1 Ngo Yerusalem: re qobo mae" lhoe' ke' nae" tau: dang main" ru we' dao: so: zaung: ra" byu dayaug yaug na nae" laug . Ai: yaug re qhug' the' myao nae" tau: mae vogaung: khyo khain mae mug: am: qid bang: jo, qo khyi" khao: ngo" cao" tao" qho:2 qu" ge, . – Yao: bam wa Mo"so daui: na: ru we' dakhyo: ga: ta" gengaid yang: re: gai gai: wa madang mamain: jham tang:3 ba: ako". – Mo"so we" Ni" myo, vin tang" mau" re qu" na: mangaid: i"? Nao yao: bam re be, ngaid qere: yao: bam pe" shui manho ko" ngaid: ra". Phyo' qheim" ngaid qere: mho" shid' ru re makhae: yu ko" ngaid: ra". Yao: bam: myo, nho nga: lao: re laug baui tho' je: qao nhao veko". Yao: bam dam: lo nae" mamyid ko" ngaid: ra".4 Ngo kam" wa gai gai: yao: yao: bam wa sho: jhin mo, ngaid ko" ra". Mo"so: tarha" re re: yao: yao" Mo"so: cao" khyao jin kham re re: maba mase" yang: azhaug' amhe'5 ngaid ko" ra". – Ai ru: mung: ade, nhag' bo qe jhao" Ngo ye: ta" nae". Yao: bam wa Mo"so: akhyo re re: yao: yao" Mo"so: tarha" din" ra" akhyo re ba genae" ein: mho ngaid qere: yao: bam wa dao kang re nag: khyug' mung: taui: jham re re: lao" phyid' pye'6 veko". – Ai: mathao mae seyo mae" lo:tin: wa yao: bam re se' li" nae". Myi" mae su" lhang: qin" ra" zag ne jham wa yao: bam re bin" se' zo: genae". Lo:tin: wa yao: bam: vo yae gug' na mung: vo yae khyo thug' ye" lo" mo, re lao" caid' zo" pye' ru qhug' genae". Khoru: ga" re yao: bam qobo saung" xo: ru we' yao: bam je: va" lin ko" ra".7 Ai ru" ra" yug: no qobo mae" khoru: gai: khyaid' khyo" lhoe' ke' zai i"? ni" zo: ni" dau jham wa Ngo re to: co' mung: pe" mangaid' ra" mo"so re lao: mung: jham tang: veko". Ngo yao: bam re zho: jhaug' gyi" ke' lao" myi: shaid' lao shaid' mau" kaid' mung: yaug zhang: myhi" mae za:8 nhag' taui" na ko" ra". – Yao: bam wa mhin: zo" gyi" ci: ra" myao: re" ru: su" lhang: qin" mung: yham kyo: cao" myhi"9 zang re jhug' qu" mhin: na ko" ra". – Ai ru" ra" qobo jham re Ngo maca: qu" lo: na: na zai ngaid: ra" i"? Ai ru" amyu" re Ngo dae co' maphaug' lo: na zai i"? ga: Mo"so mho: ra".10 Vokham" dao khyo do, mung: phyo' qheim" pye' ge, . Ngaid qere: gain sho' dakaid' ge, . Akaung aboe: jham re cu: pye' ge, . Ai jham wa Mo"so we' matin:11 ngaid: ra". – Israel kaung bao: we' Yuda kaung bao: wa Ngo mae khae: yu ko" dao: so: phyo' pye' veko" ra" ga: Mo"so12 mho: ra". – Yao: bam wa Mo"so mana . Ngonhaung" adao mae qug: khai: kyi" khyag' joe" zai mangaid: . Shae gye bao" khug' gye ngonhaung" thaung" qhug' zai13 mangaid: . – Lapa qe re: la za: angaid ko" ra". Yao: bam mae mung dao: mabo ko" ngaid: ra". Yao: bam ta" ru we' dakhyo: yao: phau: genae" ga: Mo"so re ha: ngag: pye' dao: jhau ko" ra".14 Amung: gug: mang: din" gam ug Mo"so ceru: ga" ra". Naonhaung" ai ru: ta" ko" mathao Nga" mung dao: re ni" nhaid' mae myi: re" ru: ce: amyu" re thao: re" ru: Ngo poe" ke' mung: yao: bam re nga" jheim"15 pye' li" nae". – Mo"so ceru: ga: mho: ra". Israel amyu" qe we" nao re khaid' nae" tau: byu damyu" re mug: va" mae" Ngo jhui" yu nae". Qam: