Ezekia-5

(SHAO GYANG" JHAM: PAUG' )

切换到福音影视网-新版圣经

  • 1 Xaosu byu we" tho' ra" shae ga" ra" au: ko' yaug: shae tho: re yu mung: ni" xae we' nhaid' maui: jham re qaug: yu yang: jao mae lag: qu" mung: axu xu kho' to:
  • 2 wa, . – Vogaung: re lhang" kham" ra" ayo, joe" lao" daxu re vogaung: kao" mae ngha" wa, . Daxu re shae: yang lhai" phyid' wa, . Daxu re wa la mae tao" ke' wa, . Ngo re: ai bam: thao khyo shae re nhao: ke' nae". –
  • 3 Ai: xae we' nhaid' mug' re dajhid' zo: yu mung: ni" bau: thao mae zeim: ci wa, . –
  • 4 Dajhid' zo: re dam: yu mung: myi: ngha" wa, . Ai: myi: wa Israel amyu" re pyo: sin"
  • 5 ke' li" nae". – Dam: Mo"so mho: ru wa, ce: vogaung: wa Yerusalem: ngaid: ra". Avai: ayae lhang" gam: mae jo; ra" mang: jham: agaung: mae ai: vogaung: re ngo to" to: nae".
  • 6 Avai: ayae mae na ko" ra" labug: byumyu" qe: tho' mae ce: vobyu qe wa ngo to" to" ra" cao" khyao we' khang" dao: tarha" re je yang: shaid' nghung: ko". Ai: khang" dao: tarha" re re: macao" , ha:
  • 7 lhaui" pye' ko" ra". – Ai ru: mung: Mo"so mho: ru wa , naonhaung" wa avai: ayae mae na ko" mang: byu qe tho' jain" yang: tau: lhain: ko" ra" mathao mae re: , nga" cao" khyao jin kham re macao" , nga" khang" dao: tarha" re macao" lo: za: avai: ayae mae" mo, li cao" khyao re za: cao"
  • 8 ko" ra" mathao mae re: – Ngo wa ngo yao" gaung yao: dashaid' lhang: ye, mung: labug: amyu" qe: qhid' kheim: mae qobo
  • 9 dae byid: nae". – Nao kaid' qu" ra" anyain: avho" mau" mathao qhid' phyao: re: makaid' qu" , thao phyao: re: makaid' nae"
  • 10 qobo dae re nao mae byid: nae". – Ai ru: mung: ni" agaung: mae yao: pho" wa yao: zo: qe re , yao: zo: qe wa yao: pho" re zo: genae". Ngo nao re tau" phyid' mung: dang shi" ra" gu: re la hug' lo khao: ngo" tao"
  • 11 pye' nae". – Ai ru: mung: Mo"so mho: ru wa- nao wa nao yao" anyain: avho" mau" we' nga" shao lho" jo, qo re anyain: avho: kaid' mung: ngo daui: na: ru we' dakhyo: nao re o: mado , nhag' myain: nae" mangaid: . Nao re nhaung thao" phaug'
  • 12 neva". – Ni" sam bam mae" dabam re no qam" yang shid mung: ni" agaung: mae dabam wa shae lhae mae lang: yang: shid genae". Dabam re khyi" khao: ngo" khyo" hug' lo: ra" la mae tao" pye' mung: yao: bam: thao khyo shae gye re cao" nhao: ke'
  • 13 nae". – Ai ru: lao" nga" nhag' jo, yo nae". Nga" nhag' gyid' ru wa yao: bam: au: dao mae to" to: lao" za: nga" nhag' myid yaug yo nae". Nga" nhag' gyid' ru byang" loe" lao" Mo"so nhag' yo: nhaung ga" ru yao:
  • 14 bam ba genae". – Ai mae" getau avai: ayae mae su" lai: qin" mo; qhid' kheim: mae nao re byu sheim manae: jo, qo , byu amyu" myu" jham gaui mho shao" pyao jo, qo poe" pye' nae".
  • 15 Nhag' saung" yo" gyid' yang: nao mae thin: ra" qobo dae re ngo byid' ra" au: avai: ayae mae na: bam ko" ra" byumyu" boe: jham mae nao wa jung" khyoe' ru , mug' pho" ru boe" nae". Ai re" ru: Ngo Mo"so wa
  • 16 mho: to: va". – Nao re phyo' qheim" nae" tau: vae: moe; qid shab' ga" ra" myo: no; jham re nhao: ke' ra" au: re: , naonhaung" mae vae: moe; qid shab' ru myo: laug nhao mung: cinmain" lhau zaung: bao"
  • 17 re ngo tam" kyo" pye' ra" au: re , – Ngo naonhaung" adao mae bao" khug' mo" we' makhyang" ra" zoqhid re nhao: ke' mung: nyaug byid: byaug nae". Shae gye re re: joe" nhao yang: no qam" gye we' sa: zai" thug' ru wa nao mae phyid' lai: lo" li" nae". Ngo ni" adao mae shae she nhao nae". Ai re" ru: Ngo Mo"so mho: to: va".
回到本卷目录 回到本版本目录 回到首页