1 Mo"so we" Davi rere: yao: thaung" qhug' ra" qug: khai: rere: myid: beim: wa,.2 Ai: zug: wa Yaku' amyu" lam khug: ra" Mo"so: yham qo , Yaku' phung bao ngaid: ra" yaug: jo, qo re ngo mathe' myao myao wa, ,3 Nga" yham khug khyo ngo mavao , nga" yab jaung: dao ngo mado, ,4 Nga" myo, jid' yab magyi: mung: nga" myo, jid' myo, qo" cam: nae" mangaid: ga: ,5 Yaku' amyu" goe; pa" na: kheim: so' qi" Mo"so re yao: jham kai: mung: dao" thao: ce' to: va" ra".6 Pa" seim zaung wa Ephrim: mang: mae jo; ga" ru ngonhaung" the' gyo: va". Yarin: din" mae the' myao va".7 Ai: seim zaung khyo vao mung: yao" khyid nao: tao" gyid' mae ngonhaung" goe; pa" gelang:.8 Mo"so we" ni" kheim: so' dao: thang" bain" nao ab' na: ra" jo, qo khyo to"do, lo" wa,.9 AsAng: khin: jaung qe wa dang main" ra" rure ve, mung: AsAng: shaogyang" ra" mo, zhao: yao taung" nghaui" caung: geshao:wo".10 AsAng: jeim Davi myo, nho re tau mung: AsAng mae xau gyain: khae: yu: ra" yaug re daha: pye' byid: la,.11 Mo"so wa Davi re dang dang yao: jham kai: mung: dao: so: maphyo' nae" ga" dao: wa ni" amyu" aboe: re ni" lakin dao mae ngo zaung nhao nae".12 Ni" zo: myid: qe wa nga" dao: thang" rere: ngo mho" byid' ra" sagso: dao: jham re cao" ko" ngaid: re yao: bam: zo: dau qere: ni" lakin mae malam: lai: zaung: li" genae".13 Mo"so wa Ziun: bam re khyin: yu mung: malam: lai: na nae" nhag' myid bo: ru wa ,14 Ce: vo mae ngo malam: lai: ab' na nae" vogaung: ngaid:. Ngo o ngaui: ru mung: ce: vo mae ngo na nae".15 Yao" zo: nam re ngo dang dang min byid: mung: yao" sho: jhin mo, re gyi: sho' ngo zho: jhaug' nae".16 Yao" khin jaung jham re khyaid' yu: khyo we' byang" vin" nhao nae". Yao" shao lho" ra" mo, wa ngaui bau: zhao: yao taung" caung: nghaui"genae".17 Ai: jo, qo mae Davi tau: ngo khyug yhaug' byid: nae". Ngo mae xau gyain: khae: yu: ra" yaug: tau: mae myi: baung: te' to: va".18 Yao" gyevo qere qho' gyaug: ru: yang ngo nghoe' to: byid: nae". Yao" au: mae" Davi lhugmaug wa bu" yaung" nga: ye; li" nae" ga: mho: ra".