1 Mo"so: tarha" mae makae: lo: za: cao" na mo,wa nga: lho" ko" ra".2 Sagso: dao: jham re cao" pyang" mung: AsAng re lam: maug yao: qho: ra" mo, wa nga: lho" ko" ra".3 Yao: bam wa makhyang" ra" mau" re makaid' ko" ngaid: ra".4 Ni" mho" shid' dao: re jhaug' zaug taung" cao" nae" tau: nao pin: to: va".5 Ni" mho" shid' dao: re qo" cao" sho' nga" khyo wa din: shao: wo".6 Ni" amyin" dao: alhab' re myid: beim" na yang: , ngo qho' gyaug maphau: qo" loe; lo va".7 Ni" dang main" ra" dao: phyid' rure ngo mho" zhao: yu zo" re" din" ra" nhag' myid we' AsAng re caung: khin" nae".8 Ni" amyin" dao: re ngo cao" na nae". Ngo re khonhae" re: dashe: pye' to: la,.9 Zolau: wa yao: ye" lo" khyo dang re khoru: qo" shao kyang" nae" ein: ru wa ni" mungdao: we' dakhyo: lha" zo" re" cao" ru ngaid: ra".10 Nga" nhag' myid alhab' we' ngo AsAng re qho va". Khang" dao: khyo mae" dalai" lo" nhao la,.11 Ni" amyin" dao: re ngo malhoe".-AsAng re ngo mashaid' manghung: shao: ni" mung- dao: re nga" nhag' khug mae ke' to: va".12 Mo"so we" nao wa nga: lho" ra". Ni" cao" khyao jham ngo re mho" byid: la,.13 Ni" nhaid' mae" thug' ra" dao: alhab' re nga" byuna bang: mae ta" yo: kyo: nae".14 Jo, nho" dai kham qo" nae" tho' mae sagso: dao: mae ngo ngaui bau" ra".15 Ni" phyo: mho" dao: re myid: nghae" qu" mung: ni" khyo khe' gau: khao: ngo" re qu"na nae".16 Ni" mungdao: mae nhag' dag: na nae". Mungdao: rere: mato" myhid' nae".17 Ni" jeim pho" kao daui: na shao: yao: re gug: gam wa, ai ru: lao" mung dao: re ngo cao" na nae".18 Ni" tarha" mae mug' pho: the' myao shao: nga" myo, jid' re phung" byid: la,.19 Myid gye, dao mae ngo wa bang" vo ngaid:. Khang" dao: jham danyham" to: byid: la,.20 Ni" tarha" dao: phyid' ra" akhyo re myid: qu" na: mathao mae ngo nhag' ngai: ru thaung" qhug' na:21 Ngaid beim" ra" mo, we' khang" dao: re lhoe" mung: nhang: kheim: phau" ra" mo, re AsAng wa mho" shid' ra".22 Ngo wa sagso: dao: jham re cao" na: ru mung: gaui mho jung" khyoe' ru daphau: nhao la,.23 Zug: ade, qe wa nga" kao re kung" nae" ga: byin qham: na veko" ra". Ngo kam" wa ni" phyo mho" dao: re myid: nghae" qu" na:.24 Ni" phyo: mho" dao: jham wa ngo re ngaui bau: nhao: ra".25 Nga" kao so' wa phaui: lhug bam mae lang" jo;. Ni" mungdao: we' dakhyo: ngo re kao daui nhao la,.26 Ngo wa nga" na qab: ye, bao re ci: qhu" rure AsAng tae" gyo: va" ra". Ni" phyomho" dao: ngo re mho" shid' byid: la,.27 Ni" phyo: mho" dao: ngo re ba: myid: gyo: nhao la, Alao" ni" mug' pho" mau" re ngo myid:nghae" qu" nae".28 Saung" kaug' ra" mathao nga" nhag' myid ngug: na va". Ni" mungdao: we' dakhyo: ngo re tau: to" yu la,.29 Mhug' vhain" rure qo" jao" nae" khyo: khyi: yu mung:mungdao: tarha" re byid: la,.30 Ngo wa dao: so: khyo" re: khyin: yu va". Phyo: mho" dao: jham re re: ngo yao" qhid' kheim: to" to: va".31 Sagso: dao: jham mae ngo ngha: na va". AsAng we"ngo re qho' daphau: nhao la,.32 Ngo re au: naug: solo du: nhao va" ru mung: khang" dao: re phyaid phyaid cao" ye: naeva".33 