jhaung zug: wa nga" pho" wa Yuda mang: mae" jhui" lo mung: Yuda byu zhain mae14 bobo: lo: ra" Daniel ngaid: i"? – Nao wa Mo"so: Solo we' re: , gekai: lai: juyi nyain laba lajhao qam: o: we' re: , byang" vin" ra"15 ga: ni" lau dao: re ngo the' gyo: va". – Ai: tung" ce' nghe' kyo: mung: lase" pheim genae" tau: geim phain" phain" mo, re khai: yu yang: nghe' nhao , pheim nhao: qu" va". Yao: bam maba: pheim ko" ngaid: ra". –16 Nao wa dao: no, re ba: pheim mung: dao: myid: jham re ba: phyid: ra" ga" ru ngo the' gyo: va". Ai: tung" ce' nghe' mung: lase" ano, re ba: pheim: ngaid: re mai bau: ane vhe' mung: hhang pye: byao laui vhe' yang: mang: din" mae sam yaug ein: ra" zug: aya: mae nha nae" ga: mho: ra".17 Daniel re: jhaung qhu" jham wa asang mae jo; na shao: . Byid: nug: ra" aya: re re: getau: byu re byid: wa, . Ngaid yang: re: asang: qhid' kheim: tung" ce' we' lase"18 re pheim: kyo: nae". – AsAng jhaung zug: we" myhao: thao" ra" Mo"so wa ni" pho" Nebukhaneza: mae mang: din" we' daga" phung bao qam: o: kheim: so' re byid:19 va". – Yao: re byid' ra" kheim: so' qam: o" mathao mae byumyu" jham we" myain" dao: thoe aja: ja: jhau: ra" mo, wa yao" qhid' kheim: mae gyaug: nin" ko" ra". Yao: se' nug yaug re se' . Kao lhoe' ke' nug yaug re lhoe' ke' ra". Nga: yhe' nug: ra" mo, tau: to' nga: yhe' ra". Deim" khyo" ke' nug yaug20 re deim" khyo" ra". – Ngaid beim: nghao" ra" khyo cao" kaid' nae" myid nhag' lam: qi: mung: nhag' lam: qao yang: yao: wa jhaung zug' la kin mae" gyoe; gyo" byid:21 gyo" ava". – Byu: phaung mae" khe' thug' ru phau: mung: gug' nyhug' nhag' myid bo: li" ra". Myhao: thao" Mo"so wa myid kin: mang: din" re ug: gam mung: yao: qhaug'nug yaug re qhaug' ru re nao beim: gyang" li" ra" ayo, joe" sho' myao: lae" jham we' zam" na mung: nung: jaung re" ru: mhin: zo: zo" re nghin: coe: yo mae na:22 ra". – AsAng Belshaza: we" ai: mau" jham alhab' re ba gau ngaid qere: nhag' lam: re23 manyham: khyo" lo: – Mug: gaung: AsAng re tug' shai" mung: nao yao: mae" ru , khaung: mhao: jham , jhaung zug: myhi" , myi: ngai jham wa ai: keim we' sabyi' qang: shaug' vegenhaung i"? Myo, mamyao , no: magyo: . Pe" re: maba: ra" ngaui mo"so , hhang mo"so , gyid: mo"so , jo, to' mo"so , sag' tam" mo"so , laug baui mo"so jham re caung: khin" mung: ni" kao so' AsAng ga" ra" ni" akhyo alhab' re nyhang" ra" Mo"so re nao macaung: , phug' te' nga: mayhe' . –24 Ai ru: mung: ai: lo, poe datam" qang: ke' mung: ai: tung" ce' re tung" nhao: ra".25 Tung" to" ru wa , Mene: , Mene: , Tekel , UPharasin: ga: tung" te' to" ra". –26 Mene: ga" lase" wa- asang: mang: din" re Mo"so qug: qu" mung: thao" lo" nhao:27 ava". – Tekel ga" lase" wa- nao re jao mae lag: qu" re jao manao" lo" ru re the' myao:28 ra". – UPharasin: ga" lase" wa , mang: din" re kho' gae: pye' mung: Medi' , Persi byu qe re qhaug' byid: va" ga" ru ngaid: ra" ga: Daniel wa jhaung zug: re dam: ta" kyo" ra".29 Alao" Belshaza: wa mho: to" ru we' dakhyo: Daniel re mai bau: ne ve, nhao mung: lang zang: mae hhang pye: byao taui" vhe' mung: mang: din" mae sam yaug ein: zug: aya: re byid: va" ga: vo khug mae hau" ke' ra".30 Ai: myi yao: Khalade" jhaung zug:31 Belshaza: wa kao thao" mung: – Medi' amyu" Dari' wa kao khyaug' xe shid' zin mae mang: din" re qab: yu: ra".