1 O" Israel qe we" ana" Ngo naonhaung" re ta" kyo: nae" kaug' myain" qhu: thoe re2 tae" gyo: ge, . – Israel tang: shain" zomyi: wa gyang: lang: mung: maqo" dam: to" ye, lo: yao: na: myid gaung mae gaung cin dam: na: to: va". Yao: re dam: tau: to" nae"3 byu mana lo: . – Mo"so ta" ru wa Israel qe: mau" bovin nae" byu dataung qo" byid' ra" vo wa dayo za: dayo qo" byid' ra" vo wa daxe za: aqo" byid: lo: genae".4 Israel amyu" qe re Mo"so mho: ru wa- Ngo re qho ge, . Qho: re wa kao so' loe;5 beim yaug yo: li" genae". – Bethela' vo re daqho ge, . Gilagala, vo khyo da vao ge, . Berasheba' vo daye: ge, . Khoru: ga" re Gilagala, vo wa sham" pyaung" tai: lo" ru qhug' li" nae". Bethela'vo re: pe" maso' ha"6 nae". – Thain" madaui Mo"so re qho ge, . Qho ko" ngaid: re kao qo" daui: na genae". Ai ru: mangaid: re Yoseb amyu" dao mae myi: re" ru: de; li" mung: khag' yang re: maqo" se' lo: sho' Israel amyu" re nga" lo"7 nhao nae". – Dang main" ra" khyo" tarha" dao: phyid' ru re qug' naui zai" poe" mung: din: main" tarha" re myid mae khyo" yang:8 zab: nhaug' pye' ra" mo, we" – kyi qo; lakhyain" we' kuno; la: dau re phain: to" ra" AsAng shid lo vo: lao: khaung: re ne, seim bo" bao re" ru: , na" gaung: bo" bao re mug: qo" caid' nhao yaug , bang: lae mae" qid re khai: yu yang: taung gaung mae qo" yug: byang" nhao: ra" yaug: mang yao" mang9 ngaid: ra". – Qam: mo" bo: ra" mo, re re: gye khug laug aug' re re: qo" phyo' qheim" pye' ra" Mo"so re qho ge, .10 Vokham" kham: dung: mae ba: mho" kyang" ra" yaug re ma nug mung: dang: main: dao: jhau: ra" yaug re qu" ca' veko"11 mangaid: i"? – Naonhaung" wa myaung sho: mo, re yhin" mung: saung so gaug re ba: mho' zo: ko" mung: be; nyhang" ra" laug: yang: yham qo" kaid' gengaid yang: re: maqhug' na genae". Sabyi' khyae kaid' ko" ngaid qere: sabyi' qang: re maqhug'12 shaug' genae". – Naonhaung" paug' lo geyhag' zai" shaid' ra" qobo mo" re Ngo ba: na: ra". Din: main" ra" yaug re nhaung" khoe' ko". Khug vag: zo: ko". Vo yae kham: mo" dung: mae masho: majhin: mo, re13 matarha" khyo" dao: phyid' ba: ako". – Ai ru" ra" ayo, akhin: wa magai makhe' ra" ayo, akhin: ngaid mung: juyi bo: ra" yaug wa sae za: na: na: li" nae".14 Kao so' loe; beim nae" tau: qobo re jao" pye' mung: gai: ru re qho ge, . Ai ru: kaid' lao" naonhaung" lhaung" ba: ta" ko" ru we' dakhyo: gug: mang: din" gam Mo"so wa naonhaung" we' daga" na: na:15 li" nae". – Magai mashab: ra" qobo mau" zo" re nghang: mung: gai shab: ra" ave, re jhid' kao ge, . Vomo" kham: dung: mae gai: ra" akhyo re mho" shid' ge, . Gug: mang: din" ug gam Mo"so wa na: dang: shi" ra" Yoseb' zo: myid: qe re nhag' myain: nhag' khyag' li" nae".16 Gug: mang: din" ug gam AsAng Mo"so ceru: ga: mho: ra". Hau" mo" khyo gau: khao: ngo" mae ngug: yhai: na gemung: su" lai: lhau mo, wa aga" aga" ga: ta" genae". Taung yo yothaung: zaui: so" na yaug re re: kaug' ngug nhao nae" tau: ba: kaug' ngug nhao yaug re khai: yu mung: ngug: yhai:17 na: li" genae". – Sabyi' khyae khao: ngo" mae re: kaug' ngug: ru bo: li" nae". Khoru: ga" re Ngo wa naonhaung" phaung gaung: khyo" su" lai: lo" nae" ga: thain" madaui Mo"so mho: ra".18 Mo"so: ba na ayo, re myid: nghae" lao" na mo, wa nhang: kheim: phau: genae". Naonhaung" wa pe" so' ha" qo" genae" mangaid: . Mo"so: ba na wa naonhaung" mae bao: li" nae" mangaid: . Mug: caid' za:19 aboe" genae". – Byu xaosu qe wa lo:tin: re gyaug yang: tao" phao: re vae we' thaung" qhug' ru re" ru: yham khug vao mung: khin qae mae nga: au: lhao maui: yang thoe" ru20 re" ru: boe" genae". – Mo"so: ba na wa mabao lo: caid' no, tang: lang" ru ngaid: li" nae". Bao yao: mabao lo: caid' mo" no, boe" byaug nae".21 Naonhaung" kaid' ra" poe jham re Ngo nghang" ru we' ca' ra". Naonhaung" gyai ngaid: ga: zaui" cao" ko" ra" ba na re Ngo22 ma o ngaui . – Phaid' ngaui" xeim: we' sheim nae pyo" ra" xeim: jham ngaui" byid: gengaid yang: re: Ngo makhae: yu . Gyai xau: yaung" ra" xeim: dau: jham re jhaung: so: ngaui" gengaid yang: re: Ngo pe" shui23 manho nae". – Naonhaung" nho: nghaui" yao" ji: thoe re sae shi" to: ge, . Tang: she thoe re: no: paug' no: jhid' ga" ra". –24 Tarha" dang main" ra" khyo" dao: phyid' ru we' din: main" ru wa yug: na: ra" qid re" ru: yug: na shao: .25 O" Israel amyu" naonhaung" wa seyo segae: mae zin lam: byid xe geim" kug'26 ngaui" lo ko" i"? – Naonhaung" yao" lo; yang kaid' ra" Mo:lug' mo"so: pa" seim zaung we' khi: ung: kyi: pa" seim zaung27 re kaid' vo, lhau veko" nhaung . – Ai ru: mung: Damasku" vogaung: lai: lo" sho' naonhaung" re sham" pyaung" tai: lo" genae" khyo: Ngo kaid' nae" ga: gug: mang: din" gam ug' mang qo" ra" Mo"so mho: ra".