1 Alao" Sholomun wa Mo"so re: thau: ra" caid' no, akhug li" na: na nae" ga: mho:2 ra". – Ngo kam" wa AsAng pyaid da du vao: laung" na nae" jo, qo we' yham re3 zhaug' to: va" ga: ta" ra". – Dam: jhaung zug: wa myo, khung: qang: ke' yang: zang" qham: na ko" Israel mo, byu qe alhab' bam: re min byid' ra". Zang" qham: na ko" Israel4 mo, byu qe wa ye; na: bam: ako". – Dam: jhaung zug: wa Nga" amyu" Israel re Egutu mang: mae" thaid' she: yu: ba mae" Israel byumyu" davo mae Nga" mang jo; na nae" tau: yham kaid' nae" akhyo: re re: , Nga" amyu" Israel adao zug: boe" nae" yaug re:5 Ngo makhyin: yu lo: za: – Yerusalem: vo mae Nga" mang khyao gang" jo; na nae" we' Nga" amyu" Israel adao ug nae" Davi6 re Ngo khyin: yu va" – ga: nga" pho" Davi re nhaid' dao: thoe khyo" ta" yang: yao" lo; yang ai: dao: re boe" dang: lo nhao: ra" Israel Mo"so wa nga: lho" na shao: wo".7 Ana" Israel AsAng Mo"so: mang khyao: tau: yham kaid' to: nae" ga: nga" pho" Davi8 du va" qere: – Mo"so wa nao nga" mang khyao: tau: yham kaid' nae" ga: da: ra"9 akhyo wa gai lho" ra". – Ai qere: nao ai: yham dakaid'. Ni" aung mae" gyo" ra" ni" zo: za: nga" mang mae yham agai: zhaug' nae" ngaid: ga: nga" pho" Davi re mho:10 ra". – Mo"so re: yao: mho: to" dao: poe" byid' ava". Ngo nga" pho" Davi gaung tha" po" thug' li" mung: Mo"so: dao: so: we' dakhyo: Israel zaung tao" mae ngo zaung mung: Israel AsAng Mo"so: mang khyao:11 tau: ce: yham re tau: yhe' to: va". – Ai: qe, khug mae Mo"so Israel zo: myid: qe we' to" to: va" dao: thang" bo: bain" re re: ngo ke' to: va" ga: mho: ra".12 Ai ru: Sholomun wa Mo"so: ngaui" phain we' Israel mo, mo" thaui: qhid' kheim: ye; jo, mung: yao" lo, tau: ke' ra". –13 Yao: wa aqhang ngo" daung" , apyi ngo" daung" myhao khyo sam daung" bo: ra" gyid: gin byae: kaid' mung: vang" agaung: mae to" to" ra". Ai: adao yao: do; ye, mung: Israel mo, byu phaung qhid' kheim: paid' thaug' thaug' zo" yao" lo, mug: khyo tau:14 qang: ke' mung: – Israel AsAng Mo"so we" mug: gaung we' myid gaung mae nao we' dau: Mo"so mana lo: . Aung khug: nhag' lam: alhab' yang ni" qhid' kheim: su" na ko" ni" zo: myid: qe re ni" dao: so: we' dakhyo: jeju nhag' lam: myhao" qhu" byid' na: ra".15 Ni" jeim nga" pho" Davi re dao: thang: thang" to" we' dakhyo: nao poe" byid' ava". Ni" nhaid' thoe: yang mho: thug' ke' mung: ana" the' myao va" we' dakhyo: ni" lo; yang16 yao: ai re poe" toe' ke' ava". – Ai ru: mung: Israel AsAng Mo"so we" nao wa nga" tarha" khug su" na va" we' dakhyo: ni" zo: myid: qere: vin tang: za: nga" qhid' kheim: su" na ko" ngaid re wa Israel mang: din" zaung tao" mae ni" zug: nyhug abang mabyid zo: myid: qe zaung: na nae" ga: ni" jeim nga" pho" Davi re mho: to: va" we' dakhyo: ana"17 poe" byid: shao: . – Ngaid va" Israel Mo"so we" ni" jeim