1 Lapa dayaug: myi: wa Elisha jhao" li" mung: ni" jeim ngaid: ra" nga" yham sang pho" shid; byaug va". Ni" jeim pho" Mo"so re gyaug phug' su ngaid: ru nao ba: ra". Jhin sang li" mung: nga" zo: nhae re jeim toe' nae" ga: sang nug; na: ra" ga: zhao:2 kyo" ra". – Elisha wa ni" tau: ngo pe" kaid' byid: ca" nae". Ni" yham mae pe" jo; ra" ga: myid' re yao: wa ni" jeim myhi" mae xau dathaug' mae" getau pe" re: majo; ga: ta"3 ra". – Alao" Elisha wa lo" se, ni" yham kyo: cao: alhab' bam: mae" gung" ra" yae: ug'4 jham ngho" to: wa, . – Myo: sho' ngho" to: wa, . Ni" yham joe" lao" ni" zo: tao re khai: yu mung: kham: pyid' pye' yang: ce: yae: ug' alhab' tau xau vhe' zaui mung: byang"5 lao" za: yu: to: ge, ga: ta" ra". – Ai: myiqe: wa lo" mung: zo: nhae re: yae: ug' re yu: lo yang: yao: zo: tao we' daga" yham khug vao mung: kham: pyid' to: zo" xau vhe'6 zaui: ako". – Yae: ug' jham bin: byang" thao ug' getau yu: lo shi: ri: ga: yao: zo: re mho: ke' re yao: wa gung" ra" ug' majo, lo: ga: ta" ra". Alao" za: yug; na: xau thang:7 no" lo" ra". – Ai mae" myiqe: wa Mo"so: byu jhao" yeta" kyo" re lapa wa xau ai re aung: yang: jhin xe' wa, . Dang: gu: wa nao we' ni" zo: tao: kao khau: mae ci ge, ga: ta" ra".8 Da ne; ne, re Elisha Shunem: vo khyo ye" lo" ra". Ai: vo mae ham" hung: bo: ra" myiqe: dayaug na: . Ai: yaug wa Elisha re lham: tug; da" ra". Ai ru: mung: yao: wa ai: gau: lai lao" khonhae" re: ai: yham mae9 vao: bang" bang" kaid' ra". – Ai: myiqe: wa yao"yham sang pho" re qu" wa, ce khyo" su" jao: jao: kaid' ra" su wa Mo"so: shao10 gyang" byu ngaid: ru ngo beim: va". – Ai: mathao vokham" adao tau qe, ngai da qe, kaid' mung: yao" tau: yab jaung: , zo gai" , zaung khau" we' myi: kaug' jham to" to: lang: . Ai re" khyo: yao: ngo tao jhao" vao: bang" lao" ai: qe, mae vao: yab; li" nae" ga:11 ta" ra". – Dang dang ai: gau: dam: lai: ba12 re ai: qe, tau yao: vao: yab; ra". – Elisha wa yao" daui mung su Gehazi' re Shunem: myiqe: re yekhai: lo ri: ga: mho: ra". –13 Dam: Elisha wa daui mung su re ai: myiqe: re ceru: ein: ta" wa, . Qu" wa, nao ngo tao re ceru: lham: tug; yu: mathao ni" tau: pe" kaid' byid: ca". Jhaung zug: jhao" mangaid: lao" zug: mo" jhao" ni" tau: mho' ca" khyo bo: i" ein: ta" wa, ga: pin: ke' ra". Myiqe: ai wa ngo nga" amyu" we' na: na nae" ga: tau" ra".14 Elisha wa are yao" tau: pe" kaid' byid: ca" nae" ga: myid' re Gehazi' wa yao: zo: makhau ngaid: ra" yham sang pho" re:15 mao" ava" ga: ta" ra". – Alao" Elisha wa yedam: khai wa, ga: ta" re myiqe: wa16 kham: dung: tau ye; jo; ra". – Lapa wa nao sao nhag' ce yo, re zoshao yaug gai zo: bug' li" nae" ga: ta" ra". Nga" AsAng Mo"so: byu we" ni" jeim ngo re mhug' dao: data" ga: tau" ra".17 Ai: myiqe: wa gaung la" li" mung: Elisha dang: to" ayo, joe" lao" yaug gai zo:18 khau myhung: ra". – Ai: zoshao qi" lo va" yo, da ne; re" ba yao: pho" we' gaug yaid19 mo, jhao" yequ" ra". – Yao: pho" re au: no: kyi: au: no: kyi: ga: ta" re yao: pho" wa daui mung su re yao: myhi" jhao" jhui" lo" wa,20 ga: nhao: ke' ra". – Ai: zoshao: yao: myhi" jhao" jhui" joe" lo" thao yao: wa na" gaung ba gae" lo" yo, joe" yao: myhi" tao: kheim:21 tau zaung yang: shid: lo" ra". – Yao: myhi" wa vokham" dao do, mung: mao gaung re Mo"so: byu: yab jaung: tau lhang" to: yang: kham: pyid' pye' mung: thug' lo" ra". –22 Yao" yham sang pho" re khai: yu mung: ngo Mo"so: byu jhao" tao" ye: yang: dam: lo nae". Daui mung su dayaug we' myao: dadau: nhao: ke' la, ga: pyang: ke' ra". –23 Yao" yham sang pho" wa pe" mung: ana" ba ye: nug;. Lho" xin: re: mangaid: so: ne, re: mangaid: ga: ta" re yao: myi: wa gai nae" ga: