1 Ariela vo , Davi noqo Ariela vo wa byuxa: qoe, va" ra". Dazin: dao mae dazin kai" zhao" ge, . Poe poe ayo, nghe' paug'2 ge, . – Alao" ngo wa Ariela vo re sho: jhin nhao mung: nhag' ngai: ru we' nyung: ru bo ngaid qere: Ariela vo re" ru: Nga" qhid'3 kheim: mae boe" nae". – Ngo wa ni" lhang" gam: mae gye nha: to: mung: gyab lao:4 khung: dau: nae". – Nao wa deim" nyham: khyo" ke' ru qhug' mung: myid gaung mae yoe" jhao" jo, yang: dao: jhau ca" li" nae". Nao wa phaui: lhug bam mae" dao: so' so' nae". Ni" thoe wa yui vao yaug: thoe re" ru: phaui: lhug bam khug mae" dao: so' so' na: li" nae".5 Ngaid qere: nao re gye kaid' nae" mo, qu" gyaug sho' ra" mo, mo" thaui: wa tao" ke' ra" vo, phaui: ru: boe" mung: nyag tin"6 labaug joe" li" nae". – Gug: mang: din gam ug Mo"so wa mug: dam: dam" ru myid lab: lab' ru myang: hau: ra" thoe jham we' daga" mug: qu la qam" nga" ba: ra" myi:7 shae jham: yang qobo dae byid: nae". – A mang: mang: mae" li" mung: Ariela vo re gye she nae" mo, thaui: mo" wa Ariela gye khug jao: re khaid' aung: pyam" yhin" nae" amyu" qe wa yab mo, we' myi" mae" lamy-8 hung" re" ru: boe" genae". – Ai mung: vae: moe; yaug wa yab mo, mae qhug' zo" ga: myid qere: beim: so" li" re vae: moe; shi" ru ru:, Qid shab' yaug re: yab mo, mae qid qhug' shaug' va" ga: myid ngaid qere: so" li" au: o kyaug' mung: qid o: ashi" ru ru: Ziun bam re gye khaid' mo; mo, thaui: mo" mae boe" genae"9 Yin yo za: mug' na ge, . Phavae mau" mae nhag' caid' no: yaug mung: na ge, . Sabyi' qang: shaug' yang: yid: ru mangaid: yhid re: mashaug' ru apyi avhang: mung:10 na genae". – Khoru: ga" re Mo"so wa naonhaung" re yab nghoe" nghoe" nhao ru: yang naonhaung" myo, jid' re nghoe' pye' mung: naonhaung" lapa qe zug: qe myo, myhung" ba: myao mo, re nghoe' gam: pye'11 va". – Lamyhung" alhab' wa naonhaung" qhid' kheim: mae so: te' be; to" ra" tung" khye' we' dau: byaug: ra". Tung" ce' ba: phaid' yaug re ce re qu" wa, ein: mho: re so: xam: be; to" ra" mathao mae maqo" gai:12 phaid' ngaid: ra" ga: mho: ra". – Ai: tung" khye' re: tung" ce' maba yaug re phaid' qu" wa, ein: mho: re ai: yaug wa ngo tung" ce' maba ga: ba: ta" ra".13 Mo"so re: ce: byumyu" qe wa nhaid' dao: thoe we' ngo jhao" qui" li" mung: nhaid' qid: yang za: Ngo re phug' myao: ko" qe re: nhag' lam: wa ngo we' va" lin: ako". Byu qe kaid' to" ra" khang" dao: mae14 ngha mung: ngo re gyaug: ako". – Airu: mung: qu" gyaug sho' ra" mug' pho: mau" re ce: amyu" re kaid' qhu" shi: nae". Ce: amyu" juyi ba mo, laba lajhao wa byo, qeim: lo" nae". Sozo: du" ra" mo, sozo: re: baui" lo" byaug genae".15 Mo"so maba lo: sho' yao: bam no; thao" ra" juyi khyug' mung: mug: caid' yo mae mau" zaui" ru re khag' the' myao genae" i"? Ngonhaung" akhyo re khoyaug qo" ba genae" i"? ga: ta" mo, wa xa: qoe,16 genae". – Naonhaung" wa khug pyag' taung pyi" kaid' vegenhaung wo". Ug' kaid' yaug re myid au: naug: ein: gai: jho nae" i"? kaid' to: va" zai yo wa kaid' yaug re yao: ngo re makaid' va" re . Phain: to" ra" zai yo wa phain: yaug re au: naug: so zo: madu: ein: gai: ta" nae" i"?17 Lebanon: bam wa shi: khyae boe" yang: ai: shi: khyae wa yo qao" yo boe" nae" ayo,18 wa joe" li" na va" mangaid: i"? – Ai: ayo, akhin: mae no: jid mo, wa jham: dao: the' gyo: genae". Myo, jid: ra" mo, re: mug:19 caid' khug mae myao: li" genae". – Nhag' lam: nyham: khyo" ra" mo, wa Mo"so mae ngha mung: ngaui bau: je: qhug' genae". Byu qe mae sho: jhin: ra" mo, Israel shao gyang" ra" Mo"so re khug ngha mung:20 ngaui bau: genae". – Khoru: ga" re gyaug pho: ngaid beim" ra" yaug gyoe; gyo" nae".21 Jung" khyoe' ra" yaug mana lo: . – Su: qobo re myao: ra" yaug myaung sho: mo, re tarha" yung" mae qobo zhaug' ra" yaug kham: mo" dung: mae zug: li" kug yaug re lha" mae myi" nhao: ra" yaug qobo maqo" yaug re matarha" khyo" seim nhao: ra" mo, alhab' re sham" khyo" pye' ru qhug' genae".22 Ai ru: mung: Abraham re khyaid' yu: ra" Mo"so wa Yaku amyu" re qang yang: mho: ru wa Yaku amyu" wa thao phyao: qho' gyaug phau" ru myo, nho nga: lao:23 seim: ru majo, lo: nae". – Yao" zo: myid: qe wa Ngo nyhang" jaung: to" ra" mau" zo" re myao lao" Nga" mang khyao: re phug' myao" li" genae". Yaku shao lho" Mo"so re phug' myao: mung: Israel amyu" Mo"so re24 gyaug phug' genae". – Myid: shaid' myid: nghung: mo, wa ba: gyo" se" mung: kaung: kag' ba: ra" mo, wa mho" shid' ra" dao: re khae: yu tae" gyo" li" genae".