1 Moe, shab' sho: jhin mo, re seim vege-2 shao: ga: re: – Sho: jhin: ra" Nga" amyu" qe: suna re qab: pye' nae" ga: re: cug' mo" qe re se' da: be, khyaid' kaid' mung: cug' zo: nau" qe: zai yo re lhaid' yu nae" ga: re: matarha" khyo" dao: phyid' yaug madang mamain: ra" khyo" tung" ra" tung" su qe wa3 byuxa: voqoe, genae". – Ngo naonhaung" re qobo dae byid' ra" ayo, akhin: we' va: mae" joe" li" nae" phyo' qheim" nae" boe" lo: ra" ayo, akhin: mae yaug yo nae" tau: mae khoyaug jhao" phao: vao genae" i"? Naonhaung" jo, nho" re khai: mae qaung"4 to: genae"? – Ngo mabo: bo: ra" mo, wa kyam: laung" mo; agyid' mae au: pa" pa" genae". Se' pye' qhug' ra" mo; agyid' mae lang" jhao" na: li" genae". Ngaid qere: yao: nhag' yo" ru magyo" yo shi: . Lo, ayheim" to: shi" ra".5 Asuri' byu we" byuxa: voqoe, nae". Ngo nhag' gyid' ra" lhae daung: ngaid: ra". Yao: ci: ra" zaung: bao" wa Ngo dae byid: nae"6 kya" si: ngaid: ra". – Makhyang: mashab mo, jhao" Ngo yao: re nhao: ke' nae". Ngo nhag' gyid' ra" mo, zhain re lhaid' yu phyo' sin: mung: khyo gaung: tham: bab: re" ru: zab: nhaug' pye' nae" tau: yao: re7 Ngo mho: to: va". – Ngaid qere: yao: wa getau myid: nghae" to" ru bo: ashi". Ai wa byumyu" myo: sho' re phyo' sin: mung: nai:8 mhain" tam" pye' nug: ra". – Yao: khoru: ta" ga" re nga" khaung: mhao: qe jhaung9 zug: boe" veko" mangaid: i"? – Kalano" vo wa khakhemig' vo ru" ru: , Hamaid' vo wa Apaid' vo ru" ru , Samari vo wa Damasku'10 vo ru" ru boe" va" mangaid: i"? – Samari we' Yerusalem: mae" gyoe: alho tho' je: gai: ra" gyoe lho re goe; pa" ko" ra" mang: din" jham re Ngo lhaid' yu phyo' sin" pye' ru11 we' dakhyo: – Samari vo we' yao" gyoe lho re ngo kaid' re re" ru: Yerusalem: vo we' yao" gyoe lho jham ngo kaid' gai: mangaid: i" ga: mho: ra".12 Ngaid qere: Mo"so wa Ziun: bam we' Yerusalem: vo mae mau" zo" bin lao yo, lao" Asuri' jhaung zug' nhag' lam: qi" myhao: ru nghao" ra" myo, nho nga: lao: we' khyoe'13 ru re Ngo pyam" nae". – Ai: zug: wa ngo vae" ra" qam: o: we' au: naug: sozo: du: yang: qo" aung va". Ngo juyi we' jab byang" va". Getau: byumyu" qe: mug: kyo: re ngo qhui" ke' va". Yao: bam: ngaui hhang jo, nho" re lhaid' yu va". Yao: bam: jhaung zug: qe re sulhe: re" ru: la kin mae" khyo" pye'14 va". – Ngo wa ngho' said' re the' myao va". Shepye' to" ra" ngho' au" jham re sham" yu: ru we' dakhyo: myid kin: jo, nho" zai yo jo, mae" jo, re sham" yu va". Khoyaug re: daung phyid: lhu: ru nhaid' lab; ru nyung: ru mabo ko" ga: ta" mung:,15 Qam thaung: wa ci yaug re lhaui" nhain" re re" ru: lae daung: wa asang re bao" re re" ru: vo: zaung: wa thoe: yaug re paid' ka: qo" zhaug' nae" i"? sag' qhag' wa qhag' yaug re gye kaid' mung: qo"16 nghao" nae" i"? – Ai ru: mung: gug: mang: din gam Mo"so wa ai: jhaung zug' xau lam: lateim" ngaid: ra" mo, phaung mae angaung: akhyoe" ru vhao" ke' nae". Yao" phung bao khug mae re: myi: nga" re re" ru: nga" nae" tau: