1Jhaung zug: mhomyi:-21

(SHAO GYANG" JHAM: PAUG' )

切换到福音影视网-新版圣经

  • 1 Satain: wa Israel byu qe re ju" phyo' yang: Israel amyu" re japhin: zhag' yu nae"
  • 2 tau: Davi re li" zhain" ra". – Ai mung: Davi wa Yaba we' Israel agyi qe re Berasheba mae" Dain vo joe" sho' Israel amyu" re nghe' qu" mung: yao: bam khonho" myo" laug ngo qo" ba shao: lozhao: kyo: geri: ga:
  • 3 amyin" khyo" ke' ra". – Yaba wa Mo"so yao" byumyu" re ana" na: tho' anho" dayo je: myo: nhao shi" shao: . Ai qe re: nga" asang jhaung zug: we" yao: bam alhab' ni" jeim qe ngaid: ra" mhao". Nga" asang ce re pe" mung: kaid' nug:? Israel amyu" re pe" mung: se' nhao: na: ga: mho: ra". –
  • 4 Ai qere: jhaung zug' dao: wa Yaba dao: kheim: re aung: pye' ra". Ai: mathao Yaba ye: mung: Israel mang: ngae sho' su" kam:
  • 5 yang: Yerusalem: dam: joe" lo: ra". – Yaba wa yao: tung" lo: japhin: Davi re lo: qhaug' ra". Israel amyu" geim" shae lhae ba: ci va" mo, alhab' dakyid: datid ngaid: . Yuda amyu mae shae lhae ba: ci va" byu byid
  • 6 tid: nhaid' tug ngaid: . – Ai qere: Yaba wa jhaung zug' dao: kheim: ca' ra" mathao Levi' we' Benyamin: boe: mabo: nghe'
  • 7 ngaid: ra". – Mo"so wa Davi khyo" ra" amyin" dao: ai ma-o ngaui mathao Israel damyu" geim" re qug: khai: phau: dae byid'
  • 8 ra". – Alao" Davi wa Mo"so jhao" cemau" ngo zaui: va" mathao ngo gyai shaid' va". Ai qe re: ni" jeim pho" qobo re ana" khyaid' pye' byid: la, . Ngo gyai makhyang" mau" zao" zaui: venhaung ga: mho' ra".
  • 9 Mo"so wa Davi lapa Gaid re Davi jhao"
  • 10 yeta" wa, . – Mo"so ceru: ga: mho: ra" ngo nao re sam gau: qhu" nae". Nao re dae byid: nae" tau: ai mae" daja: khyin: yu wa,
  • 11 ga: pin: ke' ra". – Gaid' wa Davi jhao" ye:
  • 12 mung: Mo"so ceru: ga: mho: ra". – Sam zin bao" khug' mo" joe" nae" qug: khai: , mangaid: lao" lho" sam khye' gyevo qe nao re cao" khe' mung: shae: yang nhau" pye' nae" qug: khai: , mangaid: lao" Mo"so: shae ngaid: ra" no mo" sam ba gyo" mung: Mo"so: mug: logyo: Israel damang" geim" pyam" nhau" pye' nae" qug: khai: kholam: khyin: yu nae" khyin: yu wa, . Ngo re nhao: ke' yaug jhao" khoru: lo" zhao: kyo:
  • 13 nae" myid: qu" wa, ga: mho: ra". – Davi wa ngo gyai myid myo" ra". Mo"so: lo, mae ngo vao shao: . Yao" nhag' myain" myid qi" qhang: ra". Byu: lo, khug ngo mavao shao: ga: lapa Gaid' re ta" ke' ra".
  • 14 Ai mung: Mo"so wa Israel amyu" mae no qam" mo" khyo" ke' mung: Israel byu
  • 15 nhaid' tug shid: pye' ra". – Yerusalem: phyo' qheim" nae" tau: Mo"so: yang mug: logyo: nhao: ke' mung: ai: vomo" phyo' lo" na: re Mo"so qu" ke' mung: ai qhi" ra" qug: qae" phau: va" mathao nhag' lam: dam: lhang yang: ga" va" ni" lo, qab; she: pye' se, ga: phyo' pye' seim" ra" mug: logyo: re mho: ra". Mo"so: mug: logyo: wa Yebuti byu Ornain: gaug nao: jao: yae mae
