1 Mo"so wa gai thao" yaug ngaid: ra" mathao yao" jeju re caung: ge,. Yao" nhag' myain" ru wa mabaui mabyo, gang" tang: ra".2 Yao" jeju wa malam: lai: gang" tang: ra" ga: Israel byu qe ta" geshao:.3 Yao" jeju wa malam: lai: gang" tang: ra" ga: amyu" kaung bao: khae: yu geshao:.4 Yao" jeju wa malam: lai: gang" tang: ra" ga: Mo"so re gyaug phug' ra" mo, khae: yu vegeshao:.5 Ngo wa qug: khai" ra" jo, qo mae" Mo"so re khai: yao: ke' mung: Mo"so wa gelin: gego" jao: khyo she: vhao" yu: ra".6 Mo"so ngo we' daga" ngaid: pe" rere: magyaug ca". Byu qe ngo re pe" qo" kaid' genae" mangaid:.7 Mo"so wa ngo re bao" thaug' na yaug ngaid: ra". Ngo re manug nhung: ra" mo, mae nga" nhag' jo, yo nhao: ra".8 Mo"so mae khug ngha: na: ru wa byu mae khug ngha: tho' mae je: gai: ra".9 Mo"so mae khug ngha: ru wa zug: qe mae khug ngha: tho' je: gai: ra".10 Byumyu" qe alhab' ngo re li" lhang" kham" li" ko" ra". Mo"so: mangkhyao" yang yao: bam re qo" khe' lhaui" pye' nae".11 Khyi" khao: ngo" mae yao: bam ngo re ceim" ko" qere: Mo"so: mangkhyao" yang yao: bam re qo" khe' lhaui" pye' nae".12 Byo: jham re" ru: ngo re ceim" ko" qere: zau: gae re nga" ra" myi: re" ru: yao: bam shid: lo" genae". Mo"so: mangkhyao" yang yao: bam re khe' lhaui" pye' nae'.13 Nao ngo re lang: veshao: ga: qam: ke' deim" lhang: qere: Mo"so ngo re bao" thaug' yu: ra".14 Mo"so wa nga" qam: o: we' nghaui" caung: nae" akhyo ngaid: ra". Ngo re khyaid' yu yaug re: ngaid: ra".15 Dang main" ra" mo; seim zaung mae ngaui bau" ra" thoe we' khyaid' yu: thoe thug' ra". Mo"so: lo, yo lo, wa mau" qi: zaui: va" ra".16 Mo"so: lo, yo lo, tau: to' qang: to" ra". Yao" lo, yo lo; yang mau" qi: zaui: so" ra".17 Ngo mashid shi: nae" kao daui: na mung: Mo"so: mau" zo" jham re ta" hau" kyo: shi: nae".18 Mo"so wa ngo re dae qi: sho' byid: mho" shid' ngaid yang: re: shid nae" ru mae maqhaug' ke' shi:.19 Dang main" ra" kham: dung: re phung" byid: gela,. Ngo vao mung: Mo"so: phung- bao ham" hung: re caung: khin" nae".20 Ceru wa Mo"so: kham: dung: ngaid: ra". Dang main" ra" mo, wa qo" vao genae" ngaid: ra".21 Ngo AsAng re pa" caung: mung: AsAng wa nga" dao: re tae" gyo" ru we' ngo re khyaid' yu: ra".22 Zho: cang yham kaid' ra" mo, khyin: khyo" to" ra" laug baui wa khaung nho thao zag: ra" laug baui boe" ra".23 Ai:ru wa Mo"so kaid' ra" mau" ngaid: ra". Ngonhaung" myo, qao: tae mae mug' pho: mau" ngaid: ra".24 Ce: ba na wa Mo"so tu" to" ra" bana ngaid: ra". Ana" ba zhao: yao taung" ngaui bau: gelang:.25 Mo"so we" ana" khyaid' yu la, wo". Mo"so we" ana" min byid: la, wo".26 Mo"so: mang khyao: we' joe" li" ra" yaug wa nga: lho" shao: wo". Mo"so: yham mae ngonhaung" yao: re nga: yhe' byid: nae".27 AsAng wa Mo"so ngaid mung: ngon- haung" re bo" bao byid' ra". Xeim: nau" xeim: dau: re phain: khyug mae taui" yang taui" to: ge,.28 AsAng wa nga" Mo"so ngaid mung: AsAng re ngo caung: khin" nae". Nga" Mo"so we" ngo AsAng re nga: yhe' byid: nae".29 Mo"so wa gai: ra" yaug ngaid mung: yao: re caung: khin" ge, yao" jeju wa malam: lai: gang" tang: jo, shao: wo".