1 Suri' jhaung zug' zug: jhaung Nemain: wa yao" qhid' kheim: myo, nho qo" su we' ham: hung: qi: su ngaid: ra". Pe" mung: ga" re Suri' mang: wa yao: khyo" yang qo" aung nae" akhang" Mo"so byid' to" ra". Yao: wa sulhe: mo" ngaid: . Ai qere: ye, gyaid de;2 ra". – Suri' byu qe gye se' qin" gemung: Israel mang: mae" myiqe: nau" dayaug qo" taung" yu: ako". Ai: yaug wa Nemain: yao:3 myi: re caung: na su ngaid: . – Ai: myiqe: zo: wa yao" asang myiqe: re nga" asang Samari mae na: lapa jhao" joe" ngaid: re wa yao" no pho: pye' byid' li" nae" ga: ta"4 ra". – Nemain: wa yao" asang jhao" vao ye: mung: Israel myiqe: zo: ta" ra" dao:5 yezhao: kyo" ra". – Alao" Suri' jhaung zug: wa ye: wa, ngo Israel jhaung zug: jhao" tung" khye' bovhin: ke' nae" ga: mho: ra". Ai mung: Nemain: wa ngaui khug' dayo hhang Shekela khyaug' taung we' mai bau:6 daxe zam" yu: ye" ra". – Israel jhaung zug: jhao" yao" asang vhin: ke' ra" tung" khye' re re: byid' ra". Tung" khye' mae tung" to" ru wa nao nga" sin: thu mo" Nemain: ye, gyaid no gai yo: pye' byid: nae" tau: yao: re ce: tung" khye' we' daga" bonhao: ke'7 ra" ga: bo: ra". – Israel wa ai tung" khye' bin: nghe' yang: yao" bau: mo" lao" caid' pye' mung: are ngo wa qo" se' yaug we' qo" taui byid' ra" Mo"so ngaid yang: ce: yaug wa ye, gyaid gai byid' nae" tau: ngo jhao" nhao: ke' nhaung i". Qu" ge, ce yaug ngo re gye khonho" kaid' nug: ga" ru ba se" ge, ga: mho: ra".8 Israel jhaung zug: yao" bau: lao" caid' ra" ga" ru Mo"so: byu Elisha the' gyo: lao"- jhaung zug: jhao" byu nhao mung: pe" mung: nao ni" bau: lao" caid' pye' ra". Ai: yaug re ngo jhao" nhao: ke' la, Israel mang: mae lapa na: ru qo" ba: lo" nae" ga: pyang: ke' ra".9 Ai ru: mung: Nemain: wa yao" myao: jham , yao" lhin" jham we' ye joe" mung: Elisha yham qhid' au: mae ye; na: ra". –10 Alao" Elisha wa yao: jhao" daui nhao byu nhao: ke' mung: Yodain: lao tau nhaid' lhang yecid' wa, . Alao" sho: gyang" lo" yang: shao lho" li" nae" ga: ta" ke' ra". –11 Nemain: nhag' yo: mung: thug' lo" zo" dang dang lapa pho" yao: nga" jhao" lo" mung: yao" AsAng Mo"so: mang lao: yang: lo; yang soe' au: ye, gyaid gai yo: pye'12 byid' li" nae" ein: ngo jho: ra". – Damasku mang: mae Abana qid Pharapa qid lao nhae wa Israel damang" geim" mae" qid alhab' tho' je: gai: mangaid: i"?. Ai: qid lao tau ngo gai: cid' shao: yu: ra" mhao" ga: yo:13 yang: lo" byaug; ra". – Alao" yao" jeim qe te' qui" lo mung: pho" we" lapa: yang mau" qi: nhao: ngaid: re kaid' nae" mangaid: i". Gaung cid' yang: shao gyang" lo" se, ga: nao re ta" ru je: gai: kaid' ra" mangaid: i"14 ga: ta" ko" lao" – Nemain: wa Mo"so: byu ta" we' dakhyo: ye kaid' ra". Yodain: lao mae gaung nhaid' lhang ye jam yang: yao" sho: wa zoshao: sho: ru: lai" lo" mung: shao gyang" byaug; ra".15 