  • 16 ye; jo; ra". – Davi qu" ke' re Mo"so: mug: logyo: Yerusalem: adao shae vo; qang: na zo" mug: gaung we' myid gaung gyo: ye; na: ru re myao: ra". Ai: mathao Davi we' agyi qe wa jid: mo" bau: ve, yang: myid
  • 17 mae gam" goe; na: ako". – Alao" Davi wa Mo"so byu re mang: yu nghe' qu" nae" ngo amyin" khyo" ke' va". Makhyang: shaid' nghung" mau" mo" poe" ke' ru wa ngo yao: va". Ce: yao jham pe" shaid' ra" nga" AsAng Mo"so we" ni" mang: byu qe aqam" no maphau: lo: sho' ngo re re: , nga" bag' zo: qe: aboe: re re: qobo dae byid: la, ga: mho: ra".
  • 18 Davi wa Yebuti byu Ornan" zam jao: mae Mo"so: tau: ngaui" phain kaid' nae" akhyo Davi re ta" nae" khyo: Mo"so: mug: logyo: khyo" Gaid re pin: ke' ra". –
  • 19 Gaid mho: kyo" Mo"so: amyin" dao: we'
  • 20 dakhyo: Davi ye" lo" ra".– Ornan lhang: qu" ke' au: mug: logyo:re myao mung: yao" yaug gai zo: byid yaug we' daga" vho' na ko" ra". Ornan kam" saung so gaug
  • 21 nao" na: ru ngaid: . – Davi Ornan jhao" li" joe" lao" Ornan qu" ke' re Davi re myao yang: gaug nao: jao: mae" thug' mung: Davi qhid' kheim: myid gaung mae gam"
  • 22 goe; ra". – Davi wa Ornan re Mo"so: tau: ngaui" phain kaid' nae" ce: gaug nao: jao: ngo re byid: la, . Mang: byu qe: khug mae" ai: no qo" shao" pye' sho' ai: jo, qo main: qi"
  • 23 nho" aung: byid: la, ga: mho: ra". – Alao" Ornan wa Davi re yu wa, . Nga" asang jhaung zug: o: khyo: kaid' shao: . Phaid' ngaui" xeim: dau: kaid' nae" nung: lo: jham cin main" jhaung qhu" kaid' ja: saung so jham alhab' ngo qhaug' nae" ga: mho:
  • 24 ra". – Jhaung zug: Davi wa ai ru: magai nae". Dang dang ngo main: qi" gau jho: yang vai: yu nae". Ni" jo, nho" re Mo"so: tau: ein: mageim: wa mayu nae". Aphug' gau mabyid: lo: za: phaid' ngaui" xeim:
  • 25 mabyid: nae" ga: Ornan re mho: ra". – Ai: mang: Davi khyo" Ornan re hhang Shekela khyaug' yo lag byid: mung: ai: jo, qo re vai:
  • 26 yu: ra". – Ai: mae Mo"so: tau: phain kaid' mung: phaid' ngaui" xeim: we' zam" khug xeim: ngaui" byid: zo" Mo"so re khai: ra". Mo"so re: phaid' ngaui" xeim: qhaug' ra" phain dao mae myi: khyo" ke' ru we' mug:
  • 27 khaung mae" tau" ke' ra". – Mo"so: yang pin: to: va" we' dakhyo: mug: logyo: wa yao" shae re shae byao mae zaui: ke' ra".
  • 28 Mo"so wa Yebuti byu Ornan gaug nao: jao: mae yao: re tau: byid' ru Davi myao lao" ai: jo, qo mae ngaui" xeim: to' byid'
  • 29 ra". – Seyo khain Moshe kaid' ra" Mo"so: seim zaung pin: yham we' phaid' ngaui" xeim: qhaug' ra" phain wa ai: ta Gibeon vomo" myhao: ra" bug gaung mae jo; ra". –
  • 30 Davi kam" wa Mo"so: mug: logyo" shae re gyaug; ra" mathao ai: phain qhid' kheim: Mo"so: jhao" mavae" yemyid: ngaid: ra".
回到本卷目录 回到本版本目录 回到首页