1 Ai: thao Yoba' wa nhaid' phung" mung: yao" khau ba na re jham tang" pye' ra".2 Yoba' wa ngo re khau: ra" ba na wa byo; lo" veshao: .3 Yaug gai zo: re aung mae laui va" ga: lau gyo" ra" myi re: byo; baui: shao: wo".4 Ai: ba na wa tang: no; caid' veshao: wo". Ai: ne, mae bo" bao majo, shao: wo". Mo"so ai: ba re mug: tho' mae" maqu" shao: wo".5 Mug: caid' we' shid: ra" bao qab ai: ba re nghoe' gam veshao: . Ai: adao mae jham no; thaui: thaui" jo, shao: , ai: ba mae magai makhe' ba na ngaid veshao: .6 Ai: myi na wa caid' no, tham: boe" veshao: . Zin qug: ba na mae mabo: bo shao: . Yo, qug nghe' ru mae re: mabo shao: .7 Lho" khye' nghe' qug: ru mae mabo: bo shao: . Gai gai: yao: ai: myi na wa cae: jhug tag ngaid veshao: . Ngaui bau: zhao: yao: thoe mathug' veshao: .8 Na" re nhang: kheim: ba: ke' ra" mo, we' mao jaung: re ba: nhug' peim" ra" mo, ai: myi na re nhang: vegeshao: .9 Myi" mae" caid' myhung re: sham: byaug shao: . Ai: myi na wa bo" bao re lao" ngaid qere: maqo" nae". Ne, seim mug: bo" re: mamyao veshao: .10 Khoru: ga" re nga" myhi" aung re majhid' to: nhao , qug: khai: kyi" khyag' re ngo mamyao nae" khyo: maqo" gug: gam.11 Ngo wa co' phyid' ra" au: pe" mung: mashid: laug. Khau: qhid: mae" pe" mung: so' mathao" laug i"?12 Pe" mung: ngo re tao: kheim" mae vo; ci ko"? Pe" mung: qao bam nug' cug qang: jhaug' ko".13 Ai ru: makaid' ko" ngaid: re ngo sae za: pyo" na nae" ru:-14 Yao: yao" tau: byo; qeim ba: ra" soxam: re kaid' ra" mug: myid: jhaung zug: , khaung: mhao: qe re:15 Ngaui hhang qho: qaung: mung: yao: yao" yham mae ngaui hhang we' zai" pyang" ra" zug: qe we' daga" ngo yo : na naeva".16 Mangaid: lao" lho" khye' mabyang" ru khau: ra" zoshao , mug: bo" re mamyao: ra" zoshao re" ru ngo mana: byaug lo: zai ngaid: .17 Ai: jo, qo mae makhyang: mo, kaung: kag' ru majo, myaung: dug: ra" mo, yaug yo: ru qhug' ko" ra".18 Kyam: laung" mo, sae za: qhug' na bam ko" mung: pyam" yhin" mo; dao: thoe re: mathe' gyo: .19 Ai: jo, qo mae qi: mo, ngai mo, na: bam ko" ra". Ngo re: AsAng: lo, khug mae" loe, va".20 Qug: khai: kyi" khyag' qhug' ra" yaug re pe" mung: bo" bao bao byid' i"? Nhag' lam: kho" ra" yaug re pe" mung: kao so' byid' i"?21 Yao: bam wa shid: ru re myid: nghae: qe re: magai: qo". Nyham" vho' to" ra" jo, nho" re yu nae" tau: dau" ra" tho' mae shid nae" khyo re qo" nae" tau: je mung: dau: ko" ra".22 Yao: bam wa mang: khung: re the' myao: au: gyai ngaui bau: mung: zhao: yao ko" ra".23 Yao: ye" lo" nae" khyo dang mathe' myao yaug Mo"so lhang" gam: kyae" lhaung" to" yaug re pe" mung: bo" bao we' kao so' byid: ko" i"?24 Ngo zo mazo: nyung: na:, kaug' ngug: na: . Ngo kaug' myang: ngug byid wa qid yug ru re" ru: ngaid: ra".25 Ngo gyaug: ra" mau" wa ngo mae joe" va". Ngo gyai gyaug: ra" qug: khai: wa ngo re the' myao: ava".26 Ngo wa cae: tae: ru we' yaug yo: ru maqo". Qug: khai: kyi" khyag' za: thaung" qhug' na: wo" ga: mho: ra".