Mo"so we" ni" phyo: mho" dao: akhyo ngo re mho" byid: la,. Khyo thao" sho' ngo cao" ye:nae".34 Laba lajhao nhag' myid ke' byid: la, Alao" nhag' myid lam: maug we' cao" ye: nae".35 Khang" dao: tarha" khyo dang khyo ngo re jhui" dai" la, ai: khyo dang re ngo nhag' dag: ra".36 Nga" nhag' myid re so' kho' myo,no; ra" khyo mangaid: veshao:. Ni" sagso: dao: shaid'khyo lao" lhang: yu la,.37 Aseim akeim ja: re mamyao shao: nga" myo, re lao" lhang: phaug' ke' byid: la,. Ni" khyodang mae su: nhao la,.38 AsAng re gyaug phug' ra" ni" jeim pho" mae dao: so: zai" pyang" byid: la,.39 Ngo gyaug: ra" jung" khyoe' rure yu: pye' byid: la,. Ni" cao"khyao jin kham wa gai lho" ra".40 Ni" phyo: mho" dao: jham re ngo myid: lao" na:. Ni" dang main" ru we' ngo re kao daui: na nhao la,.41 Mo"so we" ni" dao: so: we' khyaid' yu: khyowa ngo mae byang" lo veshao: wo".42 Ni" mungdao: mae ngo khug: ngha: na: mathao mae ngo re jung" khyoe' ra" mo; dao: re qo"ta" phyid' nae".43 Ni" tarha" dao: phyid' ra" akhyo re lam" jang" ra" mathao mae nga" nhaid' mae" dao: so: re daqab: pye' byid: la,.44 AsAng: tarha" re khonhae" re: malam: lai: cao"pyang" na nae".45 Ni" mungdao: re ngo qho: na: ra" mathao akaung: akag' anhaung" akhoe'maqhug' lo: qo" du: su" lhau va".46 Zug: ade, qe: qhid' kheim: mae ni" sagso: dao: re ta" na: mathao mae ngo qho' phau: nae" mangaid:.47 Ngo o ngaui: ra" ni" khang" dao: mae ngongaui bau" na nae".48 Ngo o ngaui: ra" ni" khang" dao: re ngo lo, tau nae" ngaid: ru mung: ni" mungdao: re ngo myid: qu" na nae".49 Ngo re nhag' ngai nhao: ra" mathao mae ni" jeim pho" re nao ta" to" ra" dao: re amyid; beim: byid: la,.50 Ni" mungdao" yang ngo daui: na mung: ai wa ngo qug: khai: qhug' ra" au: mae" ngaui pyo: jao: boe" ra".51 Ngaid beim" ra" mo, jung" khyoe' ko" qere:AsAng: tarha" re ngo malhoe".52 Mo"so we" geco' ne, mae" to" to" ra" tarha" re ngo myid:beim: mung: ngaui bau" na:.53 Ni" tarha" re to" pye' ra" makhyang: mo; mathao ngo mae nhag' lam: qu" laung: na: kyi:.54 Ngo bang" vo boe" na: ra" yham mae ni" mungdao: nga"nghaui" thoe boe" ra".55 Mo"so we" myi" ayo, mae ni" mang re ngo myid: beim: mung: ni"tarha" re cao" pyang" na nae".56 Ni" phyo: mho" dao: re tae" gyo" ra" khyo" yang: qam: qo" ra".57 Mo"so we" AsAng wa nga" qhid' mae" ngaid: ra". Mungdao: re tae" gyo: nae" ein: ngo mho: to: va".58 Nga" nhag' myid alhab' we' AsAng re mho' yao: na va". Ni" mungdao: we' daru: za: ngo re nhag' myain: la,.59 Nga" akhyo re ngo yao: myid: qu" mung: ni" sagso: dao: so: shaid' khyo lhang: lo va".60 Ni" sagso: dao: re cao"nae" ngo aug' ma o: hin: na va".61 Tarha" macao" ra" mo; taui: ngo mae gam: sho' ngaid qere: Ni" tarha" re ngo to" myhid' zai mangaid:.62 Myi" gae gaung: mae ngo beim" so" li" mung: ni" dang main: dao: phyid' rure ngo caung:khin" ra".63 AsAng re gyaug phug' ra" mo, alhab' we' ni" mungdao: re cao" ra" mo; byin cao: ngo boboe" nae".64 Mo"so we" myid gaung wa ni" jeju byang" jo; ra". Cao" khyao jham ngo re