Ai mung: yao: wa yao" thao bo: naung: qin" mo, we' daga" Mo"so: byu jhao" dam: li" mung: yao" qhid' au: ye, zo" qu" wa, Israel mang: din" mae" lai yang: getau khomang: mae re: Mo"so mana: ru ana" ngo ba va". Ai ru: mung: ni" jeim nga" jhaung qhu" re khae: yu byid: la, ga: ta"16 ra". – Lapa wa ngo caung da" na: Mo"so daui: na: we' dakhyo: ngo makhae: yu ga: ta" ra". Nemain: xo' ta" qere: yao: ha:17 pye' ra". – Alao" Nemain: wa nao mayu qere: ni" jeim pho" re myao: shid' do: mae" myid zhai: byid' ke' la, . Ni" jeim ngo ana" mae" phaid' ngaui" xeim: ngaid ngaid , getau: xeim: ngaid ngaid Mo"so: mae" je yang: getau: mo"so re ngaui" byid: lo: nae"18 mangaid: . – Ai qere: Mo"so wa ni" jeim ngo re khyo dagau: mae qobo lhoe' byid: shao: . Nga" asang pa" kug' nae" tau: Rimon so yham vao yang: nga" lo, tau pao yang: ngo re: Rimon so yham khug gam" goe; na: re ceru: gam" goe; qobo Mo"so khyaid'19 byid: shao: ga: mho' ra". – Lapa pho" wa yaug yo za: lo" se, ga: au" ke' ra". Nemain: lo" mung: khyo le; mae shi" lo" joe" re-20 Mo"so: byu Elisha jeim Gehazi' wa qu" wa, nga" asang ce Suri' byu Nemain: yu: li" jhaung qhu" re makhae: yu , yao: re saung" nhag' myain" ava". Mo"so kao daui: na: we' dakhyo: yao" thao ngo cao" mung: daja: ja: cao" mho' yu nae" ga: yaung: ra". –21 Ai mung: yao: Nemain: thao bocao: ra". Dayaug bocao: li" ru Nemain: myao lao" tug nae" ga: lhin" mae" gyo" mung: alhab'22 bam: qao" ko" i" ga: myid' ra". – Gehazi' wa alhab' bam: gai: na: . Nga" asang ngo re nhao yang: ceru: ga: ta" ra". Ephrim: bam mug: mae" lapa zoshao shid' zo: joe" li" ko". Yao: nhae: tau: ngaui khug' daxe we' mai bau: shid' zam" gae byid' ke' la, ga: mho:23 ra" ga: ye ta" ra". – Nemain: wa ngaid va" , ngaui shid' xe yu wa, ga: ta" ra". Yu wa, ga: zhain: yang: ngaui shid' xe re thaung a: shid' lam: tau ke' mung: bau: shid' zam" yang daga" myag; paung: yang: yao" daui mung shid' zo: re vo, nhao yang: ai tao wa Gehazi' qhid' au: mae vo; lo" ako".24 Vokham" lo" joe" lao" Gehazi' ai: zai yao: tao: lo, mae" yu yang: yham qe, khug tau zam" to: mung: vo; ra" shid' zo: re peim" ke' yang: ai tao lo" byaug; ra". –25 Gehazi' kam" wa yao" asang: qhid' kheim: vao: ye; jo; ra". Alao" Elisha wa Gehazi' khai: mae" dam: tug' lo: ga: myid' re ni" jeim khai: re: maye: ga: dam: tau" ra". –26 Alao" Elisha wa ai: yaug nao re tug nae" ga: lhin" mae" lhang: li" lo: au: nga" nhag' lam: nao we' daga" mabo: cao i". Ana" ngaui , mai bau: , Zhainlun khyae , sabyi' khyae , yao , nung: , jeim myiqe: , yaug gai sham"27 yu yo, ngaid: i". – Ai: mathao Nemain" ye, gyaid nao mae re: , ni" zo: myid: qe mae re: khyao za: de; lo" shao: ga: mho: ke' we' dakhyo: Gehazi' wa gyu: ru: phyu: ye, gyaid phau: yaug boe" mung: yao" asang mae" thug' lo" byaug; ra".