1 Ai: ayo, akhin: mae Yuda yao: mao: yao: nhaung: qe: na jao: mae" thug' ye" lo" mung: Hira' ga: mang: ra" Adulam:2 byumyu" jhao" mae ye: na: na: ra". – Ai: mae Shua: ga: mang: ra" Khanain: amyu" yao: zo: myiqe: nau" re the' myao mung:3 yao: re yu mung: ug' khug' vai" ra". – Ai: myiqe: wa gaung la: mung: yaug gai zo: khau: ra". Ai: zoshao re Era' ga: mhang"4 ra". – Dalhang gaung dam: la: mung: khau: ra" yaug gai zo: re O"nain: ga: mhang"5 byid' ra". – Dalhang gaung dam: la: mung: khau: ra" zoshao re Shela, ga: mhang" ra". Shela, khau: ra" au: yao: pho" wa Khezid' vo mae na: jo; ra" .6 Ai: thao mae Yuda yao" zo:qhid' Era' re Tama: ga: mang: ra" myiqe: zo: re yu byid'7 ra". – Yuda zo:qhid' Era' wa AsAng: qhid' kheim: mae makhyang: mashab mung:8 AsAng yao: re se' pye' ra". – Ailao" Yuda wa O"nain: re khai: yu mung: ni" mao" cug' mo" jhao" vao ye: mung: yao: we' zam" khug yang: ni" mao" nyaug xo' byid: wa,9 ga: mho mung: . – O"nain: wa yao: zo: qo" ngaid qere: yao" yao: zo: magai: mhang" ru re ba mung: yao: mao" yham sang myhi" we' zam" au: zo: makhau nhao nug yang: ashug' re taung gaung khyo jhab' khyo"10 pye' ra". – Ai: mau" zo" re AsAng maqu" o mung: ra" mathao O"nain: re se' pye' ra". –11 Ailao" Yuda wa yao: dau mo" Tama: re Shela, maqi: shi" gyo: mae ni" myhi" pho" yham mae cug' mo" khyo" lo" na: na shi: wa, khoru: ga" re yao: mao: tao re" ru: shid: byaug nae" ru re gaung yug yang: ta" ra". Tama: yao: pho" yham mae lo" na: na: ra".12 Ayo, ga" go" zo: myao" thao mae Shua' yao: zo: ngaid: ra" Yuda yao: myi: re: shid: byaug: ra". Yuda wa nhag' dang" lao" yao mug' qaug mo, na: ra" Timanaid' vo khyo yao" ba nam pho" Adulam: amyu" Hira'13 we' daga" ye" lo" ko" ra". – Yao: vao yao mug' qaug nae" tau: Timanaid' khyo ye"14 lo" ga" dao: Tama: the' gyo: lao". – Cug' mo" mai bau: khyaid' pye' mung: myo, nghoe' yang myo, khung: nghoe' , gaung re re: yang" ci mung: Timanaid' ye" lo" ra" khyo dang nhae Enim: vo kham: mae zaung: na: jo; ra". Khoru: ein: re Shela, qi" li" ngaid qere: yao: we' ug' khug' vai" zai mangaid: ga" ru re myao: ba yang: ngaid:15 ra". – Yuda wa ai: myiqe: re the' myao lao" yao: wa myo, khung: nghoe' mung: na: ra" mathao mae yaug zhang: myhi"16 ngaid: ra" ga: jho mung: , – khyo thaung" vao mung: anhe khyo qui" te' ye: yang: ngo nao we' zam" nae" magai la, ga: mho lao" nao ngo we' zam" nae" tau: pe" jhaung qhu" byid: nae" ga: myid' re Yuda wa caid' nau" dadau: byid' ke' nae" ga: mho: ra". –17 Ailao" ai: myiqe: wa ai: caid' nau" mabyid: shi: re zai daja: ngha: to: nae" i"? ga: myid:18 lao" . – Yuda wa pe" ja" zai ngha: to: nhao nug: i"? ga: myid: lao" , myiqe: wa ni" so: ce' xam: , lang ve, we' zaung: bao" re ngha: to: co' wa, ga: lao" yao" zai yo re qhaug'19 byid: mung: yao: we' zam" mung: , – yao: wa gaung la: va". Ai: thao myiqe: to" lo" mung: myo, nghoe' re khyaid' pye' yang: cug' mo" mai bau: re dam: tha" ve; ra". –20 Yuda wa myiqe: myhi" mae ngha: to: co' ra" zai yo re she: yu nae" tau: yao" ba nam pho" Adulam: byu re caid' nau" re byid' ke' ra". Adulam: byu wa ai: myiqe: re maqhug'21 lao". – Enim: vo nhae mae lhaung" zaung: na: ra" yaug zhang: myhi" khai: mae na: ra" i"? ga: ai: jo, qo mae" byu qe re myid' qu" re , ai mae" byu qe wa ce: jo, qo mae yaug zhang: myhi" mana va" re ga: mho22 gelao". – Yuda jhao" dam: tug' lo" mung: ngo ai: myiqe: re mathe' myao. Ai mae" byu qe re: ce: jo, qo mae yaug zhang: myhi" mana ga" khyo ta" ko" ra" ga: mho: ra". –23 Ailao" Yuda wa caid' be, nau" nao re byid' ke' va" ru nao yao: re mathe' qho: myao lo" ru wa nga" shid' zo: qho' maphau: shao: ga: , ai re yao: yu: pye' veshao: ga: mho: ra" .24 Ai: thao lho" mo" sam khye' kho ngaid: re supe" khyo" ni" dau mo" Tama: yaug zhang: myhi" kaid' mung: gaung la: va" ga: Yuda re ta" kyo: gelao" , Yuda wa yao: re she: thug' mung: myi: mae ngha" se'25 gelang: ga: mho: ra". – Yao: re she: thug' ko" au: Tama: wa so: ce' xam: lang ve, we' zaung: bao" re yao: jhao" dai" nhao mung: ce: zai jham: AsAng khyo" yang ngo gaung la" ru ngaid: . Ce: zai yo wa khoyaug: zai yo ngaid: ru re qu" qu" wa, ga: pyang: ke'26 ra". – Ai: zai yo re Yuda ba se" mung: yao" qobo tho' nga" qo bo je: qi" ra". Yao: re nga" zo: Shela, we' mazam" lo: na: myid' venhaung: ga: mho: ra". Thao dalhang yao:27 we' madam: zam" lo: na: ra". – Ai: thao Tama: zo: khau yo, joe" re aung khug mae28 zo:zam bo: ra". – Khau nae" au: zoshao dayaug lo, li" qang: ke' ra" au: zo:khau bao" yaug wa ai: lo, mae khyang ne: yang taui" vhe' ke' ra". Ce: yaug sao qhid' khau: li"29 nae" ga: myid: ra". – Ngaid yang: re: ai: yaug wa yao" lo, re dam: she: vhao" mung: yao" yao: mao: khau: ru re zo:khau bao" yaug wa nao khoru: mung: qhid' khyo lhaid' thug' li" i"? ga: mho mung: yao: re Phared' ga: mang mhang" byid' ra" .30 Ai: thao mae she, khyang ne vhe' ke' ra" yao: nhaung: khau mung: yao: re Zara' ga: mhang" byid' ra".