thug' phaid' ke' nae". –17 Israel qe: bo" bao wa myi: ngaid: ra". Shao gyang" ra" Mo"so wa myi: shae ngaid: ra". Dane, re za: ai: jhaung zug' zau: gae aja: ja: re myi: ngha" mung: jeim" lo" nhao: li"18 nae". – Mo"so nga: lho" ra" yao" yoqao" yo re re: , qhovo: qhoshi: thug' ra" yothaung: din" re re: yao" gaung khyao Solo we' daga" zae" lo" nhao yang: no phyo: qhug' yaug19 ru: yao: qam: nang" lo" li" nae". – Jo; dang: ra" yoqao" mae" sag' gae jham wa zoshao qo" xam" yu nae" nho" dajhid' za: ngaid: byaug nae".20 Ai: ba na ayo, mae" na: dang: ra" Israel byu qe we' Yaku' amyu" zo: qe wa yao: bam re se' da: be, khyaid' mae mangha lo: Israel Mo"so re vin tang: khug ngha: lo:21 li" genae". – Yaku' amyu" khug mae" na: dang: ra" mo, wa phung bao qi" ra" Mo"so jhao" dam: lhang: phaug' lo: li" genae". –22 O" Israel amyu" ni" amyu" qe qid dae mo" mae" ma coe nho" myo: laug ngaid yang: re: so: xam: tau: nang: gu: za: adam: lo: li" genae". Din" ra" khyo: tau" phyid' to" ru wa23 gyang" dang: lo: li" nae". – Gug: mang: din gam Mo"so tau" qang: phyid' to" ru we' da ru: za: myid kin: agaung: mae shao kyang" ru re kaid' li" nae".24 Ai ru: mung: gug: mang: din" gam Mo"so mho: ru wa Ziun: vo mae na ko" ra" Nga" byumyu" qe we" dagyaug daci" ge, . Asuri' wa nao re qam thaung" yang be, nae". Egutu zug: qe kaid' ru we' dakhyo: yao" lhae daung: wa ni" adao mae lo: li"25 nae". – Ngaid qere: dazab zo: lao" yao: bam wa byo, qeim: ra" khyo joe" ko" mung: Ngo nhag' gyid' ru yo mung: Nga" nhag'26 myid re: jo; yo: lo" li" nae". – Gug: mang: din gam Mo"so wa Oreba' laung: mo" baui anhae mae Midian: byumyu" qe re se' pye' ru ru: ai: jhaung zug: re gye tug' she nae" seim" nyhang" nhao: li" nae". Yao" lhae daung: qid ne lao mae qang: to" ru we' dakhyo: Egutu adao mae dam: qang: to"27 li" nae". – Ai: ayo, akhin: mae yao: vhin: ra" qo vin ni" dao kao" mae" re: yao" kyau: ni" lang zang: mae" khyo" pye' nae". Lang zang: gab bug' zaung: li" mung: kyau: go;28 sin" lo" nae". – Yao: wa Araid' vo joe" va". Migron: vo lai: lo" va". Migmaid' vo29 mae gye zai re to: co' ava". – Bam khyae gyo: khyo" lai veko". Geba: vo mae thang ko" ra". Roma' vo wa gyaug: nin" na: ra". Sho"lu' vogaung: Giba: wa phao: vho'30 byaug: ra". – O" Gilin: zomyi: zo: zag: hug' wa, . O" Laisha vomo" we" tae" gyo: wa, .31 Sho: jhin: ra" Anathod' we" – Madmena" vo wa byaung" phao va". Gebim: vo bao:32 wa loe, sho' phao veko". – Noba' vo mae yao: dane, thang mung: Ziun: zomyi: bam ga" ra" Yerusalem: bug gaung re qang mung: yao" lo, yheim" to" ra".33 Gug: mang: din gam Mo"so wa gyaug pho" ra" kheim: so' qam: o" yang sag' gae aphyo: jham re cu: pye' nae". Myhao: ra" akaung aboe: jham cu: khyo" pye' mung: qi" ra" akaung jham re khyug' khyo" pye'34 nae" ngaid: ra". – Yoqao" yo mae" thao" jam" re vo: zaung" yang myo" khyaid' mung: Lebanon: yoqao" yo wa qam: bo: ra" yaug: lo; yang gyang: gyo" lo" li" nae".