1 Yuda jhaung zug: Uzia yao: zo: Yotham" yao: zo: Ahaza: ta mae Suri' jhaung zug: Rezin: we' Israel jhaung zug: Remalia yao: zo: Peka: wa Yerusalem: vo re li" zin" lhaid' gengaid yang: re: ma aung ko" ngaid: ra".–2 Suri' mang: wa Ephrim: mang: mae khug ngha: ga" ru re Davi boe: mae" mo, the' gyo: ko" au: seyo mae" sag' gae jham la: yang hug' lhaui" re re" ru: jhaung zug: we' mang: byu qe myid: gyaug myid: nin" na: ako".3 Alao" Mo"so wa Esaia re mho: ru wa, nao we' daga" ni" zo: Shera' yeshab ye" lo" mung: mai zab yaug: yothaung: khyo ye" ra" khyo khyo" ye" lo" re tho' mae" qid tham: ajhaung mae Ahaza: re qhug'4 lao" ta" kyo: nae" ru wa – Lha" yang: sae za: na wa, . Myi: khug' za: athug' ra" baui" tam" shid' lam: ngaid: ra" gu: re mang: zug: Rezim: we' Remalia yao: zo: nhag' gyid'5 na ko" ru re dagaung yug daci". – Suri' mang: Ephrim: we' Remalia yao: zo: nao6 re magai: ra" juyi khyug' mung: – Yuda mang: re ngonhaung" lo" lhau: said' pyi qho gelang: . Ai: mang: re khaid' mung: Tabela' yao: zo: re ai: mang: mae jhaung zug: kaid'7 nhao gelang: ga: ta" na geyang: re: – Mo"so wa ai: khyo aung doe, zai mangaid: . Boe"8 re: magai: boe" nae" – Khoru: ga" re Suri' mang" au: wa Damasku' . Damasku' au: wa9 Rezin: jhaung zug: . – Ephrim: mang" au: wa Samari . Samari au: wa Remalia' yao: zo: ngaid: na qe re: khyaug' xe: ngo" zin: aqho" mae" Ephrim: mang: gyoe; gyo" lo" li" nae". Naonhaung" malam" ko" re gai gai: gang" tang: jo, nae" mangaid: ga: mho: ra".10 Mo"so dam: mho: ru wa ni" Mo"so jhao" ve, lho qhu" nae" qam: o: mho'11 wa, . – No; thao" ra" jo, qo mae ngaid qere: tho' zhao" myhao mae ngaid qere: mho' bain: wa, ga: Ahaza: re mho mung: –12 Jhaung zug: Ahaza: wa ngo mamho' bain: nae". Mo"so re lag yu ca: qu" ru makaid'13 nae" ga: dam: mho: ra". – Alao" Esaia wa o" Davi amyu" qe we" tae" gyo: ge, . Naonhaung" wa byu yao: cao: re pe" shui manho ko" ru za: mangaid: . Ngo lam khug: ra" Mo"so re re: pe" shui manho pe"14 dao" manghae" genae" i"? – Ai ru: mung: Mo"so wa yao: yao" ve, lho qhu" nae". Qu" ge, . Tang: shain" zomyi: zo: wa ve, vin shi: zaui" li" mung: yaug gai zo: khau: li" nae". Ai: zoshao: mang re Emanuela' ga: mhang"15 genae". – Ai: yaug wa magai malho" ru re jao" pye' mung: gai lho" ja: re ba: khyin: yu sho' nug' cug qang: we' byo: yhid re16 zo: shaug' li" nae". – Ai: zoshao wa gai: ru magai: ru re maba: khyin: yu shi" au: nao gyaug: na: ra" jhaung zug: shid' yaug ug: mang: re kye" khyo" pye' ra" jo, qo boe"17 nhao: pye' li" nae". – Ephrim: amyu" wa Yuda amyu" we' va" lin: lo" ra" ba na mae" qhid mung: maboe" qu" shi" ra" ba na ayo, akhin: re Mo"so wa ni" adao mae re: , ni" byu qe: dao mae re: , ni" amyu" sang: tin: qe: dao mae re: joe" gyo" nhao: li" nae".18 Ai: ayo, ba na mae Mo"so wa Egutu qid zo: gyaung: cao" mae" yao khaung: jham we' Asuri' mang: mae" byo: jham re19 nhug' peim" ke' mung: – Ai jham wa zang" lo mung: cae: jhug tag ngaid: jo; ra" bug gaung lao: khaung: gyo, zo: jao: jham mae lo: khug: na: li" genae".20 Ai: ayo, mae qid zang thoe" te' mae na: ra" Asuri' jhaung zug: ga" ra" ngho" yu: ra" shae tho" yang Mo"so wa xae we' khyid mug' jham re qaug: pye' li" nae". Nhaid' maui: re re: qaug: pye' li" nae" ngaid: .21 Ai: ba na mae byu wa nung: jaung mo" dadau: we' yao shid' dau: re zam" na: ru –22 Yao: wa nung: nug' la laug taung" qo" mung: nug' xau re zo: shaug' li" nae". Ai: mang: mae na: dang: na: ra" mo, alhab' re: nug' xau we' byo: yhid re za: zo: shaug' genae".23 Ai: ba na mae ngaui dataung main" ra" sabyi' naui dataung bo: ra" khyae khao: ngo" mae zau: we' myo, jham za: boe" lo"24 byaug: li" nae". – La: we' myo: ci: ra" byu qe ai: jo, qo khyo ye" lo" li" genae". Myid gye, geim" mae zau: jam" za: boe" lo" li"25 nae". – Khoe' mo" yang khoe' mung: kaid' ra" taung yo alhab' wa zau: jam" yang khag' re: mavae" vao: zaui: geyang: nung: jaung jham: gyo, zo: jao: caid' yao jham nao" nhaug' qin" ra" jo, qo boe" byaug: li" nae" ga: hau" kyo" ra".