o: bo: ra" amyu" , geco' getoe: mae" amyu" ngaid ko" ra". Ai: amyu" qe: dao: thoe re nao magyo" qu" , mabo: gyo"16 ra" byumyu" ngaid nae". – Yao: bam: myo: thaug' wa phung" to" ra" lab khung: ngaid: ra". Yao: bam alhab' wa qam: bo mo, za:17 ngaid ko" ra". – Yao: bam wa ni" gaug zo: maui: lam: we' cin main" re zo: genae". Ni" zo: zolau: zo myi: jham re re: zo" li" genae". Ni" yao , nung: jaung jham re re: zo: genae". Ni" sabyi' naui we' pho' ham" gae jham re re: zo" pye' genae". Nao khug: na: ra" gang" tang: ra" vokham" kyae" vo re18 re: phyo' pye' li" genae". – Ngaid qere: ai: ayo, mae yao: naonhaung" re shao" pyaid' sho' byaug sho' makaid' shi: nae" ga: Mo"so mho: ra".19 Yao: bam re: ngonhaung" AsAng Mo"so wa ngonhaung" re ceru" mau" pe" mung: kaid' i"? ga: myid: ko" au: naonhaung" Ngo re shepye' mung: naonhaung" mang: mae gyoe bang" mau" re caung da" ko" ru we' dakhyo: naonhaung" masang: mang: mae naonhaung" wa byu bang" qe re caung da" ca" genae" ein: yao: bam re ta" kyo: wa, .20 Yaku' amyu" na jao: Yuda mang: mae21 ta" hau" kyo: nae" ru wa – Myo, jid' de, gau mae mamyao , no: khye' de, mung: mathe' gyo: , juyi mabo: ra" kopyaid' jham22 we" tae" gyo: ge, . – Mo"so mho: ru wa bang: lae mo" bang: lhung" maqo" lhoe" lo: sho' ma coe re kyo: dam: to: nae" mathain: thoe mung dao: to" to: va". Nga" qhid' kheim: magyaug mavae ko" i"? Nga" qhid' kheim: mae manin" ko" i"? bang: lhung" to" qe re: maqo" lai , khonho" myang: hau23 qe re: qo" lai: phyid' ru mangaid: . – Ce: amyu" zo: qe kam" wa shaid' nghung" ru we' tau: lhain: nae" nhag' bo ko" mung: malam: lai: aphaug' alhag' kaid' ba ko"24 ra".– Ayo, akhin: joe" lao" zin mug: we' la jham: qu nhao mung: byao gin ayo, re ngonhaung" tau: mae nyhang" byid' ra" ngonhaung" Mo"so re ana" gyaug phug' gelang: ga: yao: bam wa nhag' khug mae25 maba: myid ko" ngaid: ra".– Naonhaung" zai" shaid' nghung" ru wa ce: akhyo re tug' pye' ru boe" mung: naonhaung" qobo wa naonhaung" na gai gaug qo" nae" akhyo26 re jhid' pye' veko" ra". – Nga" amyu" mae makhyang" ra" byu bo ko" ra". Yao: bam wa goe; vho' mung: mug khyu re" ru goe; jo, mung: byu re myhi" nae" tau: lha" thaung:27 to: ko" ra". – Qo, khyain" mae qo, laung" jo; ru we' dakhyo: yao: bam: yham mae wa mhug' pyag' vhain" su byang" jo; ra". Ai mung: yao: bam qi" qhang: li" mung:28 na: dai ko" ra". – Yao: bam wa xau lam: lateim" boe" myo, khung: qhi: mo, boe" ko" ra". Yao: bam wa magai: mau" re shove, ze kaid' ko" ra". Cug' mo" cug' zo: na gai nae" tau: yao: bam: mau" re mata" qaid ko" ru mung: masho: majhin: mo, re re: tarha" din" ra" khyo" dao: maphyid' byid: ko"29 ngaid: ra". – Ai ru" yug: no qobo re Ngo maca: pyam" to: na zai i"? Ai ru" amyu" re Ngo dae co' maphaug' zai ngaid: ra" i"? ga: Mo"so mho: ra".30 Mug' pho: ca' pho: re mang: din" khug31 mae kaid' veko". – Lapa jham wa madang mamain: ta" ko". Khin jaung jham ai re cao" mung: ug: na ko" ra". Nga" amyu" qe re: ai re o ngaui ko" ra". Lo" thao" mae naon- haung" pe" kaid' genae" i"?