mho: ra".24 Myao: dadau" dao shaung kin kaid' mung: jeim re khai: jhui: yang: nao cao" wa, ngo mata" re dayam" ga: mho: ra". –25 Su" ye" lo" mung: Karamela' bam tau na: Mo"so: byu jhao" joe" ye" ra". Mo"so: byu wa va: mae" yao: re qo" myao: ba lao" yao" jeim Gehazi' re qu" wa, Shunem: myiqe:26 li" lo: ra". – Nao yao: re yetug nae" tau: tao" ye: wa,. Nao re: ni" lao we' zoshao re: qao" i" ein: myid' qu" wa, ga: mho: ke' ra". Myiqe: wa qao" na: bam: ga: tau"27 ra". – Yao: wa Mo"so: byu na: ra" bam dao mae joe" lao" yao" khyid re ge; vo; ci: ra". Gehazi' yao: re lao" tam" nae" ga: te' qui" lo: au: Mo"so: byu wa yao: re datam" kyo". Yao: nhag' ngai: na: ra". Ai: akhyo Mo"so28 ngo re maqhu" nyham" to" ra". – Alao" myiqe: wa ngo asang nao jhao" yaug gai zo: mho' i"?. Ngo re damhug' ein: ta" va"29 ga: mho: ra". – Alao" Elisha wa Gehazi' re phyid' cui: cui: wa,. Nga" zaung: bao" ci yang: ye" lo" wa,. Dayaug yaug we' qhug' re bang" dase". Su nao re jhau qere: dadam: tug' jhau. Nga" zaung: bao" zoshao: myo, khung: adao kai" to: wa, ga: mho: ke' ra". –30 Yao: myhi" wa Mo"so daui: na: ru: ni" kao re: daui: na: we' dakhyo: ngo dang dang nao we' magao: nae" ga: ta" re Elisha yao:31 to" yang: bocao: ra". – Gehazi' shi" yao: nhae: qhid' au: ye: mung: zaung: bao" re zoshao: myo, khung: adao kai" to: qere: zoshao wa ma jhau: li". Magyang" lo ngaid: ra". Ai mung: Gehazi' wa Elisha re ye tug zo" zoshao mabeim: qaid ga: ta" kyo" ra".32 Ana" Elisha yham joe" re zoshao shid yang: yab jaung: dao kai" to" ru the'33 myao: ra". – Ai ru: mung: yao: wa kham: pyid' to: yang: Mo"so jhao" jhaung: mho'34 ra". – Zoshao jhao" te' ye: mung: nhaid' we' nhaid' , myo, jid' we' myo, jid' , lo, vo: we' lo, vo: zoshao: adao maug; nghoe'35 yang: zoshao lam: li" ra". – Ai mung: yao: wa yham qe, khug dalhang su" lhang" yang: dam: te' ye: mung: zoshao: adao yao" gaung maug; nghoe' ke' re zoshao wa nhaid' lhang ag' ci" ci" li" mung: myo,36 phung" ke' ra". – Elisha Gehazi' re khai mung: Shunem: myiqe: re khai: ke' wa, ga: mho: we' dakhyo: khai: ke' yang: ai: myiqe: li" lao" Elisha wa ni" zo: re vo; yu wa, ga:37 ta" ra". – Myiqe: wa vao yang: yao" khyid qao: myid gaung joe" gam" goe, mung: yao: zo: re vo, yang: thug' lo" ra".38 Elisha Giligala khyo lo" re ai: mang: mae bao" khug' qi: joe" ra". Lapa: zo:nau" qe re: yao" qhid' kheim: zaung: na ko" au: yao: wa ug' qi: nyhang" to: mung: lapa: zo:nau" qe: tau: zo xeim: jho' wa, ga: yao"39 daui mung su re khang" ke' ra". – Dayaug yaug ao: pho' lhae: nae" ga: yodae khyo ye" lo" re naui jeim myao yang: ai: mae" am baung: ajeim qo" vo; nho" phyo' lo mung: ai: ru pe" ja: ngaid: la, lhao" maba: ru xeim:40 ug' tau zhaid' zaui: ra". – Ai mung: zo: nae" ga: yao: bam vhe' bam: to: mung: ai: xeim: zo" na ko" re yao: bam wa Mo"so: byu we" ug' tau pe" lhae" zaui ko" laug zag; hug' zo" maqo" zo: ga: ta" ako". –41 Alao" Elisha wa are cinmain" phaui: yu: lo geri: ga: ta" yang: ai: cinmain" phaui: re ug' mae ke' ke' yang: ana" zo: nae" tau: khau: gese, ga: mho: ra". Ai: khyo yid ja: daug mabo lo: .42 Dam: dalhang Bala shelisha mae" byu dayaug Mo"so: byu jhao" sao qhid' qo" ra" mug-yo" cin: yang kaid' ra" cinmain" lung: shid' xe we' yao" thaung a: tau ameim" li"43 qhaug' ra". – Alao" Elisha wa ce: byu qe re gae byid: wa, ga: ta" ra". Cegu" yang ce: byu dayo yaug re khoru: ba: zho: nae" ga: ta" re Elisha wa agae byid: wa,. Mo"so mho: ru wa , yao: bam gyi" zo: mung: dang shi: nae" ga: ta" ra" ga: mho: kyo: lao" –44 yao: wa byu qe: qhid' au: gae: myho" to: mung: yao: bam wa Mo"so: dao: kheim: we' dakhyo: bin: gyi" zo: yang: dang: ashi".