Davi re AsAng ta" dao: dang:18 jo, shao: wo". – Mo"so wa byu qe we' daga" myid gaung: dao mae dang dang qo" na: na nae" i". Mug: gaung we' tho' zhao" myhao mug: gaung: ajham ataung wa nao re qo" lhaung" kham" to: nae" mangaid: . Ai qhi" ngaid: re ngo kaid' to" yham mae19 nao khoru: qo" tho' laung" na nae". – Ai qere: nga" AsAng Mo"so we" ni" jeim ngo ni" qhid' kheim: zag: hug' dao: we' mho' yao thoe re tae" gyo: khae: yu byid: la, wo".20 Nga" mang khyao: ai mae jo; jo; li" nae" ga: AsAng ta" ra" jo, qo khyo myo, nho qang yang: ni" jeim ngo ai: jo, qo tau jhaung: mho' ra" dao: qo" the' gyo: sho' ni"21 myo, jid' myi" na" qu" na shao: wo". – Ni" jeim AsAng: byumyu" Israel wa ai: jo, qo khyo myo, khung: qang yang: jhaung: mho' na ko" re ngonhaung" mho' yao thoe gyo" yu byid: la, . Tho' zhao" myhao ni" na jao: mae" mho' yao thoe gyo" yu byid: la, . Qobo22 lhoe' ke' byid: la, wo". – Byu dayaug yaug yao: yao" yham kyo: cao: re shaid' mung: jham tang: ca" ru thug' lo: mathao ce: yham AsAng: ngaui" phain qhid' kheim: li"23 nhang" ngaid: re – AsAng nao mug: gaung mae" gyo" yu byid: mung: ni" jeim qe re dao: kho' byid: la, . Shaid' yaug re qobo bo: we' dakhyo: yao" au: dao kai" ke' byid: la, . Dang main: yaug re lhoe' ke' byid: mung: yao" dang main" mae cao" yang:24 akyu" byid: la, wo". – Ni" byumyu" Israel qe nao re shaid' lhoe" pye' qobo: mathao gyevo qe: lo; yang seim: byaug qhug' lao" yao: bam: nhag' lam: lhang: lo mung: ni" mang khyao: khae: yu zo" ce: yham mae" nao jhao" jhaung: mho' bain" na ko" ngaid:25 re – AsAng wa mug: gaung mae" tae" gyo: byid: mung: ni" amyu" Israel qe re qobo lhoe' ke' byid: yang: nao yao: bam: phug' pho" qe re byid' to" ra" jao khae mug: khyo26 dam: dai" ke' byid: la, wo". – AsAng nao re shaid' ra" qobo: mathao mug: maqu , ba mo" lhe' ngaid: re yao: bam ce: jo, qo khyo qang yang: jhaung: mho' mung: nao yao: bam re dae byid' ra" mathao ni" mang khyao: khae: yu zo" yao: bam: qobo jao"27 pye' ko" ngaid: re wa – Mug: gaung: mang: mae" tae" gyo: byid: mung: ni" jeim qe we' ni" amyu" Israel qobo re khyaid' pye' byid: la, . Yao: bam gai: cao" nae" khyo dang re ceim" shid' yang: ni" byumyu" re byid' to" jao khae mug: ngaid: ni" myid gaung:28 dao mae mug: qu: ke' byid: la, wo". – Ai: mang: din" mae moe, gyo" ru , no qam" , gaug sam: sam" ru , gaug vho' lheim" no: ru , khyag' phaung" we' bothaung zo" ru re: , yao: bam: gyevo qe yao: bam: mang: mae" vo jham li" lhang" kham" to" ru re: , pe" ru" qam" we' qug: khai: qhug' geyang:29 re: – Byu dayaug yaug , mangaid: lao" ni" amyu" Israel damyu" geim" yao: bam: gaung mae zao" lo: qam" we' kaug' qhui qhug' ko" re ce: yham khyo myo, khung: qang yang: lo, yheim" ke' zo" daja: ja: mho'30 so" lo ko" re – AsAng wa nao na: jo; mug: gaung: mang: mae" gyo" yu byid: la, . Byu: nhag' myid AsAng ba byid' na: we' dakhyo: qobo re khyaid' pye' byid: mung: yao: yaug yao: re yao" lo, mau" khyo" cao" yang: tug' byid: la, . Nao za: byu Sosu: nhag' lam:31 qo" ba byid' ra". – Alao" phug' pho" qe re nao byid' to" mang: mae lhau" na: dalo: gyo: nao re gyaug phug' na gezai ngaid:32 wo". – Ai: tho' mae mug: va: mae" taung bug byumyu" wa ni" ham: hung: qi" mang khyao re re: , ni" qam: bo: qang: ke' ra" lo, mo" re re: ba se" lo mung: ni" byu Israel mangaid: qere: ni" mang khyao: mae taung bug mae" li" lo yaug ce yham khyo qang33 yang: jhaung: mho' ngaid: re – Ni" byu Israel wa ni" mang re ba mung: gyaug phug' na ko" ru we' ce ngo kaid' to" yham wa AsAng ni" mang khyao: bona: yham ngaid: ru myid gaung: dao byumyu" cao jab qo" ba sho' AsAng wa mug: gaung mae na: jo, qo mae" tae" gyo: byid: mung: taung bug byu34 mho' mae: mho' poe" byid: la, wo". – Ni" byu qe gyevo qe re gye yese' na ko" au: yao: bam re khogau: nhao: ke' ngaid qere: yao: bam wa nao khyin: yu: vomo" we' ni" mang khyao: tau: ngo kaid' to" yham khyo qang zo" AsAng mae jhaung: mho' na ko"35 re – AsAng wa mug: gaung: mang: mae" yao: bam mho' ko" dao: we' mho' bain" dao: re tae" gyo: byid: mung: yao: bam re36 gam: yu byid: la, wo". – Byu khag' re: qobo makaid' lo: mana ko" ru mung: yao: bam nao re shaid' mung: nao yao: bam re nhag' yo: yang: gyevo: lo, khyo qhaug' byid: mung: gyevo qe wa jhao" ra" va" ra" yao: bam: mang: khyo sham" lo" pye' ngaid: re37 wa – Yao: bam re kyam: xao" to" mang: mae lo" myid: beim: mung: nhag' lam: lhang: lo yang: ngonhaung" shaid' nghung" bam va". Ngonhaung" makhyang" mau" akaid' bam genhaung ga: kyam: lo" laung" na: mang: mae" nhag' lam: nyham: khyo"38 yang: mho' bain" na ko" ru we' – Ai: mang: mae nhag' lam: alhab' we' aung khug lam: maug: yang nao jhao" lhang: lo mung: yao: bam: phug' pho" qe re byid' to" mang: din" mae khyin: yu: vomo" mae ni" mang khyao: tau: ngo kaid' to" yham khyo qang yang:39 mho' so" na ko" re – Alao" jao" AsAng wa mug: gaung: mang: nao na: na: jao: mae" yao: bam: mho' bain" lo: dao: kheim: tae" gyo: byid: mung: yao: bam re caung gam: yu byid: la, . Nao re shaid' nghung" ra" ni" byumyu" re qobo lhoe' ke' byid: la, .40 Nga" AsAng Mo"so we" ni" myo, jid' phung" mung: qu" ke' wa, . Ce: jo, qo mae"41 mho' so: dao: tae" gyo" yu la, wo". – Ai ru: mung: nga" Mo"so we" to" wa, . Nao we' ni" bain" nho: phung bao kheim: so' nao na jao: mae na: na byid: la, . Nga" AsAng Mo"so we" ni" khin jaung qe khyaid' yu: akhyung re ve; ci mung: ni" shao gyang" ra" mo, jeju khug mae ngaui bau" na42 geshao: . – Pho" AsAng Mo"so we" ni" xau gyain: qhug' yaug; myo, le; mae" dalhang: lo" pye'. Ni" jeim Davi re myhao" qhu" jeju re abeim: so" na byid: la, wo" ga: mho' ra".