1 Ai: thao mae Mo"so wa Yaku' re to" mung: Bethela' jo, qo khyo lo" na wa, . Nao ni" mao: Eso" mae" phao: lo: ra" au: nao re li" qhu" ra" Mo"so: tau: ai: jo, qo mae xeim: ngaui" phain kaid' wa, ga: Yaku' re2 mho: ra" . – Ailao" Yaku' wa yham byu jham we' yao" thao cao: ra" mo, alhab' re khai: zhang: mung: naonhaung" qo" ra" getau: amyu" mo"so jham re sham" lhaui" pye' ge, . Mai bau: tha" ve, mung:3 yao: yao" gaung re kyang" shao ge,. – Ana" yao: to" mung: Bethela' khyo lo" gelang: se, ngo qug: khai: sho: jhin qhug' ra" ayo, mae ngo re tau: byid: mung: ngo ye" lo" ra" gau: khyo mae joe" li" qhu" ra" Mo"so: tau: ai: jo, qo mae ngo xeim: ngaui" phain4 kaid' nae" ga: mho: ra". – Yao: bam re: yao: bam qo" ra" getau: amyu" qe: mo"so jham we' no: mae xaui" ra" noxaui: jham alhab' Yaku' re qhaug' byid: mung: Yaku' re: Shekhim: nhae mae jo; ra" shiqae gae qao:5 mae nyhab' to: co' ra". – Yao: bam byaung" phao: lo" ra" au: lhang" gam: mae" vobyu qe wa Mo"so re gyaug ko" mung: Yaku' yao: zo: qe re mavae" cao" khe' ko" ngaid: ra". –6 Yaku' wa yao" byu alhab' daga" Khanain: mang: Luza: ga" jo, qo Bethela' khyo joe"7 lo" ko" ra". – Ai: jo, qo mae xeim: ngaui" phain kaid' mung: ai: jo, qo re Bethela' ga: dam: paug' mhang" ra". Khoru: ein: re yao: mao" lo, mae" phao: lo: ra" au: ai: jo, qo8 mae Mo"so re yao: li" myhao" ra". – Ana" Rebedkha" caung da" yaug Debora' shid mung: Bethela' jo, qo shiqae zang qao: mae nyhab' ko" ra". Ai: mathao ai: sag' gae re Alun:Bakug' ga: mang: ru ngaid: ra".9 Yaku' wa Padain: Aram: mae" dam: lo thao dalhang Mo"so li" na: myhao" mung:10 min byid' ru wa – Nao ana" Yaku' ga: mang: ra". Thao phyao: wa ni" mang re Yaku' ga: mhang" nae" mangaid: . Israel ga"11 mang re mhang" byid' ra". – Dam: dalhang Mo"so wa, Ngo wa qam: mo" bo: Mo"so ngaid: . Zo: myhung dau khau mung: na: je: na: myo" lo" ge, wo". Byu damyu" za: mangaid: byu amyu" myu" jham wa nao mae" boe" li" genae". Jhaung zug: qe re: ni" amyu" khug mae" na: thug' li" genae". –12 Abraham we' Isag re Ngo byid' to" ra" mug: re ni" zo: myid: qe re Ngo byid: nae" ga:13 mho: ra". – Mo"so wa Yaku' we' jho" qhug' jhau: ra" jo, qo mae" dam: do, lo" byaug:14 ra". – Yaku' wa Mo"so we' jho" qhug' jhau: ra" jo, qo mae so: xam: tau: zhaug' mung: ai: dao mae pyi" sheim: we' xau vhe' gyain"15 ngaui" byid' ra". – Yaku' wa Mo"so we' jho" qhug' jhau: ra" jo, qo re Bethela' ga: dalhang dam: paug' mhang" ra".16 Ai: thao mae Bethela' mae" dam: byaung" lo" ko" ru Uphared' joe" nae" jhao" li" na: au: Rakhela' wa zo: khau no qi: sho'17 yao: no: ru qhug' ra". – Ai re" ru: khau: qug' na: au: zo: khau bao" ra" myhi" zang wa dasang: kho: yaug gai zo: dayaug qo"18 va" ra" ga: mho: ra". – Rakhela' wa mo; gyo" lo" mung: yao: so' thao" lo" na: re ai: zoshao re Benoni' ga: mang mhang" ra". Yao: pho" kam" wa Benyamin: ga: mang19 mhang" byid' ra". – Ailao" Rakhela' shid mung: Belehem: ga" ra" Ephared' vo khyo ye" lo" ra" khyo nhae mae yao: re nyhab'20 shaung ko" ra". – Yaku' wa ai: lab dao mae laug baui so: xam: zang tau: zhaug' ra". Ai wa ana" ba joe" sho' Rakhela' lab so: xam:21 zang boe" jo; ra". – Ai: thao Israel qe wa dam: qui" byaung: mung: Edara: mug: byu22 gai" lai lao" seim zaung kaid' ra". – Ai: jo, qo mae na ko" au: Rubin: wa yao: pho" myi: ngai ngaid: ra" Bilha: we' yab ko" ra" ga" dao: re Israel the' gyo" ra".23 Yaku' yao: zo: jham daxe: shid' yaug ngaid ko" ra" , Lea kham: mae" Rubin: , zo:qhid' , Simun: , Levi' , Yuda' Iskha: , Zabulun: nhae ho' ngaid ko" ra". –24 Rakhela' kham: mae" wa Yoseb we' Benya-25 min: ngaid ko" ra". – Rakhela' vhao cao Bilha: kham: mae" wa Dain: we' Nabthali26 ngaid ko" ra". – Lea vhao cao Zilapa kham: mae" wa Gaid' we' Asha: ngaid ko" ra". Ce bam wa Padain:Aram: mae khau: ra" Yaku' zo: qe ngaid ko" ra".27 Ai: thao mae Yaku' wa Abraham we' Isag khug ngha: na: ra" Mam:re: jao: gyu" Hebron: vo ga" ra" Kirea Aba' vo mae na:28 ra" yao: pho" Isag jhao" joe" lo" ra". – Isag wa kao dayo: she' xe byang" mung: gyai29 mao: va". – Ailao" Isag wa kao ga" mung: so' thao" lo" byaug mung: na: lai: lo" mung: yao" phug' phyid' qe jhao" joe" lo" ra". Yao: zo: Eso" we' Yaku' wa yao" mao re nyhab' shaung veko".