1
Ai: ba mae Davi zug' kaung we' Yeru- salem: vo byu qe: maca' majhaid' qobo re cid' shao: pye' nae" qid baug: baug: li" nae".2
Thain" madaui gyag maqui: Moso ceru: ga: mho: ra" getau: Moso: Alho jham: mang re thao phyao: khag' maba beim: lo: nae" tau: phyo' pye' mung: lapa qe rere: maca' majhaid' solo jham re re: mang: mae" khe'3
thug' pye' nae" ngaid: . – Dayaug yaug pa: na shi" ngaid: re khau myhung myhi" pho" tao wa nao Moso: mang re ngha mung: madang mamain: ru re pa dao: ta" mathao mae pa: na: au: yao" myhi" pho" tao wa4
yao: re thug' kyao" se' pye' li" genae". – Ai: ba mae lapa pa yaug khag' ngaid qere: yao" pa dao: mathao mae qho' phau: genae". Su re vhain" zo: nae" tau: so' ra" mai5
bau: magai: ve, nae". – Yao: wa ngo lapa mangaid: zolau: mae" yothaung: phaug' zo: yaug angaid: zolau: mae" yao: ngo jeim kaid' lo va" ga: yhin" yu: li" nae" ngaid: . –6
Ai: au: byu dayaug yaug ai re ni" lo, mae" dae khu wa pe" ru" ru ngaid: i"? ga: myid' re ceru wa ba nam pho" yham mae phau" ra" dae khu angaid: ga: yao: tau" li" nae".7
Shae tam" we" nga" yao zam: yaug we' nga" byin cao: pho" re the' zao" wa, yao zaung" yaug re be; se' pye' mung: yao jham byo: sin" lo" li" genae". Yao nau" jham: adao mae nga" lo, kai: mung: gug: gam: yu nae" ngaid: ga: thain" madaui gyag maqui: Moso8
mho: ra". – Damang" geim" mae sam bam mae" shid' bam zai" tam: qhug' mung: shid ge ngaid yang: re: dabam dang: na shi: zai ngaid: ra" ga: thain" madaui Moso mho:9
ra". – Ai: dang: ra" gu: re ngo wa myi: khyeim" gaung: khyo" lai nhao mung: ngaui re kyang" yu: ru we' dakhyo: kyang" nae". Hhang re lag: ca: qu" ru ru: yao: bam re re: lag: yu nae" ngaid: . Ai: au: yao: bam nga" mang re yao gemung: yao: bam: dao: ngo tae" gyo: nae". Yao: bam re nga" amyu" ein: ngo ta" nae". Yao: bam re: thain" madaui gyag maqui: Moso wa ngonhaung" AsAng ngaid: ga: yhin" yu genae" ngaid: .