mho" shid' la,.65 Mo"so we" mungdao: we' daru: za: AsAng:jeim pho" re jeju byid: va".66 Khang" dao: re ngo lam" jang" na: ru mung: gai: ra" juyi we'laba lajhao re ke' byid: la,.67 Ngo aqug: akhai: maqhug' shi" au: khyo nghung" lo va". Ana"kam" mungdao: re cao" na va".68 AsAng wa gai: ra" nhag' myid jeju kaid' nae" nhag' myid bo: ra". Cao" khyao jham ngo re mho" shid'byid: la,.69 Ngaid beim" ra" mo, ngo re mhug' vhain" dao: ta" nae" myid: yaung ko" yang: re: ngo wa nhag' myid lam: maug ni" dao: re cao" na nae".70 Xau re" ru: yao: bam: nhag' myid pe' lo" byaug ko" ra". Ngo kam" wa AsAng: tarha" mae nhag' dag: na:.71 AsAng: cao" khyao re qo" mho" yu nae" mae nga" tau: qug: khai: qhug' nae" ru wa gai: ra".72 Ni" nhaid' mae" thug' ra" tarha" wa nga" tau: ngaui hhang ataung atug tho' mae je: gai: ra".73 Ni" lo, ngo re phain: ke' mung:akhyao boe" nhao: ra". Nao mho: to" ra" dao: re ngo qo" the' mho" yu sho' ngo re ba se" jhao nae" myid ke' byid: la,.74 Mungdao: re ngo myid: nghae" na: ra" mathao AsAng re gyaug phug' ra" mo, wa ngo re myao mung: ngaui bau" li" genae".75 Mo"so we" AsAng: cao" khyao jham wa dang main" ru mung: dao: so: we' AsAng ngo re mho" shid' ru re ngo ba: ra".76 Ni" jeim pho" re nao ta" to" ru we' dakhyo: ni" jeju wa ngo reyaug yo nhao shao:.77 AsAng: tarha" wa ngo re nhag' dag nhao: ra". Ngo qo" daui: na sho'ni" jeju ngo mae ajo; na shao:.78 Ngaid beim" ra" mo, wa qho' phau: geshao:. Pe" si: mabo: ru ngo re tarha" mavao: ra" khyo" kaid' veko". Ngo kam" wa ni" mho dao: re myid: nghae"qu" mung: beim: so" na:.79 AsAng re gyaug phug' ra" yaug: sagso: dao: jham re ba se" ra" mo, wa ngo jhao" lhang: phaug' lo geshao:.80 Ngo qho' maphau: shao: ni" mungdao: mae ngo nhag' dag: na shao:.81 Nga" solo wa khyaid' khyi: yu: jeju re myid: nghae" lao" na zo" qam: shain: lo" byaug: kyi: ngaid qere: mungdao: re myid: nghae" na:.82 Ngo re khonhae" yaug yo nhao: nae" i"? ein: nga" myo, jid' wa mungdao: re myid: lao" na zo" re" nga" myo, kyam: byaug va".83 Myi: khug' thaui: mae kao: to" ra" sho: qid ru: ngo boe" na ngaid qere: mungdao: re mato" myhid'.84 Ni" jeim pho" qo" daui: na nae" bana ayo, khomyhao" myao" nae" laug i"?. Ngo re yhin" pyam" ra" mo, re khonhae" tarha" dao: phyid' nae" i"?.85 Ngaid beim" ra" mo, AsAng: tarha" re lhoe" ra" mo, wa nga" tau: dung: gyain: dau: veko" ra".86 Khang" dao: alhab' wa dao: so: we' byang" jo; ava". Su geje wa pe" si: mabo: ru ngo re yhin" pyam" ko" mung: bao" yu la,.87 Yao: bam wa ngo re mug: myid: dao mae" qab: lhaui: nae" seim" na veko". Ngaid qere: AsAng: mungdao: re ngo mashepye'.88 Nhag' myain" myid jo; khyo: ngo re kao daui: na nhao la,. Ni" nhaid' thug' mung- dao: re cao" na nae".89 Mo"so we" ni" mungdao: wa mug: gaung: dao mae gang" tang: jo; ra".90 Dao: so: wa byumyu" byu ngug xe qae: mae agang" tang: jo; ra". Myidgaung rere: de" to: mung: malam: lai: lo: ngaid: ra".91 Jo, mae" jo, na mae" na alhab' wa AsAng: jeim qe ngaid mung: mung dao: we' daru: za: ana" ba joe" sho' malam: lai: na: bam ko" ra".92 Ngo wa AsAng: tarha" re nhag' madag: na re wa qhid' phyao: qug: khai: qhug' ra" yo, mae" byo, qeim: byaug neva".93 AsAng: mungdao: re khonhae" re: mato" myhid' khoru: ein: re ai: mungdao: khyo" yang ngo re kao daui: na nhao: ra".94 Ngo wa AsAng: jeim pho" ngaid: AsAng: mungdao: re qho: ca: ra" mathao mae ngo re khyaid' khyi: yu la,.95 Tarha" macao" ra" mo, ngo re phyo' qheim" nae" kung" na ko" ra". Ngaid qere: sagso: dao: jham re ngo myid: beim" na nae".96 Khyo khe' gau: khao: ngo" byang" loe" lo nae" rure ngo myao va". Ni" khang" dao: wa gyai lu gyai qhang: ra".97 AsAng: tarha" re ngo gyai yao: nhag' dag: ra". Dane; geim" myid: nghae" qu" na:.98 Khang" dao: tarha" wa ngo re gyevo tho' mae juyi ba nhao: ra". Khang" dao: wa ngo mae malam: lai: tang: jo; ra".99 Ni" sagso: dao: re ngo myid: nghae" na: ra" mathao mae ngo re mho" byid' ra" mho" pho" qe tho' je: ba: gyo: va".100 Ni" mungdao: re cao" ra" mathao kao qi: va" mo, tho' mae au: naug: solo je: du: va".101 Mungdao: re cao" yang: magai: ra" ru alhab're jao" pye' nae".102 AsAng ngo re mho" shid' kyang" ra" mathao ni" cao" khyao jham mae" ngo malhoe" malai:.103 Ni" mungdao: wa khoqhi" cug: myho' ra" i"?. Nga" nhaid' sho mae byo: yhid tho' je: cug: ra".104 Ni" mungdao" yang ngo nhag' boboe" va". Makhyang: mashab: ra" mau" re nghang" ra".105 Mungdao: wa nga" khyid au: mae myi: dam boe" mung: nga" gyaung: khyo re theim" pao byid' ra".106 Dang main" ra" cao" khyao jham re cao" nae" ein: ngo jham kai" ru we' dakhyo: kaid' cao" nae".107 Mo"so we" ngo qug: khai: qhug' na va". Mungdao: mae bo: ru we' dakhyo: kao daui: na nhao shi: la,.108 Mo"so we" nug: ngaui: ra" nhag' myid we' caungda" ra" xeim: re khae: yu byid: la,. Cao" khyao jham rere: mho" shid' la,.109 Nga" kao wa khonhae" re: nga" lo, mae jo, ngaid qere: mungdao: re mato" myhid'.110 Matarha" mo, wa khonhae" re: nga" tau: lha" thaung: khae: to: ko" ra". Ngaid qere: AsAng: mungdao: jham ngo mazai" shaid' lo: ye" lo" na:.111 Sagso: dao: jham wa nga" nhag' myid zhao: yao jao: ngaid mung: ai wa nga" khyao kham khyao: khae: ngaid: ra".112 Ai: cao" khyao jin kham jham re lo" thao" sho' cao" ye" lo" nae" tau: nga" nhag' myid re jhain: va".113 Ngo wa makhyang: mo, re nghang: mung: AsAng: tarha" re o ngaui: ra".114 AsAng wa ngo vho' nae" jao: we' go ngaid: ra". Mungdao: re myid: nghae" lao" na nae".115 Makhyang" ra" mo, ngo mae" thug' lo" ge, ngo kam" wa Mo"so: tarha" re cao" na nae".116 Ngo daui: na mung: ngo myid nghae" yaung: ra" khyo qho' phau" ru maboe" shao:. Ni" mungdao: we' dakhyo: ngo re thaug' qhao" yu la,.117 Ngo re thaug' qhao: byid' ngaid: re ngo gai: lo nae" ngaid:. Alao" ni" mungdao: re khonhae" re: myid: nghae" na nae".118 Cao" khyao jin kham mae" lhoe" lai: lo" ra" mo, re kao" pye' ra". Yao: bam myid: yaung: ru wa mhug' ru za: ngaid: ra".119 Mang: khao: ngo" mae" tarha" macao" ra" mo, re tham: bab: re" ru: myid: jho: pye' ra". Airu: mung: sagso: dao: jham re ngo o ngaui: ra".120 AsAng re gyaug: din mung: yang: gyo, shi: qid ga: to" li" mung: ni" cao" khyao jham re ngo gyaug phug' ra".121 Ngo wa tarha" dao: phyid' ru , dang main: za: dao: phyid' va". Pyam" yhin" ra" mo; lo, mae ngo re daqhaug'pye' la,.122 AsAng: jeim pho" tau: mae bokham: kham: byid: la,. Ngaid beim" ra" mo, ngo re maqo" yhin" geshao:.123 Ni" khyaid' yu: khyo we' dang main" ra" dao: re nga" myo, qu" zhaug' to: mung: myo, kyam: byaug: kyi:va".124 Nhag' myain" ru jo; ru we' dakhyo: AsAng: jeim re kaid' mung: cao" khyo jin kham jham re mho" byid: la,.125 Ngo wa AsAng: jeim pho" ngaid: sagso: dao: jham re ba: gyo:nae" nyain: ke' byid: la,.126 Mo"so we" mau" zaui: nae" ayo, akhin: joe" va" ra". Ni" tarha" re yao: bam pe" shui manho ko" ngaid: ra".127 Ngo kam" khang" dao: jham re hhang tho' za: maka" hhang agyang" tho' mae je: o ngaui:ra".128 Airu: ngaid: re AsAng: mungdao: alhab' geim" wa din" ra" ein: ngo mho mung: mhug' vhain" ru alhab' re manug: ha: pye' nae".129 Sagso: dao: jham wa mug' pho: ngaid mung:nga" Solo wa aire cao" na nae".130 Ni" mungdao: re phung" qhu" lao" bo" bao boe"li" mung: nhag' magyang: mo, re gyang" lo nhao:ra".131 Ni" tarha" cao" khyao re saung" myid: nghae" yang: nga" nhaid' ho"mung: myid: myaung" byaug va".132 Ni" mang re jhid' de; ra" mo, re nao kaid' ru we' dakhyo: nga" shaid' khyo lhang: lo mung: nhag' myain" yu la,.133 Nga" khyid khu ni" dao: we' dakhyo: zhaug' tang byid: la,. Makhyang: mashab: ra" ru: yang ngo re ma ug shao:.134 Byu qe: yang yhin" pyam" ra" khug mae" ngo re khyin: thug' yu la,. AsAng: mung dao: re cao" na nae".135 Ni" jeim pho" adao mae ni" myo, nho bo" bao bao byid: mung: ni" mungdao: rere: mho" byid: la,.136 Byu qe ni" tarha" re macao" ko" mathao mae nga" myo, mae" ngug byid wa qid re" ru: yug: na: ra".137 Mo"so we" AsAng wa dang main" ra" cao" khyao jham re: din" ra".138 To" to: byid' ra" sagso: jham re: tarha" nyang vang" mung: dao: so: zaung: ra".139 Gyevo qe wa ni" mung dao: re to" myhid' pye' ko" mathao mae myid qug: myid qae" ru: yang ngo re yhin" ra".140 Mungdao: wa shaogyang" ru ngaid mung: ngo o ngaui: ra".141 Ngo wa ngai: ra" yaug maphug' makhyaid' kaid' ko" ru phau" ra" yaug ngaid qere: ni" mungdao: re ngo mato" myhid'.142 Ni" dang main" ru wa khonhae" re: malam: lai: ngaid: ra". AsAng: tarha" re: dao: so: zaung: ra" tarha" ngaid: ra".143 Ngo wa qug: khai: kaug' qhui qhug' ngaid qere: ni" mungdao: wa nga" nhag' dag jao: ngaid: ra".144 Ni" sagso: dao: jham wa khonhae" re: byo; qeim: ga" ru majo, ngaid: ra". Ngo kao daui: na nae" tau: laba lajhao nyain: re ke' byid: la,.145 Ngo wa nhag' myid alhab' we' zag: yao va". Mo"so we" tae" gyo: byid: la,. Cao" khyao jham re ngo cao" na nae".146 AsAng re mho' yao: na: khyaid' yu la,. Sagso: dao: jham re cao" na nae".147 Mug: mabo" shi: mae" zag: yao va". Mungdao: re myid: nghae" na va".148 Myi" ayo, malai: lo" shi: re ni" mung- dao: re myid: ca: qu" nae" tau: ngo beim" to" li" va".149 Mo"so we" nhag' myain" ru we' dakhyo: nga" dao: re tae" gyo: byid: la, cao" khyao jham we' daru: za: ngo re kao daui: na nhao shi: la,.150 Magai: ra" nhag' myid bo: ra" mo, qui" to" li" ko" yang: re: , ni" tarha" we' yao: bam va" lin: ako".151 Mo"so we" AsAng wa ajhao" za: na: ra". Ni" mungdao: alhab' wa dang main" ra".152 Sagso: dao: jham wa malam: lai: gang" tang: rure geco' ne, mae" ngo ba va".153 Ngo thaung" qhug' ra" qug: khai: re qu" mung: ngo re khyaid' yu la,. AsAng: tarha" re mato" myhid' nae".154 Ngo re qu" caung mung: ngo re khyaid' yu la,. Ni" mungdao" yang ngo re nhag' tang" yu la,. Mungdao: we' daru: daui: na nhao la,.155 Tarha" macao" mo, wa cao" khyao jham re maqho ko" mung: khyaid' yu: khyo we' va" lin veko" ra".156 Mo"so we" ni" jeju wa myo: laug: ra". Cao" khyao we' daru: za: ngo re nhag' tang" shi: la,.157 Ngo re yhin" ra" mo, we' gyevo jham myo: laug: ra".Ngaid qere: ngo wa sagso: dao: jham re malhoe" lai lo: neva".158 Dao: so: mazaung: ra" mo, re myao yang: ngo nhag' qu" no: ra". Khoru: ein: re yao: bam wa mungdao: re matae" gyo: ko" ngaid: ra".159 AsAng: mungdao: re ngo o ngaui: rure ba byid: la, Mo"so we" nhag' myain" ra" jeju we' ngo re nhag' tang" yu la,.160 Mung dao: alhab' wa dang main" ru za: ngaid: ra". Ni" dang main" ra" tarha" dao: phyid' ru wa khonhae" re: ajo; jo; ra".161 Pe" qobo mabo: ru zug: qe ngo re yhin" pyam" ko" qere: ngo wa ni" mungdao:re phug' myao" ra".162 Zai gyo" jham re qhug' gaug: ru re" ru: mungdao" mathao ngaui bau" ra".163 Mhug' vhain" ko" dao: re gyo" nghang" ra". Ni" mungdao: re kam" wa nhag' dag: ra".164 Ni" dang main" dao: phyid' ra" mathao mae daba mae nhaid' lhang ngo nao re caung: khin" nae".165 Ni" tarha" re o ngaui: ra" mo, gyai yaug yo: ru qhug' genae". Yao: bam wa nhag' lam: gyug: genae" mangaid:.166 Mo"so we" ni" khyaid' khyi: yu: khyo re myid: nghae" mung: ni" mungdao: re ngo cao" na nae".167 Ni" sagso: dao: jham re nga" solo wa cao" na nae". Gyai o ngaui: ra".168 AsAng: mungdao: we' sagso: dao: jham re cao" nae". Nga" akhyo alhab' wa ni" myo, qao: tau ngaid: ra".169 Mo"so we" ngo hug' yao thoe AsAng jhao" joe" veshao:. Mungdao: jo; ru we' dakhyo: ngo re khyi: yu la,.170 Ngo mho' yao: thoe nao jhao" kyao" vao veshao:. Mungdao: we' daru: za: ngo re khyi: yu la,.171 Ni" cao" khyao jin kham ngo re mho" shid' ra" au: nga" nhaid' wa nao re caung: khin" thoe we' caung: nae".172 Ni" mungdao: alhab' wa dang main" ru mung: nga" nhaid' sho ni" mungdao: re nghaui" caung: nae".173 Ni" mungdao: re ngo o ngaui: ra" mathao mae ni" lo, ngo re bao" yu shao:.174 Mo"so we" khyaid' khyi: yu: jeju re ngo myid: nghae" lao" na:. Ni" tarha" re: ngo nhag' dag jao: ngaid: ra".175 Ngo kao daui: na mung: AsAng re caung" na shao:. Cao" khyao jin kham jham wa ngo re bao" thaug' shao:.-176 Byaug: lo" ra" yao re" ru: ngo khyo nghung: nghung" lo" va". AsAng: jeim re cao" qho: yu la, ngo wa khang" dao: jham re mato" myhid' nae".