1 Davi yao: zo: Yerusalem: jhaung zug: tarha" mho" pho" mung dao: ceru: ga: mho: ra".2 Akeim , akeim ja: nam jab alhab' akeim3 aseim za: ngaid: . – Byu wa ba: agyid' mae qam: phin: qhao" pye' gu: pe" akyu" bo:4 i"?. – Byu daqae: lai: lo" mung: daqae: dam: na: li" ra". Myid gaung kam" wa5 khyao za: gang" jo; ra". – Ba re: thug' lo" vao lo , thug' lo: gau: khyo dam: tug' tao" ra".Qid bang: khyo" cao" mung: qid meim6 khyo do, lo: ako" – La re: qid bang: thao khyo" hug' lo mung: mug: am: dau khyo" dam: hug' lo: ra". Ai wa khyao za: hug' lhang: na mung: azhao: gau: khyo dam:7 tug' lhang: lo: ra". – Qid zang jham alhab' qid dae mo" khug yug: vao lo" ra". Ai qere: qid dae mo" wa mabyang" li". Qid zang jham khyao za: ang: ra" gau: yug: lo" mung: aqao: khyo dam: tug' lo lo ngaid: na: .8 Ja: cao jab byu qe maqo" mho sho' myaung: nhao: mau" za: ngaid: . Myo, jid' re: qu" manghang: . No khye' re: gyo" ru9 mabyang" li". – Boe" nae" ra" ja: wa boe" va" ja: za: ngaid: . Ana" zaui" mau" wa bin: zaui: va" mau" za: ngaid mung: ba: agyid'10 mae mau" sag' ga: ru majo, . – Qu" ge, ce wa mau" sag' ngaid: ga: ta" ko" re ai wa geco' ne, nyhao" qhid' re boe" qu" va" ru11 za: ngaid: ra". – Lai: lo" va" bang: re khag' re: mabeim: lo: ko". Thao boe" li" nae" ru re re: ai: thao mae na: li" nae" mo, xam: gezai re: mangaid: .12 Ngo mung dao: kho" su wa Yerusalem:13 mae Israel jhaung zug: kaid' na: . – Ngo wa mug: gaung gyid' jo, mae" jo, , boe" mae: boe" re nyain: juyi: yang qho: ca nae" tau: myid: yaung: ra". Mo"so: yang byu re byid' to" mau" wa myaung: dug qug: khai: mau"14 za: ngaid: . – Ba agyid' mae zaui: so" mau" ja: cao jab re ngo qo" myao: ba va". Alhab' wa akeim aseim we' la re cao" khe' ru za:15 ngaid: . – Kaui: ru re magai: jho" ke'. Yeim"16 ra" gu: re re: maqo" bo: nghe' zaui: . – Ngo Yerusalem: vomo" tau nga" qhid' mae na: na va" mo, alhab' tho' juyi je: qo" khae: yu: . Dang dang nga" nhag' lam: wa juyi ba ji: gyai bo: ra" ga: nga" aung khug mae17 mho: na: . – Ai mung: ngo juyi re re: , nhag' mabo: ru we' kopyaid' akhyo re re: qo" ba: kho' shao: ein: myid: da: to". Ai re: la re cao" khe' ru za: ngaid: ru ngo myid: beim"18 ra". – Pe" mung: ga" re juyi laug: li" lao" myid myo: khyo laung" lo: ra". Je: ba jhao yaug wa kaug' qui khyo je: myo: nhao: ra".