1 Myaung sho: mo, re pyam" yhin" yang: moe, shab' mo, re se' da: be, khyaid' yang: yao: yao" AsAng qe re ngonhaung" shaug' nae" sabyi' yhid ci: li" ge, ga: yang: Samari bam dao mae na ko" ra" Bashain: nung: jaung lo: jham we" ce: mung dao: tae"2 gyo: ge, . – AsAng Mo"so wa shao gyang" ra" yao" mang khyao: mae jham to" tang" ra" dao: kheim: we' dakhyo" naonhaung" re zhaung: nghoe" yang naonhaung" zo: myid: qe re geim: yang zhaung" lhaung" mung: cam" she: lo" genae" ba na ayo,3 joe" li" nae". – Naonhaung" yaug nge, wa yao: yao: su" thaung" qhug' ra" ajheim ajhe' bung" dung: bung" khyo" phao: jhe' thug' mung: kyae" to" ra" kyam: khug khyo keim" zaui: vhao" ke' ru qhug' genae" ga: AsAng Mo"so mho: ra".4 Bethela' khyo ye: mung: ye: cao" na: shaid' lhau shi: ge, . Gilagala, vo khyo re: ye: mung: myo: sho' shaid' nghung" khyo ye: kaid' shi: ge, . Ne, khao: ngo" mae" ngaui" xeim: re re: sam zin dalhang kaid' ra" xe bam dabam jo, nho" re re: ci: li" lo5 ge, . – Lhaid' yu: ra" jo, nho" mae" jeju so: ngaui" xeim: re phaid' ngaui" ge, . Ne, qug kaid' na: ra" ngaui" xeim: jham re re: cao" hau" kyo: ge, . O" Israel byumyu" qe we" ai: ru: kaid' ru re naonhaung" o ngaui: ako" ga: Mo"so ta" ra".6 Ngo kam" wa naonhaung" vogaung: jo, mae" jo, mae naonhaung" na jao: khyo bao" khug' khyo" ke' ngaid yang: re: naon- haung" Ngo jhao" malhang: phaug' lo lo: ko" ga: AsAng Mo"so mho: ra".7 Byao gin majoe" shi: re lho" mo" sam khye' mae Ngo mug: qu re thang nhao va". Davo mae mug: qu byid: davo mae maqu nhao lo: dajo, qo mae mug: qid qo", dajo, qo mae mug: qid maqo" kyaug' ho: gao: jo;8 ra". – Ai re" ru: shid' sam vo: vobyu qe wa qid gyi: sho' qhug' nae" laug ga: davo khyo ye: ngaid yang: re: qid gyi: sho' maqhug' shaug' ko". Ngaid yang: re: naonhaung" Ngo jhao" malhang: lo ko" ga: Mo"so mho:9 ra". – La laung hug' yang: sag' gae jham shid: ru , agyid: yug: shao" yang: shid: ra" qam" yang Ngo naonhaung" re qobo dae byid: va". Naonhaung" nho: taung yo yothaung: , sabyi' khyae , pho' ham" gae , Zhainlun: gae jham re khyag' phaung" jham: yang zo" pye' nhao ngaid qere: naon- haung" Ngo jhao" malhang: phaug' lo ko" ga: AsAng Mo"so mho: ra".10 Egutu bao: thaung" qhug' ra" no phyo: qam" re Ngo naonhaung" jhao" khyo" ke' va". Ve, qae" zolau: qe re shae: yang se' nhao va". Myao: jham re re: sham" pyaung" lo" nhao va". Naonhaung" na jao: mae bab sheim nae: hang" to: nhao ngaid yang: re: naonhaung" Ngo jhao" malhang: phaug' lo ko" ga: Mo"so mho: ra".11 Mo"so wa Sodom: we' Gomora' vo re tau: mhaug' lhain" re" ru: naonhaung" daqhae: re tau: lhaui" pye' mung: myi: khyeim" mae" xoe: yu: ra" myi: baui" re" ru: boe" veko". Ngaid qere: naonhaung" Ngo jhao" madam: lhang: lo ko" ga: Mo"so mho: ra".12 Ai ru: mung: o" Israel amyu" qhid' phyao: kaid' ru we' dakhyo: ana" re: kaid' shi: nae". Ai ru: kaid' nae" ngaid mung: o" Israel amyu" naonhaung" Mo"so we' qhug'13 nae" tau: seim" nyhang" na ge, . – Bam mo" jham re tau: yhe' mung: la re phain: ru we' byu: nhag' myid re myao: kyao" ra" yaug , ne, seim: mug: bo" re mug: caid' boe" nhao: ru we' myid kin mae" myhao: thao" ra" jo, qo mae su" qin" ra" yaug wa gug: mang: din" gam ug yaug Mo"so: mang khyao: yao: ngaid: ra".