1 Mo"so wa nga" jhaung: mho' thoe re gyo: mung: nga" shaid' khyo no: khae khae byid' ra" mathao mae ngo nhag' dag: ra".2 Ngo kao daui: na: dalo: gyo: mae Mo"so re mho' yao: na nae".3 Shid zug' taui: wa ngo re lhang" kham" ci mung: movo: mug: mae" gye: yang qug: khai: ngo re khe' myhi: lo: ra". Qug: khai: kyin" nhaung" ngo thaung" qhug' na:4 Ai: au: ngo Mo"so we" nga" solo re lhoe' ke' byid: la, ein: Mo"so : mang khyao: mho' yao: ke' va".5 Mo"so wa jeju kaid' nae" nhag' myid , dang main" ra" nhag' myid bo yaug ngaid: mung: ngonhaung" re nhag' myain" na: ra".6 Mo"so wa nhag' magyang: mo, re lhaug' zaung" nae" mangaid:. Ngo nyham: khyo" zo" mae" na: ra" au: khyaid' yu: ra".7 Nga" nhag' myid solo we" Mo"so nao re jeju ci: qhu" ra" mathao mae nao dug: no: nae" jo, qo khyo dam: lo" wa,. Mo"so wa nao re jeju kaid' ava".8 AsAng wa nga" kao re shid nae" jao: mae" re: nga" myo, jid' re ngug byid gyo" nae" ru mae" re: nga" khyid tha" thu: lang" ru mae" re: lhoe' ke' byid: va".9 Amung: daui: na shi" ra" mo; mang: mae Mo"so: qhid' kheim: ngo asu" qin" nae".10 Ngo wa gyai yao: nhag' ngai: byaug va" ein: mho ngaid qere: lam khug lam" jang" nhag' myid bo shi".11 Byu alhab' wa mhug' dao: za: ta" ako" ein: ma beim: maso: ta" ke' venhaung:.12 Mo"so ngo mae kaid' byid' ra" jeju cao jab re khoru: tho' xe' nae" laug i"?.13 Khyaid' khyi: yu: ga" ra" keim re ngo zaui" zag: ci mung: Mo"so: mang khyao: re mho' yao nae".14 Mo"so re dao: so: to" ru we' dakhyo: Mo"so: byu qe: qhid' kheim: mae cao" pyang" nae".15 Shao lho" ra" mo, shid: lo" ru wa Mo"so: qhid' kheim: mae phug' de; ra".16 Mo"so we" ngo wa AsAng: jeim dang dang ngaid: AsAng: jeim myhi" yao: zo: yao: ngaid va". Ngo re taui" to" ra" taui: re nao pheim: ke' byid: va".17 Jeju caung: xeim: re AsAng: qhid' kheim: mae caung da" mung: Mo"so: mang khyao: re mho' yao nae".18 Ngo Mo"so re dao: so: to" ru we' dakhyo: cao" pyang" nae". Yao" byumyu" qe: qhid' kheim: mae Mo"so: yham vang" khug mae.19 Yerusalem: ni" phaung gaung: mae ngo qhaug' byid: nae". Haleluya